ރިޔާސީ އިންތިހާބުގެ ވާދައާއި އެކު، މައްސަލަތައް އުފެދިފައި ވަނިކޮށް އިތުރަށް ހާލަތު ގޯސްވެ ގުރޫޕުތަކުގެ މެދުގައި ބަހުސްތައް ފެށީ އެމްޑީޕީގެ ޗެއާޕާސަންގެ މަގާމުން ފައްޔާސް އިސްމާއިލް އިސްތިއުފާ ދެއްވުމާއިއެކުކަމަށް އެ ޕާޓީގެ ކުރީގެ ރައީސް ޑރ. އިބްރާހިމް ދީދީ ވިދާޅުވެއްޖެ އެވެ.
2023 ރިޔާސީ އިންތިހާބާއި ގާތްކޮށް އެމްޑީޕީގެ އެތެރޭގައި އުފެދުނު ހިޔާލުތަފާތުވުންތައް އަދިވެސް އެގޮތުގައި އޮތް އިރު، 2028 ގެ ރިޔާސީ އިންތިހާބުގެ ޓިކެޓު ބޭނުންވާ އިތުރު ބޭފުޅުންނާއި އެކު މައްސަލަ ވަނީ ކުރިޔަށް ވުރެ ވެސް ގޯސްވެފަ އެވެ.
އެމްޑީޕީގެ އެތެރޭގެ މައްސަލަތަކުގެ ތެރެއިން، ކުރާ އެންމެ ބޮޑު ތުހުމަތަކީ ޕާޓީގެ ލީޑާޝިޕްގެ މެދުގައި އެއްވެސް ގުޅުމެއް ނެތުން ނުވަތަ އެއް ބޭފުޅަކު، އަނެއް ބޭފުޅަކަށް ވާހަކަ ނުދެއްކެވުމެވެ. މިއާއި އެކު އެއް ބޭފުޅަކު ބައިވެރިވާ ހަރަކާތްތަކުގައި، އެހެން ބޭފުޅަކު ބައިވެރި ނުވުމުގެ މައްސަލަ ވެސް ވަނީ ގޯސްވެފަ އެވެ.
މި މައްސަލަތަކާއި އެކު ޕާޓީއަށް ކިހާ މިންވަރެއްގެ ގެއްލުމެއް ލިބިދާނެތޯ، އަދި އަނެއްކާވެސް އިންތިހާބުތަކުގެ ނާކާމިޔާބީ ދިމަވެދާނެތޯ ސަންގުޓީވީގެ ”ޚަބަރަށްފަހު“ ޕްރޮގްރާމްގައި ސުވާލު ކުރުމުން ޑީޑީ ވިދާޅުވީ މާޒީގެ ފިލާވަޅުތަކުން އިބުރަތް ލިބިގަންނަން ޖެހޭ ކަމަށެވެ. ޑީޑީ ވިދާޅުވީ އެމްޑީޕީއަށް ދިމާވީ އެންމެ ދަތި ދުވަސްތަކަކީ 2012 ގައި ވެރިކަން ބަދަލުވުމަށް ފަހު 7 އަހަރު އެމްޑީޕީ އިދިކޮޅު ޕާޓީއެއްގެ ގޮތުގައި ހަރަކާތްތެރިވާން ޖެހުން ކަމަށެވެ.
ހާއްސަކޮށް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި އެތައް އުނދަގޫތައް ދިމާވީ ނަމަވެސް ޕާޓީގެ ލީޑާޝިޕްގެ ތެރޭގައި މައްސަލަތައް ޖެހި، ހަރަކާތްތަކުގައި ބައިވެރި ނުވާ ހިސާބަށް ގޮސްފައި ނުވާނެކަމަށް ޑީޑީ ވިދާޅުވި އެވެ. ޑީޑީ ވިދާޅުވީ އޭރު ރައީސް މުހައްމަދު ނަޝީދު ވެސް ހުންނެވީ އަމިއްލައަށް އަރުވާލެވިގެން ރާއްޖެއިން ބޭރުގައިކަމަށާއި، ޕާޓީގެ ހުރިހާ ހަރަކާތްތަކެއް ފުރިހަމައަށް ގެންގޮސް އިދިކޮޅުގެ ޒިންމާ އަދާކޮށް ނަތީޖާއެއްގެ ގޮތުން 2018 ގެ ރިޔާސީ އިންތިޔާބު ކާމިޔާބު ކުރިކަނަށެވެ.
އެއަށް ފަހު 2023 ގައި އަނެއްކާވެސް ނާކާމިޔާބީއާއި ކުރިމަތިލާން ޖެހި، އެކި އިންތިހާބުތައް ގެއްލުމަކީ ޕާޓީއަށް ލިބިގެން ދިޔަ ވަރަށް ބޮޑު ދަތިތަކެއްކަމަށް ޑީޑީ ވިދާޅުވި އެވެ. ޑީޑީ ވިދާޅުވީ މިއަދު ފެންނަނީ އެކި މަސައްކަތްތައް ރަނގަޅަށް ކުރިޔަށް ގެންދިއުމުގެ ބަދަލުގައި ޕާޓީގައި މީގެ ތިން އަހަރު ފަހުން ބާއްވާ ރިޔާސީ އިންތިހާބުގެ ވާދަކަމަށެވެ.
ޕާޓީގައި މިފަހުން އުފެދުނު ބަހުސްތަކަށް އިޝާރާތް ކުރައްވައި ޑީޑީ ވިދާޅުވީ އަނެއްކާވެސް ވާދަވެރިކަން އުފެދުނީ 2028 ގެ ކެނޑިޑެސީ ފައްޔާޒް މާ ކުރިން އިއުލާނު ކުރެއްވުމުން ކަމަށެވެ.
ދެން ހަމައެއާއި އެކުގައި މި ފެނުނީ، މާލޭގެ މޭޔަރ އިންތިހާބުގަ މި ޕްރައިމަރީގަ އާދަމް އާޒިމާއި ވާދަކުރައްވާ ކެނޑިޑޭޓާއި ބައިއަތު ހިއްޕަވައި، ހަމަ ރަސްމީ ގޮތުން އަލީ އާޒިމާއި އެކު ނިކުންނެވިތަން.. އެހެންވީމަ ވެސް އަނެއްކާވެސް ހަމަ މިވާދަވެރިކަމާއި ބަހުސް ތަންކޮޅެއް ބޮޑަށް ފޯރިގަދަވެގެން ގޮސްފައި އޮތްކަން މި ފާހަގަކުރެވިގެން ދަނީ… އެހެންވީމަ އަޅުގަނޑު ދަންނަވާނެ ވާހަކަ އަކީ 2028 އަންނާނީ 2026 ގެ ފަހުން ނޫންތޯއޭ… އެހެންވީމަ 2026 ގެ ފަހުން އެކަމުގެ މަސައްކަތް ފެށުނުން ނުވަތަ އިއުލާނު ކުރުން، އަދި އެއަށްފަހު އޭގެ ވާދަވެރިކަން އޮތުންކަމަށް ގަބޫލު ކުރެވެނީ، ޕާޓީއަށް އެންމެ މަސްލަހަތު ހުރި ގޮތަށްކަމަށް ވާނީ
އެމްޑީޕީގެ އެތެރޭގެ މައްސަލަތަކާ ގުޅޭގޮތުން ވާހަކަ ދައްކަވަމުން ޑީޑީ ފާހަގަކުރެއްވީ، 2028 ވަނަ އަހަރުގެ ރިޔާސީ އިންތިޚާބަށް ވާދަކުރުމުގެ ޝައުގުވެރިކަން ރަސްމީކޮށް އިޢުލާން ކުރައްވާފައިވަނީ ފައްޔާޒް އެކަނި ކަމަށެވެ. އެހެން ކެންޑިޑޭޓުންގެ ޝައުގުވެރިކަން ހުރިނަމަވެސް، އެކަން ރަސްމީކޮށް އަދި އިއުލާންކޮށްފައި ނުވާކަން އޭނާ ފާހަގަކުރެއްވިއެވެ. މިސާލެއްގެ ގޮތުން، ޑީޑީ ވަނީ ކުރީގެ ރައީސް އިބްރާހިމް މުހައްމަދު ސޯލިހު ވެސް، އެފަދަ ހިޔާލެއް ހާމަކުރައްވާފައި ނުވާކަން ފާހަގަކުރައްވާފަ އެވެ.
ޑީޑީ ވިދާޅުވީ، ލޯކަލް ކައުންސިލް އިންތިޚާބު ބޯމަތިވެގެން އަންނަ މި ދަނޑިވަޅުގައި، އެކި އެކި ކެންޑިޑޭޓުންނަށް ނިސްބަތްވާ ގްރޫޕްތަކުގެ ވާދަވެރިކަން އުފެދިފައިވާ ކަމަށެވެ. މިކަންކަން ފެށުނު ހިސާބަކީ ފައްޔާޒް ރަސްމީކޮށް 2028 އަށް ވާދަކުރައްވާނެކަން އިޢުލާން ކުރެއްވި ހިސާބުންކަމަށް ތަކުރާރު ކުރެއްވި އެވެ.
އެއާއެކު، މާލޭގެ މޭޔަރުގެ އިންތިހާބުގެ ޕްރައިމަރީގައި އާދަމް އާޒިމާ ވާދަކުރައްވާ، ކެންޑިޑޭޓު އަލީ އާޒިމަށް ރަސްމީކޮށް ތާއީދުކުރައްވައި، އޭނާއާ އެކު ނުކުމެވަޑައިގަތުމުން ވެސް ޕާޓީ ތެރޭގެ ވާދަވެރިކަމާއި ބަހުސް އިތުރުވިކަމަށް ޑީޑީ ވިދާޅުވި އެވެ.
ޑީޑީ ވިދާޅުވި ގޮތުގައި، 2028 ވަނަ އަހަރުގެ އިންތިޚާބުގެ މަސައްކަތް ފެށުމަށް ނުވަތަ އެކަން އިއުލާން ކުރުމަށް އަދި މާ އަވަހެވެ. އަދި ޕާޓީއަށް އެންމެ މަސްލަހަތު ހުރި ގޮތަކީ، 2026 އަށް ފަހު ކެނޑިޑެސީ އިއުލާނު ކުރުންކަމަށް ވެސް ވިދާޅުވި އެވެ.
