ނ. އަތޮޅުގައި އޮންނަ ވިހަފަރު ފަޅުގައި އެއާޕޯޓެއް ތަރައްގީކޮށް، ސަރަހައްދުގެ ފަތުރުވެރިކަމަށް އިތުރު ކުރިއެރުމެއް ގެނެސްދިނުމަށް މަސައްކަތް ކުރެވޭނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ނ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން، މިރޭގެ ޖަލްސާ ކުރިޔަށް ގެންގޮސްފައި ވަނީ ހޮޅުދޫގައެވެ. ވެރިކަމަށް އައުމަށް ރައްޔިތުންނަށްވީ ވައުުދައް ހަނދާނަށް ގެންނަވައި ރައީސް ވިދާޅުވީ އެމަނިކުފާނު އަބަދުވެސް މަސައްކަތް ކުރައްވަނީ ރައްޔިތުންނާއި ވީހާވެސް ގާތުން މަސައްކަތް ކުރުމަށް ކަމަށެވެ.
ކޮންމެ ރަށަކަށް ވަޑައިގެން ވެސް ރަށުގެ ކައުންސިލާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިތުރުން ރައްޔިތުންނާއި ބައްދަލުކޮށް ބޭނުން ވަނީ ރައީސް ވިދާޅުވި ގޮތުގައި ދިމާވެފައިވާ އެކި މައްސަލަތައް ދެނެގަތުމެވެ. އަދި އެކަންކަން ހައްލު ކުރުމަށް ކުރެވޭ މަސައްކަތުގެ ތެރޭގައި ކޮންމެހެން ރަށަށް އެކި ގޮތްގޮތުން ބޭނުންވާ ހައްލުތައް ހިމެނޭކަމަށް ރައީސް ވިދާޅުވި އެވެ.
އޭގެ ތެރޭގައި މަގު ހެދުމުގެ މަސައްކަތުގެ ތެރެއިން، ވަށައި ރިންގ ރޯޑެއް ހެދުމުގެ މަސައްކަތް ރައީސް ފާހަގަކުރެއްވި އެވެ. އެކި ރަށްތަކަށް ދިމާވެފައިވާ އެންމެ ބޮޑެތި މައްސަލަތަކުގެ ތެރޭގައި ހިމެނޭ ބަނދަރުގެ ދަތިކަން ހޮޅުދޫއަށް ދިމާވެފައިވާތީ އެކަމަށް ރައީސް އަލިއަޅުއްވާލެއްވި އެވެ. އެހެންކަމުން މި އަހަރުގެ ތެރޭގައި ބަނދަރުގެ މަސައްކަތް ހިމެނޭ ގޮތަށް ބިން ހިއްކުމުގެ މަސައްކަތް ކުރިޔަށް ގެންދާނެކަމުގެ ޔަގީންކަން ރައްޔިތުންނަށް ރައީސް ދެއްވިއެވެ.
ރަށުގެ ސިއްހީ މަރުކަޒު ތަރައްގީކޮށް އަޕްގްރޭޑް ކުރުމުގެ މަސައްކަތާއި ގުޅޭގޮތުން ރައީސް ވިދާޅުވީ، ޖާގައިގެ ދަތިކަން ދިމާވެފައިވާތީ އެކްސްޕެންޝަން މަޝްރޫއުއެއް ކުރިޔަށް ގެންދަން ޖެހޭކަމަށެވެ. އެހެންކަމުން ލޭބަރ ރޫމް ހިމެނޭ ގޮތަށް މި އަހަރުގެ ތެރޭގައި އެ މަސައްކަތް ވެސް ފެށިގެންދާނެކަމަށް ރައީސް ވިދާޅުވި އެވެ.
އަތޮޅުގެ ސަރަހައްދަށް ގެންނަން ޖެހޭ ތަރައްގީއާއި ގުޅޭގޮތުން ރައީސް ވިދާޅުވީ މާފަރު އެއާޕޯޓު އިންޓަނޭޝަނަލް ފެންވަރަށް ތަރައްގީ ކުރެވެމުން އޭގެ ފައިދާ ހޮޅުދޫއަށް ވެސް ކުރާނެކަމަށެވެ. އަދި ހޮޅުދޫއާއި، ފޮއްދޫގެ އިތުރުން ވެލިދޫގެ ސަރަހައްދަށް އިތުރު އެއާޕޯޓެއް ބޭނުންވާކަމަށެވެ. ސަރުކާރުގެ ޕްލޭނަކީ ރައީސް ވިދާޅުވި ގޮތުގައި ވިހަފަރުގައި އިތުރު އެއާޕޯޓެއް ތަރައްގީ ކުރުމެވެ.
މި އެއާޕޯޓާއި އެކު ރަށުގެ ސަރަހައްދުގެ ފަތުރުވެރިކަމަށް އިތުރު ކުރިއެރުމެއް ލިބިގެންދާނެކަމަށް ރައީސް ވިދާޅުވި އެވެ.
ވިހަފަރު ފަޅުގައި އެއާޕޯޓެއް ތަރައްގީ ކުރުމުގެ މަސައްކަތް ކުރިޔަށް ގެންދާނެކަމަށް ރިޔާސީ އިންތިހާބުގެ ދުވަސްވަރު ވެސް ރައީސް ވިދާޅުވެފައި ވެއެވެ.
ވިހަފަރަކީ ވެލިދޫއާއި ވަރަށް ކައިރީގައި އޮންނަ ފިނޮޅެކެވެ. ރައީސް ވިދާޅުވީ މި އެއާޕޯޓުގެ މަސައްކަތް އަންނަ އަހަރުގެ ކުރީކޮޅު ފެށުމަށް އެމަނިކުފާނު ނިންމަވާފައިވާކަމަށެވެ. އަދި ވިދާޅުވީ ދުރު ރާސްތާއަށް ބަލާއިރު މިއީ އަތޮޅުގެ ތަރައްގީއަށް ނުހަނު ބޭނުންތެރި އެއާޕޯޓަކަށް ވެގެންދާނެކަމަށެވެ.
މީގެއިތުރުން ރައީސް ވަނީ ހޮޅުދޫގައި އިސްލާމިކް ސެންޓަރެއް ގާއިމު ކުރުމަށް ވެސް ވައުދުވެވަޑައިގެންފަ އެވެ. އަދި ސަރުކާރުގެ ސިޔާސަތުތަކުގެ ތެރޭގައި ހި،މެނޭ ފުލުހުންގެ މަރުކަޒުގެ މަސައްކަތް ބެޗްތަކަށް ބަހާލައިގެން ކުރިޔަށް ގެންދާއިރު އަންނަ އަހަރުގެ ތެރޭގައި އެ މަސައްކަތް ނިންމާލެވޭނެކަމަށް ރައީސް ވިދާޅުވި އެވެ.
