އެމްޑީޕީން ގައުމު ހަލަބޮލިކުރުމަށް މަސައްކަތްކުރަމުންދަނީ އެޕާޓީގެ ވެރިކަމުގެ ކަންކަން ފޮރުވުމުގެ މަގުސަދުގައިކަމަށް ފޮރިން މިނިސްޓަރ އަބްދުﷲ ހަލީލް ވިދާޅުވެއްޖެއެވެ.
އެމްޑީޕީން ”ލޫޓުވާލައިފި“ ނަމުގައި މާލޭގައި މިރޭ މުޒާހަރާއެއް ކުރިޔަށް ގެންދިއުމަށް ދަނީ ތައްޔާރުވަމުންނެވެ. މި އެއްވުމަށް މާލެ ކައިރި ރަށްތަކުން ވެސް ލޯންޗުތަކުގައި މީހުން ދަނީ މާލެ އަންނަމުންނެވެ.
އެމްޑީޕީގެ މި ހަރަކާތާއި ގުޅިގެން ކުރެއްވި ޕޯސްޓެއްގައި ހަލީލް ވިދާޅުވީ، އެމްޑީޕީގެ ވެރިން ތިބީ ބޮޑެތި ކޮރަޕްޝަންގެ އަމަލުތަކެއް ހިންގާފައިކަމަށެވެ. އެހެންކަމުން އެ މައްސަލަތައް ބަލާނެކަން ޔަގީންވުމުން އެ ޕާޓީން މަސައްކަތްކުރަމުންދަނީ ގައުމު ހަލަބޮލިކުރުމަށް ކަމަށެވެ.
މިނިސްޓަރ ވިދާޅުވީ، ފުލުހުންނަށް ހަމަލާ ދިނުމަކީ އެމްޑީޕީގެ ހަރަކާތްތަކުން ފެންނަ އަމަލެއް ކަމަށެވެ. އަދި ދައުލަތުގެ މުދަލަށް ގެއްލުން ދިނުމަކީވެސް އެޕާޓީން ހިންގާ ހަރަކާތްތަކުގައި އާންމުކޮށް ފެނިގެންދާ އެފަދަ މަންޒަރެއްކަމަށެވެ. ކުރިއަށް ގެންދިއުމަށް ކަނޑައެޅިފައިވާ ހަރަކާތުގެ އަމާޒުވެސް ހުރީ އެފަދަ ގޮތަކަށް ކަމަށް ވެގެންދިއުން އެކަށީގެންވާކަމަށް ފާހަގަކުރެއްވިއެވެ.
