ސަރުކާރުން އަބަސުވެސް މަސައްކަތް ކުރަނީ، ރައްޔިތުންގެ އަޑުއަހައި ކަންކަން ހައްލު ކުރުމަށްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ގޮއިދޫއަށް ވަޑައިގެން ރައީސް މުއިއްޒު ވިދާޅުވީ 2023 ވަނަ އަހަރުގެ ރިޔާސީ އިންތިހާބުގެ ކެމްޕެއިނުގެ ތެރޭގައި އެމަނިކުފާނު އެކި ރަށްތަކަށް ވަޑައިގެން ރަށުގެ ރައްޔިތުންނާއި ބައްދަލު ކުރައްވައި ކަންބޮޑުވުންތައް އޮޅުންފިލުއްވި ކަމަށެވެ. އެއަށް ފަހު ރިޔާސީ ވައުދު ފޮތުގައި އެކަންކަން ހިމަނައި، ހައްލު ކުރުމުގެ އަމާޒުގައި މަސައްކަތް ފެށި އިރު އެގޮތުން ގޮއިދޫގެ ތަރައްގީއަށް 12 ކަމެއް ހިމަނުއްވާފައިވާކަމަށް ރައީސް ވިދާޅުވި އެވެ.
އެގޮތުން ގޮއިދޫގައި ސީޕްލޭންގެ ހިދުމަތް ފެށުމާއި، އޭޓީއެމްގެ ހިދުމަތުގެ އިތުރުން އުމްރާނީ ތަރައްގީއާއި ގުޅުން ހުރި މަސައްކަތްތައް ރައީސް ފާހަގަކުރެއްވި އެވެ. ކޮންމެ ރަށެއްގެ ތައުލީމާއި، ސިއްހީ ނިޒާމަށް ގެނައުމަށް ނިންމާފައިވާ އަޕްގްރޭޑުތަކާއި ގުޅޭގޮތުން ރައީސް ވިދާޅުވީ އެކަމުގެ އަމަލީ މަސައްކަތް ވަރަށް އަވަހަށް ފެށިގެންދާނެ ކަމަށެވެ. އެގޮތުން ރަށުގައި އައު ހެލްތް ސެންޓަރެއް މި އަހަރުގެ ތެރޭގައި ފެށޭވަރުވާނެކަމަށް ރައީސް ވިދާޅުވި އެވެ.
ގޮއިދޫއަކީ ވެސް ކަރަންޓުގެ މައްސަލަ ދިމާވެފައިވާ ރަށެއްކަމަށްވުމާއި އެކު، މުޅި މައްސަލަ އެއްކޮށް ހައްލު ކުރެވޭނެ ވަށާޖެހޭ މަޝްރޫއެއް މި އަހަރުގެ ތެރޭގައި ފެށިގެންދާނެކަމަށް ރައީސް ވިދާޅުވި އެވެ.
ރައީސް ވިދާޅުވީ ސަރުކާރުން މަސައްކަތް ކުރަން ޖެހިފައި ވަނީ، އިގްތިސާދު މެނޭޖު ކުރުމަށް ފިޔަވަޅު އަޅައިގެން ކަމަށެވެ. އެހެން ނަމަވެސް އެއީ އޮތް ބަހަނާއެއްކަމަށް ދައްކައި، ރައްޔިތުން ބާކީކޮށް ދޫކޮށް ނުލާނެކަމަށް ރައީސް ވިދާޅުވި އެވެ.
މީގެއިތުުރުން ރައީސް ވިދާޅުވީ އެމަނިކުފާނު ވައުދުވެފައިވާ ގޮތަށް، ރަށުގެ ފަޅުތެރޭގައި ރިސޯޓެއް ތަރައްގީ ކުރުމަށްވެފައިވާ ވައުދުގެ ފުރަތަމަ މަރުހަލާ ނިމިފައިވާކަން ހާމަކުރައްވާފަ އެވެ. އަދި ވިދާޅުވީ މި އަހަރުގެ ތެރޭގައި ގޮއިދޫގެ ރިސޯޓު ތަރައްގީ ކުރުމުގެ އަމަލީ މަސައްކަތް ފެށިގެންދާނެކަމަށެވެ.
ރައީސް ވިދާޅުވީ ކުރިޔަށް އޮތް ތަނުގައި ވެސް، އެމަނިކުފާނު މަސައްކަތް ކުރައްވާނީ ރައްޔިތުންގެ އަޑުއަހައި ތަރައްގީ ގެނައުމަށް ކަމަށެވެ.
