ކިރިގިސްތާނުގެ މިނިވަން ދުވަހުގެ މުނާސަބަތުގައި ރާއްޖޭގެ ފޮރިން މިނިސްޓަރ ޑރ. އަބްދުﷲ ހަލީލް ތަހުނިޔާގެ މެސެޖެއް ފޮނުއްވައިފިއެވެ.
މީގެއިތުރުން، ކިރިގިސްތާނުގެ ހާރިޖި ވަޒީރަށް ދުޅަހެޔޮ ސިއްހަތަށް މިންވަރުކުރެއްވުމަށާއި، އެ ގައުމުގެ ރައްޔިތުންނަށް އަމާންކަމާއި، އިތުރ ކުރިއެރުމާއި، އުފާ ފާގަތިކަން ލިބިގަތުމަށް، އެދޭކަމަށް މިނިސްޓަރު ފާހަގަކުރެއްވިއެވެ. އަދި، އެމަނިކުފާނު ކިރިގިސްތާނުގެ ހާރިޖީ ވަޒީރަށް ކުރައްވާ އިހްތިރާމްގެ ޔަގީންކަންވެސް ވަނީ ދެއްވައިފައެވެ.
ދިވެހިރާއްޖެއާއި، ކިރިގިސްތާނުގެ ދެމެދުގައި ޑިޕްލޮމެޓިކް ގުޅުން އެންމެ ފުރަަތަމަ ގާއިމުކުރެވިގެންދިޔަތާ މާގިނަ ދުވަސްތަކެއް ނުވެއެވެ. އެގޮތުން، 2019 އޮކްޓޯބަރު 1 ވަނަ ދުވަހުގައި، ދެ ގައުމުގެ ދެމެދުގައި ޑިޕްލޮމެޓިކް ގުޅުން ރަސްމީކޮށް ގާއިމުކުރެވިގެންދިޔައިރު، ދެ ގައުމުން ދިން އެއްބާރުލުމުގެ ތެރޭގައި، ދެ ގައުމުގެ ރައްޔިތުންނަށް 30 ދުވަހަށް ހިލޭ ވިސާ ލިބޭނެ ފުރުސަތު ވަނީ ފަހިކުރެވިގެން ގޮަސްފައެވެ. މިއީ، ރާއްޖޭގެ ފަތުރުވެރިކަމުގެ ސިނާއަތް އިތުރަށް ކުރިއެރުވުމަށް ކުރެވުނު މުހިއްމު މަސައްކަތެއްކަން ފާހަގަކޮށްލެވެއެވެ.
