ރައީސް ޑރ. މުހައްމަދު މުއިއްޒުގެ ދަރިކަލުންނަށް ނިސްބަތްކޮށް އެމްޑީޕީގެ އިސް އެކްޓިވިސްޓެއްކަމަށްވާ މަރިޔަމް ޒުބެއިރު (މަންދީ) ދެއްކި ވާހަކަތަކާ ގުޅިގެން އުފުލި އަބުރުގެ ދައުވާގެ މައްސަލަ ސިވިލް ކޯޓުން ނުބެލޭނެކަމަށް ކަނޑައަޅައިދިނުމަށް އެދި ހައިކޯޓަށް ހުށަހަޅާފައިވާ މައްސަލަ ބޭރުކޮށްލައިފިއެވެ.
ހައިކޯޓަށް މި މައްސަލަ ހުށަހެޅީ އިދިކޮޅު މައި ޕާޓީ އެމްޑީޕީންނެވެ.
އެ މައްސަލަ ސިވިލް ކޯޓަށް ނުބެލެވޭނެކަމަށް ބުނެ އެމްޑީޕީގެ ފަރާތުން ސިވިލް ކޯޓަށް އިއުތިރާޒުތަކެއް ހުށަހެޅި ނަމަވެސް އެ ކޯޓުން ނިންމީ މައްސަލަ ކުރިއަށް ގެންދިއުމަށެވެ. އެހެންވެ އެމްޑީޕީގެ ފަރާތުން އެ ނިންމުން ހައިކޯޓުގައި އިސްތިއުނާފުކުރީއެވެ.
އެމްޑީޕީގެ ފަރާތުން މި މައްސަލަ ހުށަހެޅީ މިހިނގާ ޖުލައި މަހުގެ ފުރަތަމަ ދުވަހުއެވެ. އަދި ހައިކޯޓުން އޭރު މައްސަލަ ބަލައިގަތެވެ.
އެހެންނަމަވެސް މިހާރު މި މައްސަލަ ބޭރުކޮށްލާފައިމިވަނީ ކޯޓަށް ހާޒިރުވުމުގެ ޗިޓާ ހަވާލުވުމަށްފަހު، އެމްޑީޕީއާއި ފައްޔާޒު އަދި މަރިޔަމް ޒުބައިރުގެ ވަކީލުންގެ ގޮތުގައި ހަމަޖައްސާފައިވާ ބޭފުޅުން ކޯޓަށް ހާޒިރު ނުވާއިރު ކޯޓަށް ހާޒިރުނުވެވޭނެ މަގުބޫލު ސަބަބެއް ވެސް އަންގާފައި ނުވާތީއެވެ. މި ހާލަތުގައި މައްސަލަ ބާތިލްކުރުމުގެ އިހުތިޔާރު ފަނޑިޔާރުންނަށް ލިބިގެންވާ ކަމަށް ހައި ކޯޓުގެ ގަވާއިދުގެ 48ވަނަ މާއްދާގައި ބަޔާންކޮށްފައި އޮންނަކަމަށް ހައި ކޯޓުގައި މައްސަލަ ބެއްލެވި ތިން ފަނޑިޔާރުންގެ ތެރެއިން ފަނޑިޔާރު މުހައްމަދު ނިޔާޒް އާއި ފަނޑިޔާރު ހުސައިން މަޒީދުގެ ރައުޔުގައިވެއެވެ.
ހައިކޯޓުގައި ރައުޔު ތަފާތުވީ ހަމައެކަނި ފަނޑިޔާރު ދީބާނާޒް ފަހުމީއެވެ. އެގޮތުން މި މައްސަލާގައި އެމްޑީޕީން އިޖުރާއީ ހުށަހެޅުމެއް ހުށަހަޅާފައިވާތީ އެއާ މެދު ކޯޓުން ވަކި ގޮތެއް ނިންމަންދެން އިސްތިއުނާފީ އަޑުއެހުންތައް ފަސްކުރަން ވާނެ ކަމަށާއި، އެ ހުށަހެޅުމާ މެދު ގޮތެއް ނިންމުމަކާ ނުލައި، އިސްތިއުނާފްކުރާ ފަރާތްތަކުން ކޯޓަށް ހާޒިރުނުވުމުގެ މައްޗަށް އެކަނި ރިއާޔަތްކޮށް މައްސަލަ ބާތިލް ނުކުރެވޭނެކަމަށް ދީބާނާޒް ދެކިލައްވައެވެ.
މައްސަލަ ބެއްލެވި ފަނޑިޔާރުންގެ އަޣުލަބިއްޔަތާއެކު މި މައްސަލަ ބޭރުކޮށްލާފައިވާއިރު، މިފަދަ ހާލަތެއްގައި ކޯޓުން މައްސަލަ ބާތިލްކުރާތާ 15 ދުވަހުގެ ތެރޭގައި އަލުން މައްސަލަ ހުށަހެޅޭނެކަމަށް ހައިކޯޓުގެ ޤަވާއިދުގައިވެއެވެ.
އެމްޑީޕީން ބުނާ ގޮތުގައި އަބުރާބެހުމުގެ ސަބަބުން ލިބިފައިވާ ގެއްލުމުގެ ބަދަލު ނަގައިދިނުމުގެ ގަވާއިދު އޮންނަ ގޮތުން އެފަދަ މައްސަލައެއް ޝަރީއަތަށް ހުށަހެޅެނީ އަބުރަށް އުނިކަން އައި ފަރާތުންނެވެ. ނަމަވެސް މި މައްސަލަ ހުށަހެޅުއްވީ އުމައިރުގެ މަންމާފުޅު ސާޖިދާކަން ފާހަގަކޮށްފައިވެއެވެ.
އެހެންނަމަވެސް ސިވިލް ކޯޓުން ނިންމީ ކުޑަކުއްޖެއްގެ އަބުރު ނަގައިލި ކަމަށް ބުނާ މައްސަލަތަކުގައި ބެލެނިވެރިޔާއަށް މައްސަލަ ހުށަހެޅޭނެ ކަމަށެވެ.
ސިވިލް ކޯޓުން މިހާރު ވަނީ މަރިޔަމް ޒުބައިރު ދެއްކި ވާހަކަތަކުގެ ސަބަބުން އުމައިރުގެ އަބުރު ރައްކާތެރިވެގެންވުމުގެ ހައްގު ނިގުޅައިގެންދާކަން ސާބިތުވާ ކަމަށާއި، މަރިޔަމް ޒުބައިރުގެ އަތުން ގެއްލުމުގެ ބަދަލު ހޯދުމުގެ ހައްގު ސާޖިދާއަށް ލިބިވަޑައިގަންނަވާކަމަށް ނިންމާފައެވެ.
