ޔުނިވަރސަލް ޕީރިއަޑިކް ރިވިއު (ޔޫ.ޕީ.އާރު.) ގެ ވަރކިންގ ގްރޫޕުގެ 50 ވަނަ ސެޝަން ޖެނީވާގައި ފަށާފައިވާއިރު، މި ދެ ހަފްތާގެ މުއްދަތުގެ ސެޝަން ނިމޭނީ 14 ނޮވެމްބަރ 2025 ގައެވެ.
އ.ދ. ގެ އިންސާނީ ޙައްޤުތަކާ ބެހޭ މަޖިލީހުގެ ދަށުން ކުރިއަށްދާ މި ސެޝަންގައި ދިވެހިރާއްޖެ ހިމެނޭގޮތަށް، ޖުމްލަ 14 ޤައުމެއްގެ އިންސާނީ ޙައްޤުތަކުގެ ރެކޯޑްތައް ދިރާސާކޮށް، އެ ޤައުމުތަކުގެ ޙާލަތު ބަލާނެއެވެ.
ޔޫ.ޕީ.އާރު. އަކީ އ.ދ. ގެ މެންބަރު ޤައުމުތަކުގެ އިންސާނީ ޙައްޤުތަކުގެ ޙާލަތު ދިރާސާ ކުރުމަށް ޤައުމުތަކުން އިސްނަގައިގެން ހިންގާ އެންމެ މުހިންމު އެއް ޕްރޮސެސްއެވެ. މި ސެޝަންގައި ރާއްޖެއިން ބައިވެރިވުމަކީ ބައިނަލްއަޤްވާމީ މައިދާނުގައި އިންސާނީ ޙައްޤުތައް ރައްކާތެރިކުރުމަށް ރާއްޖެއިން ދޭ އިސްކަން އަލުން ހާމަކޮށްދޭ ކަމެކެވެ.
ދިވެހިރާއްޖޭގެ ހަތަރުވަނަ ޔުނިވަރސަލް ޕީރިއަޑިކް ރިވިއު ބޭއްވުމަށް ހަމަޖެހިފައިވަނީ 5 ނޮވެމްބަރ 2025 ގައެވެ. މި ރިވިއުގެ ތެރެއިން، އިންސާނީ ޙައްޤުތައް ރައްކާތެރިކޮށް ކުރިއެރުވުމުގައި ބައިނަލްއަޤްވާމީ ނިޒާމުތަކާ ގުޅިގެން ރާއްޖެއިން އަބަދުވެސް ސާބިތުކަންމަތީ ދެމިތިބޭނެކަމުގެ ޔަޤީންކަން އަރުވާނެއެވެ.
ޔޫ.ޕީ.އާރު.ގެ މި ނިޒާމުގެ ސަބަބުން ކޮންމެ ޤައުމަކަށްވެސް އިންސާނީ ޙައްޤުތައް ރައްކާތެރިކުރުމަށް ކޮށްފައިވާ މަސައްކަތްތަކާއި ވެފައިވާ ވަޢުދުތައް ފުއްދުމުގައި ހޯދާފައިވާ ކުރިއެރުންތައް ބައިނަލްއަޤްވާމީ މުޖުތަމަޢަށް ހުށަހެޅުމުގެ ފުރުޞަތު ފަހިވެގެންދެއެވެ. ޔޫ.ޕީ.އާރު.ގެ ހަތަރުވަނަ ސައިކަލް 2022 ވަނަ އަހަރުގެ ނޮވެމްބަރ މަހު ފަށާފައިވާއިރު، މި ސައިކަލް ނިމޭނީ 2027 ވަނަ އަހަރުގައެވެ. މި ސައިކަލްގެ ތެރެއިން ރާއްޖެއިން ހޯދާފައިވާ ކުރިއެރުންތައް މި ސެޝަންގައި ހުށަހަޅާނެއެވެ.
ޔޫ.ޕީ.އާރު. ގެ 50 ވަނަ ސެޝަންގައި ދިވެހިރާއްޖޭގެ ވަފުދުން ބައިވެރިވެ، ހަމައެކަނި ރާއްޖޭގެ ރެކޯޑްތައް ހުށަހެޅުމުގެ ބަދަލުގައި، މި ސެޝަންގައި ހިމެނޭ އެހެނިހެން ޤައުމުތަކަށް ބިނާކުރަނިވި ރިކޮމެންޑޭޝަންތައް ވެސް ހުށަހަޅާނެއެވެ.
މިއީ އިންސާނީ ޙައްޤުތަކުގެ ދާއިރާގައި ރާއްޖެއަކީ ހަމައެކަނި ބައިވެރިއެއްގެ ބަދަލުގައި، ހަރުދަނާ ދައުރެއް އަދާކުރާ ޤައުމެއްކަން ދައްކުވައިދޭ ކަމެކެވެ. މީގެ އިތުރުން، ޔޫ.ޕީ.އާރު. ގެ މަސައްކަތަށް ފަސޭހަ ކޮށްދިނުމުގެ ގޮތުން ކޮންމެ ރިވިއުއަކަށް ތިން ޤައުމެއްގެ މައްޗަށް އެކުލެވޭ “ޓްރޮއިކާ” އެއް ކަނޑައެޅެއެވެ. މި ސެޝަންގައި ދިވެހިރާއްޖެއަކީ ޖެމެއިކާގެ ރިވިއު އަށް ކަނޑައެޅިފައިވާ ޓްރޮއިކާގެ މެމްބަރު ޤައުމެކެވެ. މިގޮތުން، ރާއްޖެއިން ބައިނަލްއަޤްވާމީ މަސްއޫލިއްޔަތުތައް އަދާކުރުމަށް ދޭ ސަމާލުކަން ފާހަގަކޮށްލެވެއެވެ.
ޔޫ.ޕީ.އާރު. ގެ 50 ވަނަ ސެޝަންގައި ބައިވެރިވާ ރާއްޖޭގެ ވަފުދުގައި އިސްކޮށް ހުންނަވާނީ ޖެނީވާގައި ހުންނަ އ.ދ.ގެ އޮފީހަށް ދިވެހިރާއްޖެއިން ކަނޑައަޅާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދެވެ. އެކަމަނާއާއެކު މި ވަފުދުގައި ޖެނީވާގައި ހުންނަ އ.ދ. ގެ އޮފީހަށް ދިވެހިރާއްޖެއިން ކަނޑައަޅައިފައި ހުންނަ ދާއިމީ މިޝަން ގެ ކައުންސެލަރ އާދަމް ހާމިދު އާއި ކައުންސެލަރ އާމިނަތު ޝިފާޔާ އިބްރާހީމް އާއި ސެކަންޑް ސެކްރެޓަރީ ޢާއިޝަތު ރަޔާހީން އާއި އެޓާޗޭ މުޙައްމަދު ރާއިދު ސައީދު ބައިވެރިވެވަޑައިގަންނަވާނެއެވެ.
ޚާއްޞަ ގޮތެއްގައި ފާހަގަކޮށްލަންޖެހޭ ކަމަކީ، އ.ދ.ގެ އިންސާނީ ޙައްޤުތަކާބެހޭ މަޖީލީހުގެ ނައިބު ރައީސްގެ ޙައިސިއްޔަތުން ދާއިމީ މަންދޫބު ޑރ. ސަލްމާ ރަޝީދު، ޔޫ.ޕީ.އާރު. ގެ މި ސެޝަންގެ ބައެއް ބައްދަލުވުންތަކުގެ ރިޔާސަތު ބެލެހެއްޓެވުމަށް ވެސް ހަމަޖެހިފައިވާ ކަމެވެ. މިއީ ބައިނަލްއަޤްވާމީ ފެންވަރުގައި ރާއްޖެއަށް ލިބޭ އިތުރު ޝަރަފަކާއި އިތުބާރެކެވެ.
