ޒުވާނުންނަކީ ބަދަލު ގެނައުމުގެ އޭޖެންޓުން ކަމަށާއި، ސަރުކާރު ދެމި އޮންނާނީ ޒުވާނުންނާއެކު ކަމަށް ރައީސުލްޖުމްހޫރިއްޔާ ޑރ މުހައްއްމަދު މުއިއްޒު ވިދާޅުވެއްޖެއެވެ.
ބައިނަލްއަޤްވާމީ ޒުވާނުންގެ ދުވަހާ ގުޅިގެން ރައީސް މުޢިއްޒު އެކްސްގައި ހިއްސާކުރެއްވި މެސެޖެއްގައި ވިދާޅުވެފައިވަނީ، ޒުވާނުންނަކީ މުޖުތަމަޢުގެ ތަރައްޤީއަށް ބަދަލު ގެނައުމުގެ މުހިންމު ބައިވެރިން ކަމަށް ދެކޭ ސަރުކާރެއް ބިނާކުރުމަށް ކަށަވަރުކަން ދެއްވާ ކަމަށެވެ. އަދި ޒުވާނުންގެ ހުނަރުތައް ދިރުވައި، އެ ފަރާތްތަކުގެ ބައިވެރިވުން އިތުރުކުރާނެ ކަމަށްވެސް ވިދާޅުވިއެވެ.
މި މުނާސަބަތުގައި ރައީސް މުޢިއްޒު ވަނީ މުޖުތަމަޢުގެ ހުރިހާ ދާއިރާއަކުން ގުޅިގެން ޒުވާނުންގެ އަޑު އުފުލުމަށާއި، ނިންމުންތައް ނިންމުމުގެ ކޮންމެ ދާއިރާއެއްގައި އެ ފަރާތްތައް ހިމެނުމަށް ގޮވާލައްވާފައެވެ. މީގެ ތެރޭގައި ސީދާ މުޖުތަމަޢުތަކާއި، ރަށު އަދި އަތޮޅު ފެންވަރުގެ އިދާރާތަކާއި، އަދި ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލުކުރުމަށް އަމާޒުކޮށްފައިވާ ބައިނަލްއަޤްވާމީ މަންޞަތަކުގައި ޒުވާނުން ބައިވެރިކުރުން ހިމެނެއެވެ.
ރައީސް މުޢިއްޒު ވަނީ ޒިންމާދާރު މަޤާމުތަކުގައި ތިއްބެވި ފަރާތްތަކަށް އިލްތިމާސްކުރައްވައި، ޒުވާނުންގެ އުފެއްދުންތެރި ހުނަރުތައް ދިރުވައި، އެ ފަރާތްތަކުގެ މުސްތަޤްބަލު ބައްޓަންކުރުމަށް ބޭނުންވާ ވަސީލަތްތަކަށް ވާޞިލުވުމުގެ ފުރުޞަތު ހޯދައިދިނުމަށް ގޮވާލައްވާފައެވެ. މިކަމުގެ ސަބަބުން ޒުވާނުންނަށް ބާރުވެރިކަން ލިބި، މުޖުތަމަޢުގެ ތަރައްޤީއަށް އެހީތެރިވެދިނުމުގެ ފުރުޞަތު ލިބޭނެ ކަމަށް ރައީސް ފާހަގަކުރެއްވިއެވެ.
އެމަނިކުފާނުގެ ސަރުކާރުން ދެމިހުންނާނީ ޒުވާނުންނަކީ ބަދަލު ގެނައުމުގެ އޭޖެންޓުންގެ ގޮތުގައި ބަލައިގަނެ، ތަރައްޤީއަށް ކުރެވޭ ވިލަރެސްކުރެވިފައިވާ މަސައްކަތްތަކުގެ ތަފާތުތައް ފާހަގަކުރެވޭ، އަދި އޭގެ ނަތީޖާ އެންމެންނަށް ލިބޭ، ބައިވެރިވުމުގެ މާޙައުލެއް އުފެއްދުމުގައި ސާބިތުކަމާއެކު ކަމަށް ރައީސް މުޢިއްޒު ވިދާޅުވެފައިވެއެވެ.
