ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހުމަދު ސައީދު ބޭސްފަރުވާއަށް ފުރަން އެދުމުން ޕާސްޕޯޓު ދޫނުކުރަން ނިންމީ ލިބިފައިވާ އިންޓެލިޖެންސް ރިޕޯޓަކަށް ބުރަވެ ކަމަށް ޕްރޮސެކިއުޓާ ޖެނެރަލްގެ އޮފީހުންބުނެފިއެވެ.
ސައީދުގެ މައްޗަށް ކުރެވޭ ހިޔާނާތުގެ ތުހުމަތުތަކާ ގުޅިގެން ޝަރީއަތް ނިމެންދެން އޭނާގެ ޕާސްޕޯޓު ވަނީ މިދިޔަ އަހަރުގެ އޮކްޓޫބަރު 9 އިން ފެށިގެން ހިފަހައްޓައިފައެވެ. ނަމަވެސް ބޭސްފަރުވާއަކަށް ރާއްޖެ އިން ބޭރަށް ވަޑައިގަތުމުގެ ހުއްދައަކަށް މެޑިކަލް ޑޮކިއުމަންޓުތަކާ އެކު މި އަހަރުގެ މޭ މަހު ސައީދު އެދިވަޑައިގަތުމުން ޕީޖީ އޮފީހުން ކޯޓުގައި އޭރު ބުނެފައި އޮތީ 15 ދުވަހުގެ މުއްދަތަށް އޭނާ އަށް ޓްރެވެލް ޑޮކިއުމަންޓެއް ދޫކުރަން އިއުތިރާޒެއް ނެތް ކަމަށެވެ.
އެހެންނަމަވެސް އޭގެ ފަހުން ލިބުނު އިންޓެލިޖެންސް ރިޕޯޓަކަށް ރިއާޔަތްކޮށް ޕީޖީ އޮފީހުން ކޯޓަށް އަންގާފައިވަނީ ސައީދު ރާއްޖެއިން ބޭރަށް ވަޑައިގަތުމަށް ނުވަތަ އޭނާގެ ޕާސްޕޯޓު ދޫކުރަން އިއުތިރާޒު ކުރާ ކަމަށެވެ. ޕީޖީ އޮފީހުގެ މީޑިއާ އޮފިޝަލް އަހުމަދު ޝަފީއު ވަނީ އެކަން ”ސަންގަށް“ އެކަންކަށަވަރުކޮށްދެއްވާފައެވެ.
ޕީޖީ އޮފީހުން މީޑީއާތަކަށް މައުލޫމާތު ދީފައިވާގޮތުން 2018 އަހަރު ފެނަކަ ކޯޕަރޭޝަން ލިމިޓެޑާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމުގެ ދަށުން ކުރަން ކަނޑައެޅިފައިވާ މަސައްކަތްތައް އެ ކުންފުނިން ފުރިހަމަކޮށްފައިނުވާކަމަށެވެ. އަދި ފެނަކަ ކުންފުނިންވަނީ މަސައްކަތްތައް ނިންމިކަން ކަށަވަރުކުރުމެއް ނެތި މަސައްކަތްތަކަށްވާ ފައިސާ ބްލޭޒަން އިންކް ޕްރައިވެޓް ލިމިޓެޑަށް ދޫކޮށްފައިކަމަށާއި އެ ކުންފުންޏަށް ނާޖާއިޒް މަންފާތަކެއް ހޯދައިދީފައިވާކަމަށެވެ.
