ރާއްޖެ ވަޑައިގަތުމުން މަރުހަބާ ދެންނެވުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަޑައިގަތުމަކީ ވަރަށް ބޮޑު އުފަލެއް ލިބިވަޑައިގެންނެވި ކަމެއް ކަމަށް އިންޑިއާގެ ބޮޑުވަޒީރު ނަރެންދުރާ މޯދީ ވިދާޅުވެއްޖެއެވެ.
އިނގިރޭސި ވިލާތަށް ކުރެއްވި ރަސްމީ ދަތުރުފުޅު ނިންމަވާލައްވާފައި ސީދާ ވެލާނާ އިންޓަނޭޝަނަލް އެއާޕޯޓަށް ވަޑައިގެންނެވި ބޮޑުވަޒީރު މޯދީއަށް ރައީސް މުއިއްޒު ވަނީ ރަތްދޫލައިގެ މަރުހަބާއެއް ދަންނަވާފައެވެ.
މިކަން ފާހަގަކުރައްވައި، ބޮޑުވަޒީރު މޯދީ ވަނީ އެމަނިކުފާނުގެ އޮފިޝަލް އެކައުންޓުގައި ދިވެހި ބަހުން ޕޯސްޓެއް ކުރައްވާފައެވެ. ”މާލެއަށް އާދެވިއްޖެ. އަޅުގަނޑަށް މަރުހަބާ ދެންނެވުމަށް ރައީސް މުއިއްޒު އެއާޕޯޓަށް ވަޑައިގެންނެވީތީ އުފާކުރަން،“ މޯދީ ވިދާޅުވިއެވެ. އަދި އިންޑިއާއާއި ރާއްޖޭގެ ގުޅުން ކުރިއަށް އޮތް ދުވަސްތަކުގައި އައު ހަރުފަތަކަށް އުފުލިގެންދާނެކަންވެސް އެމަނިކުފާނު ވަނީ ކަށަވަރުކުރައްވާފައެވެ.
ދިވެހިރާއްޖޭގެ މިނިވަންކަމަށް 60 އަހަރު ފުރުން ފާހަގަކުރުމުގެ މުނާސަބަތުގައި، ރައީސް ޑރ. މުހައްމަދު މުއިއްޒުގެ ދައުވަތުފުޅަކަށް ބޮޑުވަޒީރު މޯދީ ވަނީ ރާއްޖެއަށް ޒިޔާރަތްކުރައްވާފައެވެ. މިއީ ރައީސް މުއިއްޒު ވެރިކަމާ ހަވާލުވެވަޑައިގަތުމަށްފަހު ބޭރު ގައުމެއްގެ އިސްވެރިއަކު ރާއްޖެއަށް ކުރައްވާ ފުރަތަމަ ދަތުރުފުޅެވެ.
