ބ. ފެހެންދޫއަށް ދިމާވެފައިވާ ޓީޗަރުންގެ މައްސަލަ ހައްލުކޮށް، ރަށުގެ އެކި ފަރާތްތަކަށް ވެސް ބޭނުންވާ ތަމްރީނާއި އެހީތެރިކަން ފޯރުކޮށްދެއްވާނެކަމަށް ރައީިސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ފެހެންދޫއަށް ވަޑައިގެން ރައީސް މުއިއްޒު ވިދާޅުވީ އެމަނިކުފާނު ރައްޔިތުން ގާތަށް ދަތުރު ކުރައްވައި ބައްދަލުވުންތައް ކުރިޔަށް ގެންދަވަނީ ރިޔާސީ އިންތިހާބުގައި ވެވަޑައިގެންފައިވާ ވައުދުތައް ފުރިހަމަކޮށްދެއްވާނެކަމުގެ ޔަގީންކަން ދެއްވުމަށް ކަމަށެވެ.
ފެހެންދޫއަށް ދިމާވެފައިވާ އެކި ދަތިތަކުގެ ތެރެއިން ފެނާއި ނަރުދަމާގެ މައްސަލަ ފާހަގަކުރައްވައި، ރައީސް ވިދާޅުވީ އަމަލީ ގޮތުން މަސައްކަތް ވީހާވެސް އަވަހަށް ފެށުމަށް އެމަނިކުފާނު އިރުޝާދު ދެއްވާފައިވާކަމަށެވެ. އިތުރު އެހެން ވައުދެއްގެ ގޮތުގައި ރައީސް ވިދާޅުވީ، އާބާދީއަށް ބެލުމެއް ނެތި ތަރައްގީ ގެނައުމެވެ. އެގޮތުން އެއީ ކުޑަ ރަށެއް، ބޮޑު ރަށެއް ނުބަލައި ރައްޔިތުންނަށް ހަމަހަމަ އުސޫލުން ހިދުމަތް ކުރުންކަމަށްވުމާއި އެކު އެ ވިސްނުމުގައި މި ސަރުކާރުން ދެމިތިބޭނެކަމަށް ރައީސް ވިދާޅުވި އެވެ.
ތައުލީމީ ނިޒާމުގައި ހުރި ގޮންޖެހުންތަކަށް އިޝާރާތް ކުރައްވައި ރައީސް ވިދާޅުވީ، ޓީޗަރުން ހޯދުމުގައި ދަތިތަކެއް ހުރުމާއި އެކު އެ މައްސަލައިގައި ފެހެންދޫއަށް އިސްކަމެއް ދެއްވައިގެން މަސައްކަތް ކުރައްވާނެކަމަށެވެ. ރަށުގައި ހުންނާނެ ދާއިމީ ޓީޗަރުން ހޯދުމުގެ މަސައްކަތް ކުރިޔަށް ގެންދާއިރު ރައީސް ވިދާޅުވީ އެކަމަށް އަލިމަގެއް ނުފެންނަ ހާލަތެއްގައި ތަމްރީނުތައް ފޯރުކޮށްދީ ބޭނުންވާ އެހީތައް ދީގެން ވެސް ޓީޗަރުންގެ ދަތިތައް ހައްލު ކުރައްވާނެކަމަށެވެ.
މި ރަށުގައި ގާއިމުވެ ހުންނާނެ ޓީޗަރެއް.. ޓީޗަރުން ހޯދުމުގެ މަސައްކަތް ކުރިޔަށް އެބަދޭ.. އެކަމުގައި ރަށުގެ ރައްޔިތުންނަށް ނުވަތަ ރަށުގެ ސްކޫލަށް ކޮށްދެވޭނެކަމެއް އޮތްކަމުގައިވާ ނަމަ ސަރުކާރުގެ ސިޔާސަތަކީ ހަމަ ހުރިހާކަމެއް އެންމެ އިސްކަމެއް ދީގެންކޮށްދީ.. މި ރަށުގައި ގްރޭޑު ހައެކުން ދަށުގެ ކުދިންނަށް ކިޔަވައިދިނުމުގައި ހައެކުން މަތީގެ ކިޔަވާ ކުދިންނަށް ކިޔަވައިދިނުމަށް ބޭނުންވާ ހާއްސަ އެކަން ފަހިކޮށްދިނުން..
ރައީސް ވިދާޅުވީ ބޭނުންވަނީ ފެހެންދޫގައި ގާއިމުވެ ތިބުމަށް ޝައުގުވެރިކަން ހުރި ޓީޗަރުން ކަމަށެވެ. އަދި ރައްޔިތުން ބޭނުންވާ ގޮތަށް، ގްރޭޑު ހައެކުން މަތީގެ ދަރިވަރުންނަށް ކިޔަވައިދެވޭނެ އިންތިޒާމު ހަމަޖެހިގެން ދިއުން ކަމުގައި ރައީސް ވިދާޅުވި އެވެ.
