ހައްޖު ކޯޓާ ދިނުމުގައި އަމަލު ކުރަނީ އިންސާފުވެރިކަމާއެކު، އޮންނަ ގަވާއިދުތަކުގެ ތެރެއިންކަމަށް އިސްލާމިކް މިނިސްޓަރ ޑރ އަލީ ޝަހީމް ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހަށް މިނިސްޓަރު ޑރ ޝަހީމް ހާޒިރުކުރުމުން ހަނިމާދޫ ދާއިރާގެ މެންބަރު އަބްދުލްޢަފޫރު މޫސާ ސުވާލުކުރެއްވީ، ހައްޖަށް މީހުން ފޮނުވުމަށް އެކުލަވާލާފައި އޮންނަ ލިސްޓު އޮޅުވާލާކަމުގެ ޝަކުވާ ލިބޭކަމަށް ފާހަގަކޮށް އެކަމާއި ގުޅިގެންނެވެ. އަދި ހައްޖު ކޯޕަރޭޝަން ހިންގުމަށް ސަރުކާރުން އެކަށީގެންވާ ފައިސާ ދޭކަމަށް ފާހަގަކޮށް، އެހެން ކަން އޮއްވާ ހައްޖު ކޯޕަރޭޝަނުން ފަތުރުވެރިކަމުގެ ވިޔަފާރިއަށް ވަންނަން ޖެހެނީ ކީއްވެގެންތޯ ޢަފޫރު ސުވާލު ކުރެއްވިއެވެ.
ޑރ ޝަހީމް ވިދާޅުވީ ކޯޓާއާއި ގުޅޭ ގޮތުން ދެކެވޭ ހުރިހާ ވާހަކައަކީ ހަގީގަތާއި އެއްގޮތަށް ދެކެވޭ ވާހަކަތަކެއް ނޫންކަމަށެވެ. މިއީ ވަރަށް އިންސާފުވެރިކަމާއެކު، ކަނޑައެޅިފައި އޮންނަ ގަވާއިދުތަކުގެ ތެރެއިން ހަވާލުކުރެވޭ ކޯޓާއެއްކަމަށް ޑރ ޝަހީމް ވިދާޅުވިއެވެ.
އެހެންކަމުން އެއާއި ގުޅޭ ގޮތުން ދެކެވޭ ވާހަކަތަކަކީ އެންމެ ރަނގަޅު ވާހަކަތަކެއްކަމަށް އަޅުގަނޑު ނުދެކެން.
ޑރ ޝަހީމް ވިދާޅުވިއެވެ.
ހައްޖު ކޯޕަރޭޝަނުން ފަތުރުވެރިކަމުގެ ވިޔަފާރިއަށް ވަންނަން ޖެހެނީ ކީއްވެގެންތޯ ކުރި ސުވާލަށް ޑރ ޝަހީމް ޖަވާބެއް ނުދެއްވައެވެ. އެއީ މިއަދުގެ މައުޟޫއަށް ނުވާތީކަމަށް ވިދާޅުވިއެވެ. ނަމަވެސް ވަކިން ހާއްސަކޮށް އެ ސުވާލު ފޮނުވައިފިކަމަށްވާނަމަ ހަމަ އެ ސުވާލަށް ޖަވާބުދެއްވުމަށްވެސް މަޖިލީހަށް ވަޑައިގަންނަވާނެކަމަށް ފާހަގަކުރެއްވިއެވެ.
މީގެ އިތުރުން ޝަހީމް ވިދާޅުވީ ރައީސުލްޖުމްހުރިއްޔާ ޑރ މުހައްމަދު މުއިއްޒުގެ ސަރުކާރުން ހައްޖުގެ ހިދުމަތަށް އިންގިލާބީ ބަދަލުތަކެއް ގެންނަވާފައިވާކަމަށެވެ. މިއީ ރާއްޖެއާއި ސައުދީ އަރަބިއްޔާއާއި އޮންނަ ގުޅުމުގެ ތެރެއިން ރައްޔިތުންގެ ފަސޭހައަށް ވެގެން ދިޔަކަމެއްކަމަށް ވިދާޅުވިއެވެ. އަދި ޑރ ޝަހީމް ވަނީ އެގޮތަށް ލިބުނު ކުރިއެރުންތައް ފާހަގަކުރައްވާފައެވެ. ދަތުރުފަތުރުގެ އަވަސްކަންވެސް ފާހަގަކުރެއްވިއެވެ.
