ސޯޝަލް ހައުސިންގެ މަޝްރޫރުތަކުން ދޫކޮށްފައިވާ ފްލެޓުތަކުގެ ތެރެއިން ދިގު މުއްދަތައް ބަހާލައިގެން އަގު ދައްކަން ދޫކޮށްފައިވާ ފްލެޓުތަކުގެ ކުލި ނުދެއްކުމުގެ ސަބަބުން އަހަރަކު 900 މިލިއަންގެ ގެއްލުން ދައުލަތަށް ވާ ކަމަށް ހައުސިންގ ޑޮވެލޮޕްމެންޓް ކޯޕަރޭޝަން (އެޗްޑީސީ) ބުނެފިއެވެ.
މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ”ސަންގުން“ ހުށައަޅާފައިވާ އާރްޓީއައިއަކަށް ޖަވާބުދީ އެޗްޑީސީން ބުނެފައިވަނީ ސޯޝަލް ހައުސިންގެ މަޝްރޫއުތަކުން ދޫކޮށްފައިވާ ފްލެޓްތަކުގެ ތެރެއިން ދިގުމުއްދަތައް ބަހާލައިގެން އަގު ދައްކަން ދޫކޮށްފައިވާ ފްލެޓްތަކުގެ އަދަދަކީ 8303 ކަމަށެވެ. އަދި އޭގެތެރެއިން 5614 ފްލެޓުގެ ކުލި ގަވައިދުން ނުދައްކާ ކަމަށް ރެކޯޑް ކުރެވިފައިވާ ކަމަށް އެޗްޑީސީން ވަނީ ބުނެފައެވެ. އެހެންކަމުން ގަވައިދުން ކުލި ދައްކާ ފުލެޓުގެ ތެރޭގައި ހިމެނޭނީ 2689 އެކެވެ.
ދޫކޮށްފައިވާ ފްލެޓްތަކުގެ ތެރެއިން އަގު ދައްކާ ނިންމުމަށްފަހު އަމިއްލަ ކޮށްފައިވާ ފްލެޓްތަކުގެ އަދަދަކީ 139 ކަމަށް އެޗްޑީސީން ވަނީ މައުލޫމާތު ދީފައެވެ. މިކަމުގެ ސަބަބުން ކޮންމެ އަހަރަކު ދައުލަތަށް ބޮޑު ގެއްލުމެއް ވާކަމަށް ވަނީ ރެކޯޑު ކުރެވިފައެވެ. އެޗްޑީސީން ދޫކޮށްފައިވާ މައުލޫމާތުތަކަކީ މިއަހަރުގެ 30 ޖޫންގެ ނިޔަލަށް ހުރި ތަފާސްހިސާބުތަކެވެ.
މިފަހުން ފެންމަތިވެގެން އައި ގޮތުން ގިނަ އަދަދެއްގެ ފްލެޓުތަކުގެ ވެރިން ގަވައިދުގެ މަތިން ކުލި ނުދައްކާއިރު ބައެއް ފަރާތްތަކުން މިހާތަނަށް އެންމެ ޕޭމަންޓެއްވެސް ހަދާފައިނުވެއެވެ. ނަމަވެސް އެ ހާލަތުގައި އަނބުރާ ފްލެތުތައް ނެގެން އޮންނައިރު އެޗްޑީސީން އެގޮތުގެ މަތިން އަމަލުކޮށްފައިނުވާކަން ފާހަގަކުރެވެއެވެ. ހުޅުމާލޭގައި ހުރި ފްލެޓުތަކުގެ ތެރެއިން ކުއްލި ނުދައްކާ ފްލެޓުތަކުގެ ވެރިންނަށް ނޯޓިސް ހަވާލުކުރުމުގެ މަސައްކަތްތައް ފައްޓާފައިވާކަމަށް އެޗްޑީސީން މީގެ ކުރިން ވަނީ ބުނެފައެވެ.
