ގައުމު ބަނގުރޫޓުކޮށްލުމަށް ފަހު، އެމްޑީޕީން މަސައްކަތް ކުރީ ރައީސް ޑރ. މުހައްމަދު މުއިއްޒު ވެރިކަމުން އިސްތިއުފާ ދެއްވާނެ ހާލަތެއް އުފެދުމަށްކަމަށް މަތިވެރި ދާއިރާގެ މެމްބަރު ހަސަން ޒަރީރު ވިދާޅުވެއްޖެ އެވެ.
ސަންގުޓީވީގެ ޚަބަރަށްފަހު ޕްރޮގްރާމުގައި ޒަރީރު ވިދާޅުވީ، އެމްޑީޕީގެ ބޭނުމަކަށް ވީ ދިވެހިރާއްޖެ ބަނގުރޫޓުކޮށްލުމަށް ފަހު ރައީސް މުއިއްޒު ގޮތްހުސްވެ ވެރިކަން ދޫކޮށް ފައިބާވަޑައިގަތުން ކަމަށެވެ. އަދި އެމްޑީޕީގެ އެންމެ މައި މަސައްކަތަކަށްވީ، ވެރިކަމުގެ ކުރީކޮޅު ރައީސް މުއިއްޒު އިސްތިއުފާ ދޭން މަޖުބުރޫރު ކުރުވުންކަމަށް ވިދާޅުވި އެވެ.
ރާއްޖޭގެ އިގްތިސާދީ ހާލަތު ސަރުކާރަށް ރަނގަޅަށް މެނޭޖު ނުކުރެވޭކަމަށް ބުނެ އެމްޑީޕީ ކުރާ ތުހުމަތުތަކަށް ވެސް ޒަރީރު ވަނީ ރައްދުދެއްވާފަ އެވެ. ޒަރީރު ވިދާޅުވީ ރައީސް މުއިއްޒު ވެރިކަމާ ހަވާލުވެވަޑައިގަތީ، ދިވެހިރާއްޖެ 125 ބިލިއަން ރުފިޔާއިން ދަރަނިވެރިވެ، ބަނގުރޫޓުވުމުގެ ހާލަތުގައި އޮތް ވަގުތެއްގައި ކަމަށެވެ.
މީގެ އިތުރުން ދައުލަތުގެ ކުންފުނިތަކުން 20 ބިލިއަން ރުފިޔާ ޕްރައިވެޓް ސެކްޓަރަށާއި ދައުލަތަށް ދައްކަންޖެހިފައި އޮތުމާއެކު، އެ ކުންފުނިތައް ވެސް އޮތީ ބޮޑު ދަރަނީގެ ހާއްޔެއްގެ ތެރޭގައިކަމަށް ޒަރީރު ވިދާޅުވި އެވެ.
ޒަރީރު ވިދާޅުވީ އެމްޑީޕީގެ ފަސް އަހަރު ނިމިގެން ދިޔައީ ބައިނަލްއަޤުވާމީ މާލީ އެކި އިދާރާތަކުން ދިން އިރުޝާދާއި ތަކުރާރުކޮށް ދިން އިންޒާރުތަކަށް ކަމަށެވެ. އަދި ރަނގަޅަށް ސަމާލުވުމަށާއި، އަވަސް ފިޔަވަޅުތައް އެޅުމަށް ގޮވާލުމުން ވެސް އެއްވެސްކަމަކަށް އަމަލުކޮށްފައި ނުވާކަމަށް ޒަރީރު ވިދާޅުވި އެވެ.
ޒަރީރު ވިދާޅުވީ ގައުމުގެ ހާލަތު ވަރަށް ރަނގަޅަށް އެމްޑީޕިއަށް އެނގޭނެކަމަށާއި، އެ ޕާޓިން ބޭނުންވީ ވެރިކަން ނުލިބޭނެކަން އެނގުމާއި އެކު ދެން އުފެދޭނެ ސަރުކާރަކަށް އުނދަގޫކޮށް ޖެއްސުން ކުރުމަށް ކަމަށެވެ. އެގޮތުން އެމްޑީޕީގެ ވެރިކަން ބަދަލުވެ، ރައީސް މުއިއްޒު ވެރިކަމަށް ވަޑައިގަތުމާއި އެކު އެމްޑީޕީ ދެން ބެލީ ގައުމު ބަނގުރޫޓު ނުވެ ރައީސް މުއިއްޒު ހިފަހައްޓަވާނެ ގޮތަކަށްކަމަށް ވިދާޅުވި އެވެ.
މި ގައުމު ރައީސް މުއިއްޒަކަށް ނުހިފެހެއްޓޭނެއޭ ތިން މަސް ދުވަހު ވެސް ދިޔައީ ބުނަމުން. ތިމަންނާމެން ކޮންމެހެން ސަރުކާރާއި ދެކޮޅަށް އުޅޭކަށް ވެސް ނުޖެހޭނެއޭ… ގައުމު ބަނގުރޫޓުގެ މަގުގައި އޮތުމުން ސަލާމަތް ކުރާނެ ގޮތެއް ނޭނގިގެން.. ރައީސް މުއިއްޒު އަމިއްލަފުޅަށް އިސްތިއުފާ ދީފަ ވެރިކަން ދޫކޮށްފަ ދާނެއޭ ބުނަމުން ދިޔައީ..
އެ ހާލަތުގައި އެމްޑީޕީ ބޭނުންވީ، ރާއްޖެއަށް ދަތި ހާލަތެއް ދިމާވުމަށްކަމަށް ފާހަގަކުރައްވައި ޒަރީރު ވިދާޅުވީ، ގައުމު ބަނގުރޫޓުވާނެކަމަށާއި ތިން މަސް ދުވަސް ވެސް ހިފަހައްޓާނުލެވޭނެކަމަށް ބުނެ އެކަމަށް އެ ޕާޓީން އުފާފާޅު ކުރިކަމަށެވެ.
އެ ޕާޓީގެ ވެރިކަމުގައި މާލީ އިދާރާތަކުން ރާއްޖެ ބަނގުރޫޓުވެދާނެކަމުގެ އިންޒާރު ދީފައިވާތީ، އެމްޑީޕީގެ މެމްބަރުން ތިބީ އެކަމަށް އަތް ޖަހާލަޖަހާލައި، އެ ވަގުތު އަންނާނެ ދުވަހަކަށް އިންތިޒާރު ކޮށްގެންކަމަށް ޒަރީރު ވިދާޅުވިއެވެ.
ޒަރީރު ވިދާޅުވީ ގައުމަށް ގެއްލުންވެ، ސިޔާސީ މަގްސަދެއްގެ ތެރެއިން ރައްޔިތުންނަށް ނިކަމެތިކަން ލިބެން އެމްޑީޕީ ކިތަންމެ ބޭނުންވިޔަސް ރައީސް މުއިއްޒު އެ ފުރުސަތެއް ނުދެއްވާނެކަމަށެވެ. އަދި ވިދާޅުވީ ރައީސް މުއިއްޒު ގައުމު ކޮޅަށް ޖެއްސެވީ ވަރަށް ދަތި ހާލަތެއްގެ ތެރެއިންކަމަށާއި، މިހާރު މަޑުމަޑުން މަސައްކަތްތައް ވެސް ފެށި މަޝްރޫއުތައް ކުރިޔަށްދާކަމަށެވެ.
ރައީސް މުއިއްޒު މި ހުރިހާކަމަކާއި ކުރިމަތިލައްވައި، ކުންފުނިތަކަށް ދައްކަންޖެހޭ ފައިސާ ދައްކަމުން ގެންދަވާ ކަމަށް ޒަރީރު ވިދާޅުވިއެވެ. އަދި ދަރަނިތައް ވެސް ދައްކަމުން ގެންދަވާކަމަށް ފާހަގަކުރެއްވިއެވެ.
