ބ. އަތޮޅުގެ ފެހެންދޫގައި ޕޮލިސް ސްޓޭޝަނެއް އެޅުމަށްޓަކައި، އެ ސްޓޭޝަނުގެ ބިންގާ އެޅުމުގެ ރަސްމިއްޔާތު ކުރިއަށް ގެންގޮސްފިއެވެ.
ބ. ފެހެންދޫގެ ޕޮލިސް ސްޓޭޝަނުގެ ބިންގާ އެޅުމުގެ ރަސްމިއްޔާތު ކުރިއަށް ގެންގޮސްފައިވަނީ، ރައީސް މުއިއްޒު ބ. އަތޮޅަށް މިވަގުތުގައި ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
އެގޮތުން، އެ ސްޓޭޝަނުގެ ބިންގާ ރަސްމީކޮށް އަޅާ، އެ ސްޓޭޝަނު އެޅުމުގެ މަސައްކަތް ރަސްމީކޮށް ފައްޓަވައިދެއްވުމުގެ ރަސްމިއްޔާތުގައި ރައީސް މުއިއްޒުއާއި ކެބިނެޓުގެ ބައެއް ވަޒީރުންގެ އިތުރުން ދައުލަތުގެ ބައެއް އިސް އޮފިޝަލުން ބައިވެރިވެވަޑައިގެންނެވިއެވެ. އަދި، މިނިސްޓަރ އޮފް ހޯމްލޭންޑު އަލީ އިހުސާނު ވަނީ މި ސްޓޭޝަނުގެ އަމަލީ މަސައްކަތް ރަސްމީކޮށް، ފައްޓަވައިދެއްވައިފައެވެ.
ފުލުހުންނަކީ، މުޖުތަމައުގެ ސަލާމަތާއި ރައްކާތެރިކަން ދެމެހެއްޓުމުގެ ވަރަށް މުހިއްމު ހިއްސާއެއް އަދާކުރާ ބައެކެވެ. މިފަދަ މުހިއްމު މުއައްސަސާއެއްގެ ސްޓޭޝަނެއް، މީހުން ދިރިއުޅޭ ކޮންމެ ރަށެއްގައި ގާއިމުވެފައި ހުރުމަކީ ވަރަށް މުހިއްމުކަމެކެވެ. އެގޮތުން، ރާއްޖޭގައި މީހުން ދިރިއުޅޭ ކޮންމެ ރަށެއްގައި، ޕޮލިސް ސްޓޭޝަނެއް ގާއިމުވެފައި ހުރުމުގެ ސަބަބުން، ފުލުހުންގެ މަސައްކަތް އިތުރަށް ފުޅާވެ، އެއް ރަށުން، އަނެއް ރަށަށް، ފުލުހުން ދަތުރުކުރުމުގައި ހޭދަވާ ވަގުތު ކުޑަވެ، ބޮޑެތި ލުއިފަސޭހަތަކެއް ލިބިގެންދާނެއެވެ. އަދި ހަމައެއާއިއެކު، އެ ރަށެއްގެގައި ޕޮލިސް ސްޓޭޝަނެއް ގާއިމުވެފައި ހުރުމުގެ ސަބަބުން، އެ ރަށެއްގަައި ދިރިއުޅޭ ރައްޔިތުންނަށް އެއްވެސް ހާސްކަމެއްނެތި، އެ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރެވިގެންދާނެއެވެ.
ވަކިން ހާއްސަކޮށް، ކްރައިމް ރޭޓު ދަށްކުރުމަށްޓަކައި، ރާއްޖޭގެ ކޮންމެ ރަށެއްގައި ޕޮލިސް ސްޓޭޝަނެއް ނުވަތަ ފުލުހުން ތިބޭނެ ތަނެއް އިންތިޒާމުކޮށް، ރާއްޖޭގައި މީހުން ދިރިއުޅޭ ކޮންމެ ރަށެއްގައި ފުލުހުން ހަރަކާތްތެރިވުން އިތުރުކުރުމަކީ، މަސްތުވާތަކެއްޗާއި، ގޭންގު މާރާމާރީ ފަދަ ސީރިއަސް، ޖިނާއީ ކުށްތައް މަދުކުރުމަށް އެޅޭނެ ވަރަށް މުހިއްމު ފިޔަވަޅަކަށް ދެކެމެވެ.
ސަރުކާރުގެ އަމާޒު
ފެހެންދޫގައި ފުލުހުންގެ ސްޓޭޝަނެއް ގާއިމުކުރުމަކީ، ރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ގާއިމުކުރުމަށް ރައީސް މުއިއްޒު ގެންގުޅުއްވާ ސިޔާސަތުގެ ދަށުން ކުރެވޭ މަސައްކަތެކެވެ. އެގޮތުން، ސަރުކާރުގެ އަމާޒަކީ، 2026 ވަނަ އަހަރުގެ ނިޔަލަށް، ރާއްޖޭގެ ކޮންމެ ރަަށަކަށް ދިވެހި ފުލުހުންގެ ހިދުމަތް ތައާރަފުކޮށް، އެ ރަށުގައި ފުލުހުން ގާއިމުކުރުމެވެ. އެގޮތުން، މި އަމާޒުގެ ދަށުން، ރަށްރަށުގައި ޕޮލިސް ސްޓޭޝަންތަކާއި، ޕޮލިސް ޕޯސްޓުގެ އިތުރުން ޕޮލިސް ޑެސްކުތައް ގާއިމުކުރެވިގެންދާނެއެވެ.
