2027 ނިމުމުގެ ކުރިން ރާއްޖޭގެ ހުރިހާ ރަށެއްގައި ދިރިއުޅޭ އާންމު ރައްޔިތުންނަށް ބޭނުންވާ އެންމެ މުހިއްމު އަސާސީ ޚިދުމަތްތަށްކަމަށްވާ ފެނާއި ނަރުދަމާގެ ނިޒާމު ސަރުކާރުން ޤާއިމު ކޮށްދޭނެކަމަށް ދިއްދޫ ދާއިރާގެ މެމްބަރު އަބްދުލް ލަތީފް މުޙައްމަދު ވިދާޅުވެއްޖެއެވެ.
މެމްބަރު އެފަދައިން ވިދާޅުވީ ފެނާ ނަރުދަމާގެ ޤާނޫނަށް އިސްލާޙު ގެނައުމުގެ ބިލު ހުށަހަޅުއްވަމުންނެވެ.
ބިލާ ގުޅޭގޮތުން ވާހަކަ ދައްކަވަމުން މެމްބަރު ވިދާޅުވީ، ރާއްޖޭގައި ދިރިއުޅޭ ހުރިހާ ރައްޔިތުންނަށް ސާފު ބޯފެނާއި، ނަރުދަމާ ފޯރުކޮށްދިނުމަކީ އެއިރަކު އޮންނަ ސަރުކާރަކުން ކުރަންޖެހޭ ކަމެއް ކަމަށާއި، ނަމަވެސް ނިމިދިޔަ ސަރުކާރުތަކުން އެކަންކަން ފުރިހަމަކޮށްދީފައިނުވާ ކަމަށެވެ.
އެހެންނަމަވެސް މި ހިނގަމުންދާ ސަރުކާރުގައި އެކަންކަން ފުރިހަމަ ކޮށްދޭނެ ކަމަށާއި، ރައީސް ޑރ މުޙައްމަދު މުއިއްޒު އެކަންކަން ރައްޔިތުންނަށް ފުރިހަމަ ކޮށްދެއްވާނެކަމަށްވެސް މެމްބަރު ވިދާޅުވިއެވެ.
މެމްބަރު ވިދާޅުވީ، ސަރުކާރުގެ ފަރާތުން މިފަދަ މުހިއްމު ބިލެއް ފޯރުކޮށްދިނުމުގެ މަޤްސަދަކީ ރައްޔިތުންނަށް ފޯރުކޮށްދޭންޖެހޭ އަސާސީ ޚިދުމަތްތައް ފޯރުކޮށްދިނުން ކަމަށެވެ. އަދި އެކަންކަން ކޮށްދިނުމުގައި މިއަދުގެ ސަރުކާރުން އެއްވެސް ވަރަކަށް ފަހަތަށް ނުޖެހޭނެކަމަށްވެސް މެމްބަރު ވިދާޅުވިއެވެ.
މީގެ އިތުރުން، 2027 ނިމުމުގެ ކުރިން ރާއްޖޭގެ ހުރިހާ ރަށެއްގައި ދިރިއުޅޭ އާންމު ރައްޔިތުންނަށް ބޭނުންވާ އެންމެ މުހިއްމު އަސާސީ ޚިދުމަތްތަށްކަމަށްވާ ފެނާއި ނަރުދަމާގެ ނިޒާމު ޤާއިމު ކޮށްދޭނެކަމަށްވެސް މެމްބަރު ވިދާޅުވިއެވެ. އަދި އެކަން ކޮށްދިނުމަށްޓަކައި މި ސަރުކާރުން ޑެޑްލައިންތަކެއް ކަނޑައަޅާފައިވާކަންވެސް މެމްބަރު ފާހަގަ ކުރެއްވިއެވެ.
މެމްބަރު ވިދާޅުވީ، ފެނާއި ނަރުދަމާގެ މަޝްރޫއުތައް ނިމިދިޔަ ސަރުކާރުތަކުންވެސް ފަށާފައިވާ ކަމަށާއި، ނަމަވެސް އެކަންކަން ނުނިމި ދިގުލައިގެން ދިއުމުގެ ސަބަބުން ރައްޔިތުންނަށް ބޮޑު މާޔޫސްކަމެއް ލިބިފައިވާ ކަމަށެވެ. އެކަންކަން މި ސަރުކާރުން ނިމުމަކަށް ގެންނާނެކަމަށްވެސް މެމްބަރު ވިދާޅުވިއެވެ.
މިހާރު ހުށަހެޅިފައިވާ ބިލުންވެސް މިކަންކަން އިތުރަށް ކަށަވަރުވެގެންދާނެކަމަށް މެމްބަރު ވިދާޅުވިއެވެ.
މީގެ އިތުރުން، މިދިޔަ ސަރުކާރުން މި މަސައްކަތްތައް ކުރިގޮތަށް ފާޑުވިދާޅުވެ މެމްބަރު ވިދާޅުވީ، ނިމިދިޔަ ސަރުކާރުން މަޝްރޫއުތައް ބަޖެޓުގައި ހިމެނި ގޮތުގެ ސަބަބުން ބަޖެޓަށް އޭގެ ދަތިތައް ކުރިމަތިވެގެން ދިޔަ ކަމަށެވެ. އަދި މަސައްކަތްތައްވެސް ނުނިމި ހުއްޓުމަކަށް އައިކަމަށް ވިދާޅުވިއެވެ.
ގާތްގަނޑަކަށް ތިރީހަކަށް މިލިއަން، ނޫނީ ފަނަރަ ވަރަކަށް އަށާރަ ވަރަކަށް މިލިއަނުން ކުރެވޭ މަސައްކަތް ކުރުމަށްޓަކައި ތިން ހަތަރު ލައްކަ ރުފިޔާ ބަޖެޓުގައި ޖަހައިގެން އޭގެން މަސައްކަތަކަށް ބޭނުންވާ ވަސީލަތްތަކާއި، އެއްވެސް ޚިދުމަތެއް ފޯރުކޮށްދެވޭނެ އެއްވެސް މަސައްކަތެއް ނުކޮށް، އެ ލާރިކޮޅު އެހެން ގޮތްގޮތަށް ބޭނުން ކުރެވިގެން ދިޔައީ
އެހެންކަމުން އެކަންކަމުގެ ޒިންމާ ނިމިދިޔަ ސަރުކާރުން ނަގަންޖެހޭނެކަމަށް މެމްބަރު ލަތީފް ވިދާޅުވިއެވެ. ވަކިން ޚާއްސަކޮށް ފައިސާ ޗާޕުކޮށް، ބޭރުގެ އެހީ ހޯދައި، އެތައް ފައިސާއެއް ލިބިފައިވާއިރު، ރައްޔިތުންނަށް ބޭނުންވާ ކަންކަން ފުދިފައިނެތުމަކީ ކަންބޮޑުވުމެއްކަމަށް މެމްބަރު ވިދާޅުވިއެވެ.
މެމްބަރު ވަނީ ރައީސް ވެވަޑައިގެންފައިވާ ވައުދުފުޅުތައް ފުއްދަވާނެކަމަށްވެސް ވިދާޅުވެފައެވެ.
