އެމްޑީޕީގެ ސަރުކާރުގައި ފަށާފައި ހުރި ފެނާއި ނަރުދަމާގެ މަޝްރޫއުތައް މި ސަރުކާރުގެ ވެރިކަމުގެ ފުރަތަމަ 2 އަހަރުގެ ތެރޭގައި ނުނިމެންވީ ކީއްވެތޯ ހިތަދޫ ހިތަދޫ ދެކުނު ދާއިރާގެ މެންބަރު އަދި އެމްޑީޕީގެ ޕާލަމެންޓްރީ ގުރޫޕްގެ ލީޑަރު އިބްރާހިމް ނާޒިލް ސުވާލު އުފައްދައިފިއެވެ.
ސަރުކާރުގެ ފަރާތުން ހުށަހަޅާފައިވާ ފެނާއި ނަރުދަމާގެ ޤާނޫނަށް އިސްލާޙު ގެނައުމުގެ ބިލުގެ ބަހުސް މަރުހަލާގައި ނާޒިލް ވިދާޅުވީ، މި ބިލު ހުށަހެޅުއްވިއިރު ސަރުކާރުގެ މެމްބަރު ބޮޑަށް ފާހަގަ ކުރީ ނިމިދިޔަ ސަރުކާރުގެ ވާހަކަ ކަމަށެވެ. އެހެންކަމުން ނިމިދިޔަ ސަރުކާރުތަކުގެ ވާހަކަ ދައްކާނަމަ، މިހާރުގެ ރައީސުލްޖުމްހޫރިއްޔާއަކީ އެތައް އަހަރެއް ވަންދެން ސަރުކާރުތަކުގައި އާރާއި ބާރުގައި ހުންނެވި ބޭފުޅެއް ކަމަށް ނާޒިލް ވިދާޅުވިއެވެ.
ވީއިރު އެކަންކަން ނުނިމި ހުރީ ކީއްވެތޯ ވިދާޅުވާން ޖެހޭނެކަމަށްވެސް ނާޒިލް ވިދާޅުވިއެވެ.
ހިނގާ ސަރުކާރުތަކަށް ބަލާލަމާ އިއްޒަތްތެރި ރައީސް، މިހާރުގެ ރައީސުލްޖުމްހޫރިއްޔާ، އެބޭފުޅާގެ ވަޒީރުކަމުގައި 2012 އިން 2023 އަށް ދެއަހަރު، 2013 އިން 2018 އަށް 5 އަހަރު، މިހާރު ވެރިކަމުގައި އަނެއްކާ 2 އަހަރު، ގާތްގަނޑަކަށް 10 ވަރަކަށް އަހަރު ބާރާއި އާރުގައި، ކޮންކަމެއްތޯ ކޮށްދެވުނީ، ވަރަށް ސާފު، ނެތް ކޮށްދެވުނު އެއްކަމެއްވެސް
މީގެ އިތުރުން، ނިމިދިޔަ އެމްޑީޕީގެ ސަރުކާރުގައި ފެނާއި ނަރުދަމާގެ މަސައްކަތް ނުފަށާ އެއް ރަށްވެސް ނޯންނާނެކަމަށް ނާޒިލް ވިދާޅުވިއެވެ. އަދި ވިދާޅުވީ، މި ހިނގާ 2 އަހަރުގެ ތެރޭގައި އެ މަޝްރޫއުތައް ނިންމާނުލެވުނީ ކީއްވެތޯ ސުވާލު އުފެދޭކަމަށެވެ.
2027 ގެ ނިޔަލަށް ކޮށްދޭނެ ވާހަކަ މިއޮތީ، ރައީސްގެ ވެރިކަން ނިމިދާނެ 2028 ގެ ނިޔަލަށް، އެހާ ހިސާބަށް ކޮށްދޭނެ ކަމުގެ ވާހަކަ މި ދައްކަނީ،
މެމްބަރު ވިދާޅުވީ، މިއީ ނާޤާބިލު ސަރުކާރެއް ކަމަށާއި، މި ސަރުކާރަށް ހަގީގަތުގައި އެއްވެސް ކަމެއް ކޮށްނުދެވޭނެކަމަށެވެ.
2027 ނިމުމުގެ ކުރިން ރާއްޖޭގެ ހުރިހާ ރަށެއްގައި ދިރިއުޅޭ އާންމު ރައްޔިތުންނަށް ބޭނުންވާ އެންމެ މުހިއްމު އަސާސީ ޚިދުމަތްތަށްކަމަށްވާ ފެނާއި ނަރުދަމާގެ ނިޒާމު ސަރުކާރުން ޤާއިމު ކޮށްދޭނެކަމަށް މި ބިލު ހުށަހެޅުއްވި މެމްބަރު ފާހަގަ ކުރައްވާފައިވެއެވެ.
