ނ. ލަންދޫގެ ރައްޔިތުންނަށް ބޭނުންވާ އަސާސީ ޚިދުމަތްތަކާއި ތަރައްޤީގެ މަޝްރޫޢުތައް ވީ އެންމެ ރަނގަޅު ގޮތެއްގައި ފޯރުކޮށްދިނުމަށް ސަރުކާރުން މަސައްކަތް ކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. މިފަދައިން ވިދާޅުވެފައިވަނީ މިލަދުންމަޑުލު ދެކުނުބުރީގެ ރަށްތަކަށް ކުރައްވަމުން ގެންދަވާ ދަތުރުފުޅުގައި ލަންދޫއަށް ވަޑައިގެން ރައްޔިތުންނާ ބައްދަލުކުރެއްވި ބައްދަލުކުރެއްވުމުގައެވެ.
ޞިއްޙީ ޚިދުމަތްތައް ފުޅާކުރުން
ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް، ލަންދޫގެ ޞިއްޙީ މަރުކަޒުގެ ޚިދުމަތް 24 ގަޑިއިރު ލިބޭނެ އިންތިޒާމު ހަމަޖެއްސުމަށްޓަކައި މުވައްޒަފުން އިތުރުކުރުމުގެ މަސައްކަތް ކުރިއަށްދާކަން ފާހަގަކުރައްވައިފިއެވެ. މީގެ އިތުރުން ޞިއްޙީ ދާއިރާއަށް ބޭނުންވާ އެހެނިހެން ވަސީލަތްތައް ފުރިހަމަކުރުމަށް ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަޤީންކަންވެސް ދެއްވާފައިވެއެވެ.
ކުޅިވަރާއި މުނިފޫހިފިލުވުމުގެ ވަސީލަތްތައް
ކުޅިވަރާއި ފިޓްނަސްގެ ދާއިރާއިން ރަށަށް ބޭނުންވާ ތަރައްޤީގެ މަޝްރޫޢުތައް މިހާރުވެސް ކުރިއަށްދާއިރު، 2026 ވަނަ އަހަރުގެ ބަޖެޓުގައި ހޭންޑްބޯލް ކޯޓު ތަރައްޤީކުރުމުގެ މަޝްރޫޢު ހިމެނުމަށް ވަނީ ނިންމަވާފައެވެ. މިއީ ރާއްޖޭގެ ގިނަ ރަށްތަކަށް ބޭނުންވެފައިވާ ވަސީލަތެއްކަން ފާހަގަކުރައްވައި، މި މަޝްރޫޢަށް ޚާއްޞަ އިސްކަމެއް ދެއްވާނެކަމަށް ވިދާޅުވެފައިވެއެވެ.
ތިމާވެށި ހިމާޔަތްކުރުމާއި މޫދަށް އެރޭ ސަރަޙައްދު
ލަންދޫގެ ގިރާ ސަރަޙައްދު ހިމާޔަތްކުރުމާއި މޫދަށް އެރި އުޅުމަށް ޚާއްޞަ ސަރަޙައްދެއް ތަރައްޤީކުރުމުގެ މަސައްކަތް މިއަހަރުގެ ސެޕްޓެމްބަރު މަހާ ހިސާބުގައި އެއްބަސްވުމުގައި ސޮއިކުރެވި، ނޮވެމްބަރު ނުވަތަ ޑިސެމްބަރު މަހުގެ ތެރޭގައި ޢަމަލީ މަސައްކަތް ފެށިގެންދާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
ތަޢުލީމީ ދާއިރާގެ ތަރައްޤީ
ލަންދޫ ސްކޫލުގެ ތަރައްޤީއަށް ކުރަމުންދާ މަސައްކަތްތަކުގެ އިތުރުން، ސްކޫލަށް ބޭނުންވާ އިތުރު ވަސީލަތްތައް ފުރިހަމަކޮށްދިނުމަށް ސަރުކާރުން މަސައްކަތްކުރައްވާނެކަމަށް ވިދާޅުވެފައިވެއެވެ. ތަޢުލީމީ ދާއިރާއިން ރަށަށް ބޭނުންވާ ތަރައްޤީ ހާސިލުކޮށްދިނުމަށް ސަރުކާރުން ޚާއްޞަ ސަމާލުކަމެއް ދެއްވާނެކަމުގެ ޔަޤީންކަންވެސް ދެއްވާފައިވެއެވެ.
އަސާސީ ވަސީލަތްތަކުގެ ތަރައްޤީ
ލަންދޫގައި ޤާއިމުކުރާ އައިސް ޕްލާންޓުގެ މަސައްކަތް މިއަހަރުގެ ތެރޭގައި ނިންމާލެވޭނެކަމުގެ އުންމީދު އޮތްކަމަށް ރައީސުލްޖުމްހޫރިއްޔާ ވިދާޅުވެފައިވެއެވެ. އަދި ރަށުގެ ފެނުގެ ނިޒާމުގެ މަޝްރޫޢުވެސް ކުރިއަށް ގެންދެވޭނެކަމުގެ ޔަޤީންކަން ދެއްވާފައިވެއެވެ.
މި ހުރިހާ މަޝްރޫޢުތަކަކީވެސް ލަންދޫގެ ރައްޔިތުންގެ ދިރިއުޅުމުގެ ފެންވަރު މަތިކޮށް، ރަށުގެ ތަރައްޤީއަށް މަގުފަހިކޮށްދޭނެ މުހިންމު މަޝްރޫޢުތަކެކެވެ. ސަރުކާރުން މި މަޝްރޫޢުތަކަށް ދެއްވާ ސަމާލުކަމަކީ ރަށުގެ ދެމެހެއްޓެނިވި ތަރައްޤީއަށް އެޅިގެންދާނެ މުހިންމު ފިޔަވަޅުތަކެކެވެ.
