ޒަމާނަށް ފެތޭ ގޮތެއްގެ މަތިން ހައްޖު ކޯޕަރޭޝަންގެ ހިދުމަތްތައް ދިނުމަކީ ރައީސް ޑރ މުހައްމަދު މުއިއްޒުގެ މުހިންމު ވައުދުފުޅެއްކަމަށާއި އެހެންކަމުން އެ މުއައްސަސާ ތަރައްގީކުރުމަށާް މުހިންމު މަސައްކަތްތަކެއް ކުރަމުންދާކަމަށް އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
2025 ވަނަ އަހަރު ހައްޖަށް ގެންދިޔަ މީހުންގެ މައުލޫމާތު ހިއްސާކުރައްވައި މަޖިލީހަށް ޖަވާބުދާރީވެވަޑައިގަންނަވަމުން މިނިސްޓަރ ޝަހީމް ވިދާޅުވީ، ރާއްޖޭގެ ހައްޖު ކޯޕަރޭޝަނަކީ ރައްޔިތުންނަށް ހެޔޮ އަގުގައި އެ ހިދުމަތް ފޯރުކޮށްދިނުމުގެ ގޮތުން ސަރުކާރުން އުފެއްދި މުއައްސަސާއެއްކަމަށެވެ. އަދި ޒަމާނަށް ފެތޭ ގޮތެއްގެ މަތިން އެތަނުގެ ހިދުމަތްތައް ފޯރުކޮށްދިނުމަކީ ރައީސް ޑރ މުހައްމަދު މުއިއްޒުގެ މުހިންމު ވައުދުފުޅެއްކަމަށެވެ. އެހެންކަމުން އެ ވައުދާއި އެއްގޮތަށް ހިދުމަތްތައް ބައްޓަންކުރުމުގެ ގޮތުން އެ މުއައްސަސާ ތަރައްގީކުރުމަށްޓަކައި މުހިންމު މަސައްކަތްތަކެއް ކުރެވެމުންދާކަމަށް ހިއްސާކުރެއްވިއެވެ.
މިނިސްޓަރ ވިދާޅުވީ، އެ ކޯޕަރޭޝަން އުފެދިގެން އައި ދުވަސްވަރަކީ އަމިއްލަ ޖަމާއަތްތަކުން ހައްޖާއި އުމްރާގެ ހިދުމަތްތައް ފޯރުކޮށްދެމުން އައި ދުވަސްވަރެއްކަމަށެވެ. އަދި އެ ޖަމާއަތްތަކުން މުޖުތަމައަށް ކޮށްދީފައިވާ ހިދުމަތްތަކުގެ އަގު ވަޒަންކޮށް ޝުކުރު ދަންނަވާކަމަށާއި ކޯޕަރޭޝަން ވުޖޫދުވެގެން އައީ ބައެއް ޖަމާއަތްތަކުން މީހުންގެ އަތުން ފައިސާ ނަގުމަށްފަހު ގެންދިއުމުގައި ވީ އިހުމާލުތަކަށް ހައްލެއް ހޯދުމުގެ ގޮތުންކަމަށެވެ.
ޝަހީމް ވިދާޅުވީ، ހައްޖުގެ އަޅުކަމަކީ އިސްލާމް ދީނުގައި އަޅުކަމުގެ މަތިވެރި ރުކުންތަކުގެ ތެރެއިން އެއް ރުކުންކަމަށެވެ. އަދި އެ ރުކުންވަނީ މުސްލިމް އިންސާނާގެ ކުޅަދާނަކަމާއި ގުޅިފައިކަމަށާއި އެއީ މާލީ ކުޅަދާނަކަމާއި ޖިސްމާނީ ކުޅަދާނަކަމުގެ އިތުރުން ދަތުރުފަތުރުގެ އަމާންކަމުގެ މައްޗަށް ތަރުތީބުވެގެން އަންނަ ކަމެއް ކަމަށެވެ.
މިނިސްޓަރ ވިދާޅުވީ، ހެޔޮ ސިއްހަތެއްގައިވާ މީހާއަށް އެންމެ މުހިންމީ މާލީ ކުޅަދާނަކަން ކަމަށާއި އެއީ މިޒަމާނުގައިހުރި ވަސީލަތްތަކުގެ ތެރެއިން ހޯދޭނެ ކަމެއް ކަމަށެވެ. އެހެންކަމުން ނިކަމެތި މީހާއަށްވެސް އެކަން ހާސިލުކޮށްދެވިދާނެކަމަށެވެ. އަދި އެންމެ ކުޑަމިނުން އެކަން ހާސިލުކޮށްދިނުމަށްޓަކައި ކުރެވިދާނެކަމަކީ އެމީހެއްގެ ނަމުގައި އެ ފައިސާ އިންވެސްޓުކޮށްދިނުންކަމަށެވެ.
މޯލްޑިވްސް ހައްޖު ކޯޕަރޭޝަނަކީ ހައްޖު ޖަމާއަތެއް ނޫންކަމަށްވެސް ހިއްސާޚުރެއްވިއެވެ. އަދި އެއީ ރަނގަޅު ފެންވަރެއްގައި ލުއިފަސޭހަކަމާއިއެކު ރައްޔިތުންނަށް ހައްޖުގެ އަޅުކަން އަދާކުރުމަށްޓަކައި އެންމެހާ ވަސީލަތްތަކާއިއެކު ފޯރުކޯށްދޭ މުއައްސަސާއެއްކަމަށެވެ. މިނިސްޓަރ ވިދާޅުވީ، ހައްޖަށް ދިއުމަށްޓަކައި ފައިސާ އެއްކުރުމަށްފަހު ހަވާލުކުރުމުން އަމާނާތްތެރިކަމާއިއެކު ބަލަހައްޓައިދީ ޝަރީއާ ހުއްދަކުރާ އުސޫލުން އިންވެސްޓުކޮށް ހައްޖަށް ދިއުމުގެ ގަސްތުގައިހުރި މީހާގެ މައްޗަށް އިންވެސްޓުމެންޓުން ލިބޭ ފައިދާ ހަރަދުކުރުމަކީވެސް މުއައްސަސާގެ މަސައްކަތެއް ކަމަށެވެ.
