ދައުލަތުގެ މުވައްޒަފުންގެ މުސާރަތައް އެއްހަމަކޮށް، އަމަލު ކުރަން ފެށި ޕޭހާމަނައިޒޭޝަންގެ ސަބަބުން އެއްވެސް މުވައްޒަފެއްގެ މުސާރަށް ކުޑަނުވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ، ފުވައްމުލަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ ސިޓީގެ ރައްޔިތުންނާއި ބައްދަލު ކުރުމަށް އޮތް ޖަލްސާގައި ވާހަކަ ދައްކަވަމުންނެވެ.
ޕޭހާމަނައިޒޭޝަންއަށް އަމަލު ކުރަން ފެށުމާއި ގުޅޭގޮތުން ރައީސް ވިދާޅުވީ ބައެއް ވާހަކަތައް އޮޅުންއަރާގޮތަށް ދެކެވެމުންދާކަން ފާހަގަކުރެވިފައިވާކަމަށެވެ. އެހެންކަމުން ޕޭކޮމިޝަންގެ ފަރާތުން ކުރިޔަށް އޮތް ދުވަސްތަކުގެ ތެރޭގައި މައުލޫމާތުތައް ފޯރުކޮށްދެމުން ގެންދާނެކަމަށް ރައީސް ވިދާޅުވި އެވެ.
ރައީސް ވިދާޅުވީ ބައެއް ކަންބޮޑުވުންތައް ފަންމަތިވެގެން އައީ، ބައެއް ދޮގު ވާހަކަތައް ވެސް ފެތުރެމުންދާތީކަމަށެވެ. އެހެންކަމުން މި ސިޔާސަތާއި ގުޅޭގޮތުން، މައުލޫމާތުތައް ހުރިހާ ފަރާތްތަކަށް އެނގުން މުހިންމުކަމަށް ދެކެވަޑައިގަންނަވާކަމަށް ރައީސް ވިދާޅުވި އެވެ.
ރައީސް ވިދާޅުވީ މި ބަދަލާއި އެކު ކައުންސިލްތަކާއި، އިދާރީ މުވައްޒަފުން އަދި ޖުޑިޝަރީ ހިމެނޭ ގޮތަށް 20،000 މުވައްޒަފުންގެ މުސާރައަށް ހެޔޮ ބަދަލު އަންނާނެ ކަމަށެވެ. އަދި ޕޭ ފްރޭމްވޯކަށް ހިޖުރަ ނުކުރާ ފަރާތްތަކަށް އަންނަ އަހަރު މުސާރަ ބޮޑުވާނެކަމަށް ރައީސް ވިދާޅުވި އެވެ.
މީގެ ސަބަބުން މުވައްޒަފުންގެ މުސާރަ ބޮޑުވާނެ.. ފަހަށް ރައްކާކުރުން މީގެ ބޭނުމަކީ.. ހުރިހާ މުވައްޒަފުންގެ އަސާސީ މުސާރައަށް ވެސް ހެޔޮ ބަދަލު އަންނާނެ..
މުސާރައަށް ގެނައި ބަދަލުގެ ސަބަބުން ހުރިހާ މުވައްޒަފުންގެ މުސާރަށް ވެސް އަންނާނީ ހެޔޮ ބަދަލެއްކަން ފާހަގަކުރައްވައި ރައީސް ވިދާޅުވީ މީގެ ބޭނުމަކީ ފަހަށް ރައްކާކުރެވޭނެ މަގު ތަނަވަސް ވެގެން ދިއުން ކަމަށެވެ. އެހެންކަމުން އެންމެ ކުޑަކޮށް މުސާރަ ކަނޑައެޅިފައިވާ މުވައްޒަފުންނަށް ވެސް 7000 ރުފިޔާ އަސާސީ މުސާރަ ނުވަތަ ބޭސިލް ސެލެރީގެ ގޮތުގައި ލިބޭނެކަމަށް ރައީސް ވިދާޅުވި އެވެ.
މިރޭގެ ޖަލްސާގައި ރައީސް ވަނީ އިތުރުގަޑީގެ ފައިސާއާއި ގުޅޭގޮތުން ވެސް ދެކެވޭ ވާހަކަތައް ސާފުކޮށްދެއްވާފަ އެވެ. އެގޮތުން ޕޭ ފްރޭމްވޯކަށް ގެނައި ބަދަލާއި އެކު އިތުރުގަޑީގެ 10 އިންސައްތަ ލިމިޓް ހަމަވުމަށް ހައްލު ގެނެވިފައިވާކަމަށް ވިދާޅުވި އެވެ. އަދި މިއީ މުވައްޒަފުންގެ އޮތް ކަންބޮޑުވުމަށް އައި ވަރަށް ބޮޑު ހައްލެއްކަމަށް ވެސް ވިދާޅުވި އެވެ.
ރައީސް ވިދާޅުވީ އިތުރުގަޑީގެ ކެޕް ހަމަވާނީ ވަރަށް މަދު ހާލަތެއްގައި ކަމަށެވެ. އެހެން ނަމަވެސް މުވައްސަސާތަކަށް ދިމާވާ ކަންކަމަށް ޕޭ ކޮމިޝަނުން ވަކިން އެޓެންޑުވެ ހައްލު ކުރާނެކަމަށް ރައީސް ވިދާޅުވި އެވެ.
އެހެންވެ ރައީސް ވިދާޅުވީ މުވައްޒަފުންނަށް ކަމާއި ބެހޭ މުވައްސަސާތަކުން ފުރިހަމަ މައުލޫމާތުތައް ފޯރުކޮށްދިނުމެވެ.
