މަސްވެރިންގެ ދުވަސް ފާހަގަކުރުމަށްޓަކާ ރ. ދުވާފަރުގައި ބޭއްވި ’މަސްވެރިންގެ ގުންޒަރު‘ ކާމިޔާބު ކަމާއެކު ނިންމާލައިފިއެވެ.
މި ފޯރަމް، ނުވަތަ މަސްވެރިންގެ ގުންޒަރު ކުރިއަށްގެންދިޔައީ މިމަހުގެ 10 ވަނަ ދުވަހާއި 11 ވަނަ ދުވަހުއެވެ. މި ގުންޒަރުގެ މައިގަނޑު މަޤްސަދަކީ މަސްވެރިންނާއި މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް މި ސިނާއަތާ ގުޅުންހުރި މައުލޫމާތު ފޯރުކޮށްދީ، ދަތިތައް ހައްލުކުރުމާ ގުޅޭގޮތުން މަޝްވަރާކުރުމެވެ.
ރ. ދުވާފަރުގައި ބޭއްވި މި ގުންޒަރުގައި ވާހަކަދައްކަވަމުން މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ، މަސްވެރިކަމުގެ ދާއިރާގައި ހުރި ޒަމާންވީ ގޮންޖެހުންތަކާ އެކުވެސް، ސަރުކާރުން މި ސިނާއަތަށް ވަރަށް ބޮޑު އަހަންމިއްޔަތުކަމެއް ދެއްވާކަމަށެވެ. ޝިޔާމް ފާހަގަކުރެއްވި ގޮތުގައި، މަސްވެރި ސިނާއަތުގައި ހުރި ގޮންޖެހުންތަކަކީ ޒަމާންވީ މައްސަލަތަކެއް ކަމުން، އެކަންކަން ހައްލުކުރުމަށް ވަގުތާއި ހޭދަ ބޮޑުވާނެއެވެ. ނަމަވެސް، ރައީސް ޑރ. މުޙައްމަދު މުޢިއްޒު ވެވަޑައިގެންނެވި ހުރިހާ ވައުދުފުޅެއް ފުއްދަވާނެ ކަމުގެ ޔަޤީންކަން ވަޒީރު ދެއްވިއެވެ. މި ފަސް އަހަރުގެ ތެރޭގައި މަސްވެރިންގެ ކަންބޮޑުވުންތަކަށް ހައްލު ހޯދުމަކީ ސަރުކާރުގެ ވަރަށް ބޮޑު އަމާޒެއް ކަމުގައިވެސް ޝިޔާމް ވިދާޅުވިއެވެ.
ވަޒީރު ޝިޔާމް އިތުރަށް ފާހަގަކުރެއްވީ، މަސްވެރިކަމުގެ ސިނާއަތް ރާއްޖޭގައި ކުރިއަށްދާ ގޮތަށް ބަލާއިރު، ސަރުކާރުގެ އެހީތެރިކަން ފޯރުކޮށްދީގެން ނޫނީ ކުރިއަށް ގެންދެވޭނެ ގޮތެއް ނޯންނަކަމެވެ. މަހުގެ އަގު ސަރުކާރުން ކަނޑައަޅާ ހާލަތްތަކުގައި، ބޭރުގެ މާކެޓްތަކުގައި ދަތިތަކާ ކުރިމަތިލާން ޖެހި، ސަރުކާރަށާއި ކޭޝް ފްލޯއަށްވެސް ދަތިވާ ފަހަރު އަންނަކަން ވަޒީރު ފާހަގަކުރެއްވިއެވެ. މިފަދަ މާލީ ގޮންޖެހުންތަކާ އެކުވެސް، މަސްވެރިންނަށް އެކަށީގެންވާ އަގެއް ލިބޭނެ މަގު ފަހިކުރުމަކީ ސަރުކާރުގެ މުހިންމު މަސައްކަތެކެވެ.
މި ފޯރަމްގައި މަސްވެރިކަމާ ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމްގެ އިތުރުން ވުޒާރާގެ އިސްބޭފުޅުން ބައިވެރިވެވަޑައިގެންނެވިއެވެ. މީގެ އިތުރުން ދުވާފަރުގެ މަސްވެރިންނާއި ރާއްޖޭގެ 9 އަތޮޅަކުން ޖުމްލަ 40 މަސްވެރިން މި ގުންޒަރުގައި ބައިވެރިވިއެވެ. މަސްވެރިކަމުގެ ސިނާއަތް ތަރައްގީކޮށް ކުރިއެރުވުމާ ގުޅޭގޮތުން މަޝްވަރާކުރުމުގެ އިތުރުން، އެމް.އެން.ޑީ.އެފް ކޯސްޓް ގާރޑް، އެމް.އެފް.އޯ.އާރް.އެމް.ޕީ.ސީ، އެމް.އެސް.ޕީ.އީ.އޭ އަދި ބީ.އެމް.އެލްގެ ފަރާތުންވެސް މި ގުންޒަރުގައި މައުލޫމާތު ދިނުމުގެ ސެޝަންތައް ކުރިއަށްގެންދިޔައެވެ.
