ތުޅާދޫ އެއާޕޯޓް ބިން ހިއްކުމުގެ މަސައްކަތް ފެށީ ބަދަލުތަކެއް ގެންނަ ގޮތަށް ކަމަށް ރައިސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު ބ. އަތޮޅަށް އިއްޔެ ފެއްޓެވި ދަތުރުފުޅުގައި ތުޅާދު އަށް މިއަދު ވަޑައިގެން ދެއްކެވި ވާހަކަފުޅުގައި ވިދާޅުވީ، އެ ރަށުގެ އެއާޕޯޓަށް ބޭނުންވާ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަސައްކަތް ކުރިއަށް ގެންދާނީ ބަދަލުތަކަކާ އެކު ކަމަށެވެ. މަސައްކަތް ނިންމަން ޖެހެނީ 660 ދުވަހުގެ ތެރޭގައި ކަމަށް ވާއިރު، މި ސަރުކާރުން އެ ޕްރޮޖެކްޓް އެމްޓީސީސީއާ ހަވާލުކުރީ ބަދަލުތަކަކާ އެކު ކަމަށް ރައީސް ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދުވަސްވަރު ބ. ތުޅާދޫ އެއާޕޯޓަށް ބޭނުންވާ ބިން ހިއްކުމުގެ މަސައްކަތް އަމިއްލަ ކުންފުންޏަކާ ހަވާލުކުރި ނަމަވެސް އެ އެއްބަސްވުން އުވާލައި އެމްޓީސީސީއާ އެ ޕްރޮޖެކްޓް ހަވާލުކޮށްފައި ވަނީ ބަދަލުތަކެއް ގެންނަ ގޮތަށް ކަމަށް ރައީސް މުއިއްޒު ވިދާޅުވިއެވެ.
ކުރީގެ ސަރުކާރުން ޖުލައި 2023 ގައި އެ މަސައްކަތް ހަވާލުކުރީ އަމިއްލަ ކުންފުންޏެއް ކަމަށްވާ ކެޕިޓަލް މެރިން އެންޑް ކޮންސްޓްރަކްޝަން ޕްރައިވެޓް ލިމިޓެޑާއެވެ. އެ ކުންފުނިން އެ އަހަރުގެ ސެޕްޓެމްބަރު މަހު އަމަލީ މަސައްކަތް ވެސް ފެށިކަން އިއުލާންކުރިއެވެ. އެއީ އަމިއްލަ ކުންފުނިތަކުން ފަންޑު ކުރާ ގޮތަށް ރިސޯޓް ހަދާނެ ރަށެއް ލިބޭ އުސޫލުން އެއާޕޯޓް ހަދަން ނޮވެމްބަރު 2022 ގައި އިބޫގެ ސަރުކާރުން ހުޅުވާލި ރަށްތަކުގެ ތެރޭގައި ހިމެނޭ ރަށެކެވެ.
ކޮންސްޓްރަކްޝަން މިނިސްޓްރީން ބުނިގޮތުގައި ތުޅާދޫން ހިއްކަނީ 55.4 ހެކްޓަރުގެ ބިމެވެ. ތުޅާދޫގައި 1،800 މީޓަރު ދިގު އަދި 30 މީޓަރު ފުޅާ ރަންވޭއެއް ހަދާނެ އެވެ. އަދި އެއީ ކޯޑް 3C ގެ ރަންވޭއެއް ކަމަށް މިނިސްޓްރީން ބުންޏެވެ. ބިން ހިއްކުމުގެ އިތުރުން 2،804 މީޓަރުގެ ރޮކް ރިވެޓްމެންޓް އަދި 1،677 މީޓަރުގެ ޖިއޯ ބޭގް ރެވެޓްމެންޓް ޖަހާނެ ކަމަށް ވެސް މިނިސްޓްރީން ބުންޏެވެ.
ތުޅާދޫ އެއާޕޯޓުގެ މަސައްކަތް ނިންމައި ދިނުމަކީ މިދިޔަ ރިޔާސީ އިންތިހާބުގައި ތުޅާދޫގެ ރައްޔިތުންނަށް ރައީސް މުއިއްޒު ވައުދުވެވަޑައިގެންފައިވާ ކަމެކެވެ.
