މި އަހަރުގެ އޮގަސްޓު 7 ވަނަ ދުވަހުގެ ނިޔަލަށް ރާއްޖެއަށް އައި ފަތުރުވެރިންގެ ތެރެއިން ބޮޑު ބައެއް އެކޮމޮޑޭޝަންއެއްގެ ގޮތުގައި ހިޔާރުކޮށްފައި ވަނީ، ރިސޯޓުތައްކަމަށް މިނިސްޓްރީ އޮފް ޓޫރިޒަމްގެ އެންމެ ފަހުގެ ތަފާސް ހިސާބުތަކުން ދައްކައިފިއެވެ.
މިނިސްޓްރީގެ ތަފާސް ހިސާބުތަކުން ދައްކާގޮތުގައި، 2025 އޮގަސްޓު 7 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ، 1،335،039 އަށް އަރައިފައެވެ. މިއީ، މިދިޔަ އަހަރުގެ މި މުއްދަތުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދާއި އަޅާބަލާއިރު، 9.3 އިންސައްތައިގެ ކުރިއެރުމެކެވެ.
ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ މާކެޓުތަކުގެ ތެރޭގައި، އެއްވަނައިގައި އޮތީ ޗައިނާއެވެ. އެގޮތުން، ޗައިނާއިން ރާއްޖެއަށް އައި ފަތުރުވެރިންގެ އަދަދު 198،754 އަށް އަރަ އެވެ.
މިއީ، ރާއްޖެއަށް ޒިޔާރަތްކުރާ މާކެޓް ތަކުގެ ޖުމްލަ މާކެޓް ޝެއާގެ 14.9 އިންސައްތައެވެ. މިދިޔަ އަހަރު އަދި މި އަހަރުގައިވެސް، ރާއްޖެއަށް ދެވަނައަށް އެންމެ ގިނަ ފަތުރުވެރިން ޒިޔާރަތްކުރި މާކެޓަކީ، ރަޝިއާގެ މާކެޓެެވެ. އެގޮތުން، ރަޝިއާއިން ރާއްޖެއަށް ޒިޔާރަތްކުރި ފަތުރުވެރިންގެ އަދަދަކީ، 157،915 އެވެ. އަދި ތިންވަނައިގައި އޮތީ، އިންގުލެންޑުއެވެ. އިންގުލެންޑުއިން 124،125 ރާއްޖެއަށް އައިސްފައިވެއެވެ.
ފަތުރުވެރިން ހިޔާރުކުރާ ފެސިލިޓީތަކުގެ ޖުމްލަ މާކެޓް ޝެއާ އިންސައްތައިގެ 73.2 އިންސައްތައާއިއެކު، ފަތުރުވެރިން އެންމެ ގިނައިން ހިޔާރުކުރަނީ ރިސޯޓުތަކެވެ. އެގޮތުން، 2025 އޮގަސްޓު 7 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ އަދަދުގެ ތެރެއިން، 977،243 ފަތުރުވެރިން ވަނީ ރިސޯޓު ހިޔާރުކޮށްފައެވެ. ދެވަނައަށް ފަތުރުވެރިން އެންމެ ގިނައިން ހިޔާރުކޮށްފައިވަނީ، ގެސްޓު ހައުސްތަކެވެ. އެގޮތުން، 293،577 ފަތުރުވެރިން ވަނީ ގެސްޓު ހައުސްތައް ހިޔާރުކޮށްފައެވެ. ތިންވަނައަށް އެންމެ ގިނަ ފަތުރުވެރިން ހިޔާރުކުރި އެކޮމޮޑޭޝަންއަކީ، ހޮޓަލްތަކެވެ. އަދި، ސަފާރީއާއި ނުވަތަ ޓޫރިސްޓު ވެސެލަަތައް ހިޔާރުކުރި ފަތުރުވެރިންގެ އަދަދަކީ، 27،707އެވެ.
ފަތުރުވެރިކަމާ ބެހޭ ވުޒާރާއިން 2025 ވަނަ އަހަރަށް ކަނޑައަޅާފައިވާ އަމާޒަކީ 2.3 މިލިއަން ފަތުރުވެރިން ރާއްޖެއަށް ޒިޔާރަތްކުރުމެވެ. އަދި މިހާތަނަށް ރާއްޖެއަށް ޒިޔާރަތްކުރާ ފަތުރުވެރިންގެ ތަފާސްހިސާބުތަކުން ފެންނަމުންދާ ކުރިއެރުމާއި، ފަތުރުވެރިކަމުގެ ދާއިރާއަށް އަންނަމުންދާ ކުރިއެރުންތަކަށް ބަލާއިރު، މި އަމާޒާއި ހަމަޔަށް ވާސިލުވުމަކީ ދުރުގައިވާކަމެއްނޫންކަމަށް ބެލެވެއެވެ.
