1445 ވަނަ އަހަރު ހައްޖަށް ދިއުމަށް ރެޖިސްޓްރީކުރި 850 މީހުންނަށް 1446 ވަނަ އަހަރުގެ ކޯޓާއިން ޖާގަ ދިން ކަމަށް އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މަޖިލީހުގެ ތަޅުމުގައި ވާހަކަދައްކަވަމުން މިނިސްޓަރ ޝަހީމް ވިދާޅުވީ، ރައްޔިތުން ހައްޖަށް ފޮނުވުމުގެ ކަންކަން ހަރުދަނާކުރުމުގެ ގޮތުން ރައީސް ޑރ މުހައްމަދު މުއިއްޒުވަނީ އުސޫލުތަކެއް ކަނޑައަޅުއްވާފައިކަމަށެވެ. މިގޮތުން އެއް އުސޫލަކީ އަލަށް ހައްޖަށް ވަޑައިގަންނަވާ ފަރާތްތަކަށް އިސްކަން ދިނުންކަމަށާއި ކޮންމެ ފަސް އަހަރަކުން ނޫނީ ތަކުރާރުކޮށް ހައްޖަށް ނުދެވޭ ގޮތް ހެދުންވެސް ހިމެނޭކަމަށެވެ.
މިނިސްޓަރ ވިދާޅުވީ، އެމަނިކުފާނުވަނީ އުމުރުން 65 އަހަރުން މަތީ މީހުންނަށް އަހަރުގެ ކޯޓާއިން ވަކި އިންސައްތައެއް ކަނޑައަޅުވާފައިކަމަށާއި ނަމަވެސް ހައްޖުގެ އާމިލުންނާއި ހިދުމަތްތެރިންނާއި ސިއްހީ މާހިރުން އިސްތިސްނާވެގެންދާކަމަށެވެ. އަދި މި ބަދަލުތައް ގެންނެވީ އިސްލާމީ ދުނިޔޭގައި ކަންކަން ކުރަމުންދާ ގޮތް ބައްލަވައި ދިރާސާކުރެއްވުމަށްފަހުކަމަށް މައުލޫމާތު ދެއްވިއެވެ.
މި ބަދަލުތަކުގެ ސަބަބުން ކިއު ތަރުތީބުކުރުމުގައި އުމުރުން އެންމެ ދުވަސްވީ މީހުންނާއި އަލަށް ހައްޖަށްދާ މީޙުންނަށް އަބަދުވެސް އިސްކަމެއް ދެވިގެންދާނެކަމަށް ވިދާޅުވިއެވެ. މިނިސްޓަރ ވިދާޅުވީ، ރާއްޖޭގެ ރައްޔިތުން ހައްޖަށް ދިއުމަށްޓަކައި ސައުދީ ސަރުކާރުން ކޮންމެ އަަހަރަކަށް ދެމުން އަންނަ ކޯޓާއަކީ 1000 ޖާގަ ކަމަށެވެ. ނަމަވެސް ހައްޖަށް ދިއުމަށްޓަކައި ހައްޖު ކޯޕަރޭޝަނަށް ފައިސާ ދައްކައި ވެއިޓްލިސްޓުކުރާ މީހުންގެ އަދަދުތައްދަނީ އަހަރަކުން އަހަރަކަށް އިތުރުވަމުންކަމަށާއި ކޮވިޑް 19ގެ ބަލިމަޑުކަމުގެ ސަބަބުން 2020 ވަނަ އަހަރާއި 2021 ވަނަ އަހަރުގައި އެއްވެސް ގައުމަކަށް މީހުން ހައްޖަށް ގެންދިއުމުގެ ހުއްދަ ލިބިގެން ނުދާކަމަށެވެ.
މިނިސްޓަރ ވިދާޅުވީ، 2022 ގައި ފުރުސަތު ހުޅުވާލިއިރު ލިބުނީ މަދު ޖާގަތަކެއް ކަމަށެވެ. މިގޮތުން ރާއްޖެއަށް 483 މީހުންގެ ޖާގައެއް ލިބުނުކަމަށާއި އެހެންކަމުން ކޮވިޑްގެ ސަބަބުން ތިން އަހަރު ދުވަހުގެ ތެރޭގައި 3000 ވަރަކަށް މީހުންނަށް ހައްޖަށް ނުދެވި ދިޔަކަމަށެވެ. 1445 ވަނަ އަހަރު ހައްޖަށް ދިއުމަށް ރަޖިސްޓްރީކޮށްފައިވާ 850 ހައްޖުވެރިންނަށް 1446 ވަނަ އަހަރުގެ ހައްޖު ކިއުގެ ތެރެއިން ޖާގަ ދިންކަމަށެވެ. އަދި އުުމުރުން 75 އަހަރުން މަތީ ބޭފުޅުންނަށް އެކަނި ދަތުރުނުކުރެވޭނެކަމަށާްވުމުން އެ އަހަރުގެ ކިއުއިން ޖާގަ ދިން 44 މީހުންނަށް އެހީތެރިން ގެންދިއުމުގެ ފުރުސަތު ލިބުނުކަމަށެވެ. ރައީސް ޑރ މުއިއްޒުގެ ވައުދުފުޅުގެ ދަށުން ސަރުކާރުގެ ހަރަދުގައި ހައްޖަށް ފޮނުވުުމުގެ ގޮތުން ފަގީރުންނަށް 50 ޖާގަ ހަމަޖެއްސިކަމަށްވެސް ހިއްސާކުރެއްވިއެވެ. ބާކީ 100 ޖާގަ ދޫކުރެވިފައިވަނީ ބަލި މީހުންގެ އެހީތެރިންނާއި ބޮޑެތި ބަލިތައް ތަހައްމަލުކުރަމުންދާ މީހުންގެ އިތުރުން އަވަސް ފުރުސަތެއްގައި ޖާގަ ނުލިބިއްޖެ ހާލަތެއްގައި އެމީހެއްގެ އުމުރުގައި އަޅުކަން އަދާކުރުމުގެ އުންމީދު ކުޑަވުމުގެ ސަބަބުން ފުރުސަތު އަވަސްކޮށްދިނުމަށް އެދިފައިވާ މީހުންފަދަ ހާއްސަ ހާލަތްތަކުގައިވާ މީހުންނަށް ކަމަށެވެ.
