އއ ރަސްދޫގެ ގެއެއްގެ ކޮޓަރީގައި އަލިފާނުގެ ހާދިސާއެއް ހިނގުމާއިއެކު ދެމަފިރިއަކު ފިހި ސީރިއަސް އަނިޔާތަކެއް ލިބިއްޖެއެވެ.
ދައުރުވަމުންދާ މައުލޫމާތުތަކުގައިވާގޮތުން މި ހާދިސާ ހިނގާފައިވަނީ ގެއެއްގެ ތެރޭގައި ވަކިން ހަދާފައި ހުންނަ އެޕާޓުމެންޓެއްގެ ކޮޓަރިއެއްގައެވެ. އަލިފާނުގެ ހާދިސާ ހިނގުމަށް ދިމާވި ސަބަބު ސާފުވެފައިނުވާއިރު ފިހުނު ދެމީހުންވެސް މާލެއަށް ގެނެސް ފަރުވާ ދީފައިވެއެވެ. ޑޮކްޓަރުންވަނީ އަނިޔާ ލިބުނު ފަރާތްތަކުގެ ހަށިގަނޑުގެ 90 އިންސައްތަ ފިހިފައިވާކަމަށެވެ. ބައެއް ނޫސްތަކުންވަނީ އެމީހުންގެ ފުރާނަ ސަލާމަތްކުރެވޭނެކަމުގެ އުންމީދު ނެތްކަމަށް ޑޮކްޓަރުން ބުނެފައިވާކަން އާއިލާއާއި ހަވާލާދީ ރިޕޯޓުކޮށްފައެވެ.
ރަސްދޫ ކައުންސިލުން މައުލޫމާތު ދިންގޮތުން އަލިފާނުގެ ހާދިސާ ހިނގި ގޭގައި ދެމަފިރިންގެ އިތުރުން އަންހެން މީހާގެ މައިންބަފައިންވެސް ދިރިއުޅެމުންދިޔައެވެ. އަދިވެސް ދެމަފިރިންނަށް ފަރުވާ ދެމުންދާއިރު މިކަމުގެ އިތުރު ތަފްސީލެއް އައިޖީއެމްއެޗްއިން ހާމަކޮށްފައިނުވެއެވެ.
