ރާއްޖޭގެ މާލީ ހީނަރުކަމުން އަރައިގަނެ، ސްޓެބިލިޓީއަށް އައިސްފައިވާކަން ބައިނަލްއަގުވާމީ ކްރެޑިޓް ރޭޓިން އޭޖެންސީ މޫޑީސްއިން އިއުލާނުކޮށްފައިވުމަކީ، ފާއިތުވި ދެ އަހަރު ދުވަހު ކެތްތެރިކަމާއެކު މި ސަރުކާރުން ކުރި ބުރަ މަސައްކަތްކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ މޯލްޑިވްސް އެމްއެސްއެމްއީ އެވޯޑް 2025 ހަފްލާގައި ވާހަކަދައްކަވަމުންނެވެ.
ސައީދު ވިދާޅުވީ، މޫޑީސްއިން ދާދިފަހުން ރާއްޖޭގެ ކްރެޑިޓް ރޭޓިން ”ސީއޭއޭ2“ ގައި ދަމަހައްޓައި، ކުރިން އޮތް ”ނެގެޓިވް“ އައުޓްލުކް ”ސްޓޭބަލް“ އަށް ބަދަލުކުރުމަކީ، ރާއްޖޭގެ ވިޔަފާރިވެރިންނަށް ލިބުނު ވަރަށް ބޮޑު ހިތްހަމަޖެހުމަކާއި ޔަގީންކަމެއް ކަމަށެވެ. މި ސަރުކާރުން ވެރިކަމާއި ހަވާލުވީއިރު، އޮތް މާލީ ހީނަރުކަން ވަޒީރު ފާހަގަކުރެއްވިއެވެ. އެގޮތުން ސްކޫލުތަކާއި ހޮސްޕިޓަލްތައް މޯގޭޖްކޮށް، ރާއްޖޭގެ ރޭޓިން އިންތިހާއަށް ދަށަށް ގޮސްފައި އޮތްކަން ފާހަގަކޮށްފައިވެއެވެ.
ރައީސް މުއިއްޒު މި ދެ އަހަރު ކުރިއަށް ގެންދެވީ ވަރަށް ކެތްތެރިކަމާއި، ހިދުމަތްތެރިކަމާއިއެކުކަމަށް ވިދާޅުވިއެވެ. ރާއްޖެ އަނބުރާ އެ މާޔޫސްކަމާއި ޑިޕްރެޝަނުން ސްޓެބިލިޓީއަކަށް އައިކަން މޫޑީސްއިން މިހާރު އިއުލާންކޮށްފައިވާކަން ސައީދު ފާހަގަކުރެއްވިއެވެ.
އި ސަރުކާރުން ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ގިނަ މަސައްކަތްތަކެއް ކުރަމުންދާކަމަށް ސައީދު ވިދާޅުވިއެވެ. އެގޮތުން 141 ޓްރެއިނިން ޕްރޮގްރާމް ހިންގައި 2500 ފަރާތަކަށް ތަމްރީން ދީފައިވާކަމަށް ވިދާޅުވިއެވެ. އަދި ވިދާޅުވީ، ރާއްޖޭގައި މިހާތަނަށް ބޭއްވުނު އެންމެ ފުރިހަމަ އެމްއެސްއެމްއީ އެކްސްޕޯ ވެސް ވަނީ ބާއްވާފައިވާކަމަށެވެ.
މާކެޓް އެކްސެސް ފަހިކުރުމުގެ މަސައްކަތުގެ ތެރެއިން ޗައިނާއާއެކު މިނިވަން ވިޔަފާރީގެ އެއްބަސްވުމެއް އެކުލަވާލާފައިވާއިރު، “އޮތެންޓިކް މޯލްޑިވްސް“ މެދުވެރިކޮށް 400 ވިޔަފާރިއަކަށް ބީސީސީން 50 މިލިއަން ރުފިޔާ ދޫކޮށްފައިވާކަންވސް ސައީދު ފާހަގަކުރެއްވިއެވެ. ސައީދު އިތުރަށް ފާހަގަކުރެއްވީ ޑިޖިޓަލް ވިޔަފާރި ފަހިކުރުމަށް ރައީސްގެ މެނިފެސްޓޯގައި ހިމެނޭ ޕޭޕާލްގެ ހިދުމަތް އަންނަ އަހަރުގެ ކުރީކޮޅު އުރީދޫއާއެކު ފަށާނެކަމެވެ. ބީއެމްއެލްއާއެކު ”ސްވައިޕް“ ގެ ނަމުގައި އެސްއެމްއީ ޑިޖިޓަލް ޕްލެޓްފޯމެއް ގާއިމުކޮށްފައިވާކަންވެސް ސައީދު ފާހަގަކުރެއްވިއެވެ.
ވިޔަފާރި އާއި އިގްތިސާދީ ދާއިރާގެ ގާނޫނުތައް ހަރުދަނާކޮށް، ފަންނުވެރިންގެ ހައްގުތައް ރައްކާތެރިކުރުމަށް ބަރން ކޮންވެންޝަންގައި ރާއްޖެއިން ބައިވެރިވެ، އަންނަ އަހަރު އައިޕީ އޮފީހެއް ގާއިމުކުރާނެ ކަމަށް ވިދާޅުވެ، އެފަދަ ވިޔަފާރިތަކަށް ސަރުކާރުގެ ފުރިހަމަ އެއްބާރުލުން ލިބޭނެކަމުގެ ޔަގީންކަން މިނިސްޓަރު ވަނީ ދެއްވާފައެވެ.
