ރައީސް ޑރ މުހައްމަދު މުއިއްޒު މ ނާލާފުށީގެ ކައުންސިލު އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީއާއި ބައްދަލުކުރައްވައިފިއެވެ.
މ މުލީ އެއަރޕޯޓު ތަރައްގީކޮށް ހުޅުވުމަށްޓަކައި އެ ރަށަށް ކުރެއްވި ދަތުރުފުޅުގެ ތެރެއިން ރައީސް މުއިއްޒު ވަނީ ނާލާފުށީގެ މަސައްކަތްތައް ކުރިއަށްދާ ގޮތް ބައްލަވާފައެވެ.
އެގޮތުން އެ ރަށުގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިތުރުން ރަށުގެ އިސްވެރިންނާއިވެސް ރައީސް ބައްދަލު ކުރެއްވި އެވެ. މި ބައްދަލުވުން ކުރިއަށް ގެންގޮސްފައި ވަނީ މުލަކުއަތޮޅު ކައުންސިލުގެ އިދާރާގައެވެ.
މި ބައްދަލުވުމުގައި ބައިވެރިވެވަޑައިގެންނެވި ފަރާތްތަކުން ވަނީ ރަށަށް އެންމެ ބޭނުންޖެހިފައިވާ ކަންކަމާއި ތަރައްގީއަށް އެންމެ އެދޭ ކަންކަން ރައީސްއާއި ހިއްސާކުރައްވާފައެވެ. މިގޮތުން ފާހަގަކުރި ކަންކަމުގެ ތެރޭގައި ނަރުދަމާ މަޝްރޫޢު ފުރިހަމަވެފައިނުވުމުގެ ކަންބޮޑޫވުންތަކާއި ކަރަންޓު ލިބުމުގެ ދަތިތަކާއި އެކަމުގެ ސަބަބުން ކުރިމަތިވެގެންދާ ގޮންޖެހުންތައް ހިމެނެއެވެ.
ނާލާފުށި ކައުންސިލުން ބުނެފައިވާގޮތުން މުލީ އެއަރޕޯޓު ހުޅުވުމުގެ ރަސްމިއްޔާތުގައި ރައީސް ދެއްކެވީ އުންމީދީ ވާހަކަފުޅުތަކެކެވެ. އަދި ކޯޒްވޭ ތަރައްގީކުރުމުގެ މަސައްކަތްތައް ފުރިހަމަކުރެވުމާއިއެކު ނާލާފުއްޓަށްވެސް ފައިދާތަކެއް ލިބިގެންދާނެކަން ހިއްސާކުރިއެވެ.
މި ބައްދަލުވުމުގައި ކައުންސިލުން ވަނީ އެ ރަށުގައި ކުރިއަށް ގެންދާ ޕޮލިސް ސްޓޭޝަން ބިނާކުރުމުގެ މަސައްކަތްތަކުގެ އިތުރުން އޭޓީއެމްގެ ހިދުމަތް ގާއިމުކުރުން ފަދަ މަސައްކަތްތައް އަދި އެހެނިހެން މަޝްރޫޢުތައް އަވަހަށް ނިންމައިދިނުމަށް އެދިވަޑައިގެންފައެވެ. ކައުންސިލުންވަނީ ރައްޔިތުންނަށްޓަކައި ރައްޔިތުންނާއި ގާތުން ރައީސް ޑރ މުއިއްޒު މަސައްކަތްފުޅު ކުރައްވަމުންދިއުމަށްޓަކައި ޝުކުރު އަދާކުރައްވާފައެވެ.
ރައީސް ވިދާޅުވީ، ކައުންސިލުން މި ބައްދަލުވުމުގައި ފާހަގަކުރެއްވި ކަންކަން ބައްލަވާނެކަމަށެވެ. އަދި ބައްދަލުވުމުގައި ބައިވެރިވެވަޑައިގެންނެވި ވަޒީރުންނާއި ކުންފުނިތަކުގެ އިސްވެރިން މެދުވެރިކޮށް އެމަނިކުފާނުވަނީ ރަށުގައި ކުރިއަށް ގެންދާ މަސައްކަތްތަކުގެ އަދާހަމަ މައުލޫމާތު ހިއްސާކުރައްވާފައެވެ.
