ލާމަރުކަޒީ ގާނޫނަށް ގެނައި އިސްލާހު ރައީސުލްޖުމްހޫރިއްޔާ ތަސްދީގު ކުރައްވައިފިނަމަ އެ އިސްލާޙު ބާތިލު ކުރުމަށް އެމްޑީޕީން މައްސަލަ ކޯޓަށް ހުށަހަޅަން ނިންމައިފިއެވެ.
ސަންގަށް މައުލޫމާތު ދެއްވަމުން އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވީ، ލާމަރުކަޒީ ގާނޫނަށް ގެނައި އިސްލާހުތަކަކީ ގާނޫނުއަސާސީ ހިލާފު އިސްލާހުތަކެއްކަމަށް އެމްޑީޕީން ޤަބޫލު ކުރާ ކަމަށެވެ. އަދި އެ އިސްލާޙު ރައީސް ތަސްދީޤު ކުރައްވައިފިނަމަ އެމްޑީޕީން އެ މައްސަލަ ކޯޓަށް ވައްދާނެކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ، ރައީސް ޑރ މުޙައްމަދު މުއިއްޒު އެފަދަ ގޯހެއް ނުހައްދަވާނެކަމަށް އުއްމީދު ކުރައްވާކަމަށެވެ.
ފައްޔާޒް ވަނީ އެ ޙާލަތު އައިސްފިނަމަ، އެމްޑީޕީން އެ މައްސަލަ ކޯޓަށް ވައްދާއިރު، ކައުންސިލުތަކުން އެ މައްސަލައަށް ތަދައްހުލުވުމަށްވެސް އެދިވަޑައިގެންފައެވެ.
މި އިސްލާހު ރައްޔިތުންގެ މަޖިލީހަށް ހުށަހެޅުނު ހިސާބުން ފެށިގެންވެސް އެމްޑީޕީއައީ ސަރުކާރުގެ ހުށަހެޅުމަށް ދެކޮޅު ހަދަމުންނެވެ. އެގޮތުން އެމްޑީޕީގެ މެމްބަރުން ވިދާޅުވާ ގޮތުގައި މިއީ ރައްޔިތުންގެ މަންދޫބުންނަށް ލިބިފައިވާ ބާރުވެރިކަން، ވެރިކަމުގެ ބާރުގެ ތެރެއަށް ގެނައުމަށްޓަކައި ގެނެސްފައިވާ އިސްލާޙެކެވެ.
އެމްޑީޕީ މެމްބަރުން ވަނީ މި އިސްލާހާއި ދެކޮޅަށް ވޯޓުވެސް ދެއްވާފައެވެ. އަދި ރާއްޖޭގެ ހުރިހާ އަތޮޅުތަކެއް ހިމެނޭހެން ގިނަ ކައުންސިލްތަކުންވެސް ބަޔާންތައް ނެރެފައިވަނީ މީގެ ހިތި ނަތީޖާއާއި ކުރިޔަށް އޮތް ތަނުގައި ކުރިމަތިލާން ޖެހޭނެތީކަމަށް އެމްޑީޕީގެ މެމްބަރުން ފާހަގަ ކުރައްވާފައިވެއެވެ.
ލޯކަލް ކައުންސިލް ޤާނޫނަށް ހުށަހެޅިފައިވާ މި އިޞްލާޙުތަކުގެ މައިގަނޑު މަޤްޞަދަކީ ލާމަރުކަޒީ ނިޒާމު ހިންގުމުގައި ހުރި ގޮންޖެހުންތަކަށް ޙައްލެއް ހޯދުމެވެ. ޚާއްޞަކޮށް މާލީ އަދި އިދާރީ ގޮތުން ކައުންސިލްތައް ޒިންމާދާރުކުރުވުމާއި، އެލް.ޖީ.އޭ އަދި މިނިސްޓްރީ އޮފް ފިނޭންސްގެ ބެލެހެއްޓުން އިތުރުކުރުމުން، ކައުންސިލްތަކުގެ މަސައްކަތްތައް އިތުރަށް ހަރުދަނާވެ، ރައްޔިތުންނަށް ފޯރުކޮށްދެވޭ ޚިދުމަތްތަކުގެ ފެންވަރު ރަނގަޅުވެގެންދާނެ ކަމަށް އުންމީދުކުރެވޭކަމަށް ސަރުކާރުން ފާހަގަކުރެއެވެ.
