ފަލަސްތީނު ރައްޔިތުންނާއެކު ދުނިޔެ އެއްބައިވަންތަކަންމަތީ ދެމިތިބިކަން އަމަލީގޮތުން ދެއްކުން އިތުރުކުރަން ޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ފަލަސްތީނުގެ ރައްޔިތުންނާ އެއްބައިވަންތަކަން ހާމަކުރުމުގެ ބައިނަލްއަގުވާމީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް ވަނީ، ހަނގުރާމަ ހުއްޓާލުމުގެ އެއްބަސްވުމާ ހިލާފުވެ، އިސްރާއީލުން ޣައްޒާއަށް މެދުކެނޑުމެއްނެތި ދޭ ހަމަލާތަކަށް ރާއްޖެއިން ދެކޮޅުކަން ހާމަކުރައްވާފައެވެ. އަދި ގަވައިދާ ހިލާފަށް ފަލަސްތީނުގައި އިސްރާއީލު ރައްޔިތުން އާބާދުކުރުމާ ދެކޮޅުކަން ވެސް އެ މަނިކުފާނު ފާހަގަކުރެއްވިއެވެ.
ރައީސް ވިދާޅުވީ ފަލަސްތީނު ރައްޔިތުންގެ އާންމު ދިރިއުޅުމަށް ބޮޑެތި ހުރަސްތަކެއް އެޅުމުން، ފަލަސްތީނުގެ ހަމަޖެހުމާއި އިގުތިސާދީ ގޮތުން ރަނގަޅު މުސްތަގުބަލެއް ހޯދުމުގެ އުންމީދު ގެއްލޭ ކަމަށެވެ. އެހެންކަމުން، ފަލަސްތީނު ރައްޔިތުންނާއެކު އެއްބައިވަންތަވުން، މާނަހުރި އަމަލަށް ބަދަލުކޮށް، ފަލަސްތީނުގެ ރައްޔިތުންގެ ހައްގުތަކާއި އުންމީދުތައް ފުރިހަމައަށް ހަގީގަތަކަށް ހެދުމަށް ބައިނަލްއަގުވާމީ މުޖުތަމައުއިން އިތުރަށް މަސައްކަތްކުރަން ޖެހޭ ކަމަށް ރައީސް ވަނީ ގޮވާލައްވާފައެވެ.
މީގެ އިތުރުން ރައީސް މުޢިއްޒު ވަނީ 1967ގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސް ވެރިރަށަކަށް ހަދާ، ފަލަސްތީނުގައި މިނިވަން ދައުލަތެއް ގާއިމުކުރުމަށް ގޮވާލި ގޮވާލެއްވުން ތަކުރާރުކުރައްވާފައެވެ. ފަލަސްތީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަގުގުވާމީ ދުވަހެއް ފާހަގަކުރަން ފަށާފައިވަނީ އދ.ގެ އާންމު މަޖިލީހުން 1977 ވަނަ އަހަރު މި ދުވަސް ފާހަގަކުރުމަށް ނިންމައިގެންނެވެ. ނޮވެމްބަރު 29، 1977 ވަނަ ދުވަހަކީ އދ. ގެ ގަރާރަކުން، ފަލަސްތީނާއި އިސްރާއީލް، ދެ ދައުލަތެއްގެ ގޮތުގައި ވަކިކުރަން ފާސްކުރި ދުވަހެވެ.
އެމެރިކާ މެދުވެރިވެގެން އިސްރާއީލާއި ހަމާސްއިން ކުރިއަށްގެންދިޔަ މަޝްވަރާތަކަށް ފަހު، ހަމަލާތައް މެދުކަނޑާލުމުގެ އެއްބަސްވުމެއްގައި ސޮއިކުރި ނަމަވެސް، އިސްރާއީލުން ވަނީ ތަކުރާރުކޮށް އެ އެއްބަސްވުމާ ހިލާފުވެފައެވެ.
ޣައްޒާގެ މީޑިއާތަކުން ރިޕޯޓުކޮށްފައިވާ ގޮތުގައި، އެ އެއްބަސްވުން ހެދި ފަހުން، މިދިޔަ މަހުގެ 10 ވަނަ ދުވަހާއި މި މަހުގެ 22 ވަނަ ދުވަހާ ދޭތެރޭ އިސްރާއީލުން ވަނީ 497 ފަހަރު އެއްބަސްވުމާ ޚިލާފުވެ، 142 ފަހަރު ޣައްޒާގެ ރައްޔިތުންނަށް އަމާޒުކޮށް ބަޑި ޖަހައި، 228 ފަހަރު ބޮމުގެ ހަމަލާތައް ދީފައިވެއެވެ. މި ހަމަލާތަކުގައި ޝަހީދުކޮށްލި މީހުންގެ އަދަދު 347 އަށް އަރާ ކަމަށް ރިޕޯޓުތަކުގައިވެއެވެ. ރައީސްގެ މި ގޮވާލެއްވުމަކީ، މިފަދަ ހާލަތެއްގައި ބައިނަލްއަގުވާމީ މުޖުތަމައުގެ ސަމާލުކަން ފަލަސްތީނަށް އިތުރަށް ހޯދައިދިނުމަށް ކުރެވުނު މުހިންމު މަސައްކަތެކެވެ.
