ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، އެ ޤައުމަށް ފައިސާގެ އެހީގެ ގޮތުގައި 50،000 އެމެރިކާ ޑޮލަރު އަދި 25،000 މަސްދަޅު ކޭސް ހަދިޔާ ކުރަން ދިވެހި ސަރުކާރުން ނިންމައިފިއެވެ.
ސަރުކާރުގެ މި ނިންމުމަކީ، “ޑިޓްވާ” ތޫފާންގެ ސަބަބުން ސްރީލަންކާ ގެ އެކި ހިސާބުތަކަށް ބޯކޮށް ވާރޭވެހި އެ ޤައުމުގެ ރައްޔިތުންނަށް ލިބިފައިވާ ގެއްލުންތަކާއި ދަތިތަކުން އަރައިގަތުމަށް އެ ޤައުމަށް އެހީތެރިވުމުގެ ގޮތުން ނިންމި ނިންމުމެކެވެ.
ފޮރިން މިނިސްޓްރީއިން މިކަމާއި ގުޅިގެން ނެރެފައިވާ ބަޔާނުގައި ވަނީ މި އެހީތެރިކަމުން ރަމްޒުކޮށް ދެނީ ދެ ޤައުމުގެ ދެމެދުގައި އޮތް ގާތް އެކުވެރި ގުޅުމާއި، މިފަދަ އުނދަގޫ ދަނޑިވަޅެއްގައި އެ ޤައުމުގެ ރައްޔިތުންނާއެކު ދިވެހި ރައްޔިތުން ތިބިކަންކަމަށެވެ. އަދި ރާއްޖެއިން އުއްމީދުކުރަނީ މި އެހީގެ ސަބަބުން ޙާލުގައި ޖެހިފައިވާ ސްރީލަންކާ ރައްޔިތުންނަށް ކޮންމެވެސް ވަރެއްގެ ތަސައްލީއެއް ލިބި، ސްރީލަންކާ ސަރުކާރުން ކުރަމުންދާ މަސައްކަތައް ކޮންމެވެސް ވަރެއްގެ ލުއިކަމެއް ލިބޭނެކަމަށްވެސް ބުނެފައިވެއެވެ.
މިފަދަ ކަންކަމުން ދައްކުވައިދެނީ ދެ ޤައުމުގެ ދެމެދުގައި އާއި ރައްޔިތުންގެ މެދުގައި ހިއްސާކުރާ ގާތް އެކުވެރި ގުޅުންކަމަށް ބުނެފައިވެއެވެ.
ލަންކާގައި އޮތް މޫސުމީ ކާރިސާއާއި ގުޅިގެން އެ ގައުމަށް ކުރަމުންދާ ވިއްސާރާއި ގުޅިގެން ރޭ ސްރީލަންކާގައި އެއް ހަފްތާއަށް އިމަޖެންސީ ވަނީ އިއުލާނުކޮށްފައިކަންވެސް ފާހަގަކޮށްލެވެއެވެ.
ލަންކާގައި އިމަޖެންސީ އިއުލާންކޮށްފައިވަނީ އެ ގައުމުގެ ސިއްހީ ދާއިރާއިންނެވެ. ސިއްހީ ދާއިރާ އިން އިމަޖެންސީ އިއުލާންކޮށްފައިވަނީ މިއަދުން ފެށިގެން އަންނަ މަހުގެ 4 ވަނަ ދުވަހާ ހަމައަށެވެ.
ހެލްތް މިނިސްޓްރީގެ ސެކްރެޓަރީ ޑރ އަނިލް ޖަޔަސިންހު ނެރެފައިވާ ރަސްމީ ބަޔާނެއްގައި ވަނީ ކާރިސާއާ ގުޅިގެން ސިއްހީ ހިދުމަތްދޭ ތަންތަނުގައި 24 ގަޑިއިރު ހިދުމަތް ދެމުންދާނެ ގޮތް ހާމަ ކުރައްވައިފައެވެ.
މީގެ އިތުރުން ސިއްހީ ދާއިރާގައި މަސައްކަތް ކުރަމުންދާ ފަރާތްތަކަށް ޗުއްޓީ ދިނުންވެސް ވަނީ ވަގުތީ ގޮތުން މެދުކަނޑާލައިފައިވާކަން ފާހަގަކޮށްލެވެއެވެ. އަދި ހޮސްޕިޓަލްތަކުގެ ޑިރެކްޓަރުންނަށާއި، އަދި އެތަންތަނުގެ އިސްކޮށް މަސައްކަތް ކުރައްވާ ބޭފުޅުން ވެސް އެތަން ތަނުގައި ދެމުން އަންނަ ހިދުމަތަށް ފުށޫ ނާރާ ގޮތަށް މުވައްޒަފުންގެ ކަންކަން ރޭވުމަށް ވަނީ އަންގަވައިފައެވެ.
