2025 ވަނަ އަހަރުގެ ޖޫން މަހާ އަޅާބަލާއިރު، ޖުލައި މަހު ޑެންގީހުމާއި ބޭރަށްހިންގުން ޖެހިގެން ރިޕޯޓުކޮށްފައިވާ މީހުން އަދަދު އިތުރުވެފައިކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ހާމަކޮށްފިއެވެ.
އެޗްޕީއޭގެ ތަފާސްހިސާބުތައް
ޑެންގީހުން
އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު، 2025 ވަނަ އަހަރުގެ ޖޫން މަހުގެ ތެރޭގައި، ރިޕޯޓުކޮށްފައިވާ ޑެންގީހުމުގެ 168 ކޭސް ވަނީ ރިޕޯޓުކޮށްފައެވެ. އަދި، މި އަހަރުގެ ޖުލައި މަހުގެ ތެރޭގައި، 188 ޑެންގީ ހުމުގެ ކޭސް ވަނީ ރިޕޯޓުކުރެވިފައެވެ. އެހެންކަމުން، މި އަހަރުގެ ޖޫން މަހުގައި ރިޕޯޓުކުރެވުނު އަދަދާއި، ޖުލައި މަހުގެ ތެރޭގައި ރިޕޯޓުކުރެވުނު އަދަދާއި އަޅާބަލާއިރު، 11.9 އިންސައްތަ ވަނީ އިތުރުވެފައެވެ.
އަރިދަފުސް ރޯގާ
އެޗްޕީއޭގެ ތަފާސް ހިސާބުތަކުން ދައްކާގޮތުގައި، އެޗްޕީއޭއަށް ރިޕޯޓުކުރެވިފައިވާ އަރިދަފުސް ރޯގާގެ ކޭސްތައް، މި އަހަރުގެ ޖޫން މަހުގެ ތެރޭގައި، 33،156 އަށް ވަނީ އަރައިފައެވެ. އަދި، މި އަހަރުގެ ޖުލައި މަހުގެ ތެރޭގައި، 30،705 އަރިދަފުސް ރޯގާގެ ކޭސް ވަނީ ރިޕޯޓުކޮށްފައެވެ. މިއީ، ޖޫން މަހުގެ ތެރޭގައި ރިޕޯޓުކުރެވިފައިވާ އަދަދާއި އަޅާބަލާއިރު، 7.98 އިންސައްތައިގެ ދަށްވުމެކެވެ.
މީގެއިތުރުން، އަރިދަފުސް ރޯގާގެ ދަށުން، އިންފްލުއެންޒާ ބަލީގެ އަލާމާތްތައް ފެނިގެން، އެ ބައްޔަށް 2025 ޖޫން މަހުގެ ތެރޭގައި ޓެސްޓުކުރެވުނު އަދަދަކީ، 608 އެވެ. އެގޮތުން، ޖޫން މަހުގެ ތެރޭގައި، އިންފްލުއެންޒާއަށް ޓެސްޓުކުރެވުނު ޖުމްލަ އަދަދުގެ ތެރެއިން، 185 ސާމްޕަލް ވަނީ ޕޮޒިޓިވްވެފައެވެ. 2025 ވަނަ އަހަރުގެ ޖުލައި މަހުގެ ތެރޭގައި، އިންފްލުއެންޒާ ބަލީގެ އަލާމާތްތައް ފެނިގެން، ޓެސްޓުކުރެވުނު މީހުންގެ އަދަދަކީ، 579އެވެ. އަދި، މި އަދަދުގެ ތެރެއިން ޕޮސިޓިވްވި ސާމްޕަލްގެ އަދަދަކީ، 314އެވެ. އެހެންކަމުން، މި އަދަދަކީ، މި އަހަރުގެ ޖޫން މަހުގެ ތެރޭގައި އިންފްލުއެންޒާއަށް، ޕޮޒިޓިވްވި މީހުންގެ އަދަދާއި އަޅާބަލާއިރު، 69.7 އިންސައްތައިގެ އިތުރުވުމެކެވެ.
ބޭރަށް ހިންގުމާއި ހޮޑުލުން
ހަމައެއާއިއެކު، 2025 ވަނަ އަހަރުގެ ޖޫން މަހުގެ ތެރޭގައި، އެޗްޕީއޭއަށް ރިޕޯޓުކޮށްފައިވާ، ހޮޑުލުމާއި ބޭރަށް ހިންގުމުގެ ކޭސްތަކުގެ އަދަދަކީ، 3946އެވެ. އަދި، މި އަހަރުގެ ޖުލައި މަހުގެ ތެރޭގައި، މި ބަލީގެ 5528 ކޭސް ވަނީ ރިޕޯޓުކުރެވިފައެވެ. މިއީ، މި އަހަރުގެ ޖޫން މަހުގައި އެޗްޕީއޭއަށް ރިޕޯޓުކޮށްފައިވާ ހޮޑުލުމާއި ބޭރަށް ހިންގުމުގެ ކޭސްތަކުގެ އަދަދާއި އަޅާބަލާއިރު، 8.28 އިންސައްތައިގެ އިތުރުވުމެކެވެ.
