ތަފާފު މާލީ މަންފާތައް ހޯދައިދިނުމުގެ ހުށައެޅުންތައް އަންނާނެ ކަމަށާއި އެހެންނަމަވެސް ރިޝަވަތުގެ ހުށައެޅުންތަކަށް ނޫނެކޭ ބުނުމުގައި ސާބިތުވާން ޖެހޭކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
41 ވަނަ ފުލުހުންގެ އަސާސީ ތަމްރީން ޕްރޮގްރާމު ދަސްވެނިވުމުގެ ހަފްލާގައި އިހުސާން ވިދާޅުވީ އަސާސީ ތަމްރީނަށްފަހު ދެން އިސްކަންދޭނީ ކުށުގެ ވެށީގެ ބޮޑެތި މައްސަލަތަކާ ކުރިމަތިލުމަށް ބޭނުންވާ ހާއްސަ ތަމްރީންތައް ހޯދާ ދިވެހި މުޖުތަމައު 100 އިންސައްތަ ކުށުގެ ވެށިން ސަލާމަތްވެފައިވާ މުޖުތަމައުއަކަށް ހެދުމަށް ކުރަމުންދާ މަސައްކަތަށްކަމަށެވެ.
ސަރުކާރުގެ ސިޔާސަތު މި ދާއިރާއިން ގެންގުޅެމުންދަނީ މައިގަޑު 4 ސިޔާސަތަކަށްކަން ފާހަގަކުރައްވައި އިހުސާން ވިދާޅުވީ މިއިން ކޮންމެ ކަމެއް ގޮސް ގުޅެނީ ރައްޔިތުންނަށް ބޭނުންވާ ސަލާމަތާ ރައްކާތެރިކަން ކަށަވަރުކޮށްދިނުމަށްކަމަށެވެ. ރައްކާތެރިކަމުގެ އިހުސާސު ކޮންމެ ރައްޔިތެއްގެ ހިތުގައި ނުއުފުދޭހާ ހިނދަކު އެ އަމާޒަށް ވާސިލު ނުވެވޭނެކަމަށް އިހުސާން ވިދާޅުވިއެވެ.
މީހުން މަގާމުގެ ކުރިއެރުމަށް ވައުދުވާނެ ކަމަށާއި ފައިސާ ވެސް ބަހާނެ ކަމަށް މިނިސްޓަރު ވިދާޅުވިއެވެ. އެހެން ނަމަވެސް ފުލުހުން ހެދި ތަމްރީނުގެ ހުނަރުތައް ދޫކޮށްލައި ސާބިތުކަން ދޫކޮށްލައިގެން ނުވާނެ ކަމަށް އިހުސާން ވިދާޅުވިއެވެ.
”ރިޝަވަތުގެ ހުށައެޅުންތަކަށް ނޫނެކޭ ބުނުމުގައި ސާބިތުވާން ޖެހޭ. މަގާމުގެ ކުރިއެރުންތަކާއި، ތަފާފު މާލީ މަންފާތައް ހޯދައިދިނުމުގެ ހުށައެޅުންތައްވެސް އަންނާނެ. މިފަދަ ބަލިމަށުކަމެއްގައި ނުޖެހުމަށް ނަސޭހަތްތެރިވަން“
މިނިސްޓަރު ވިދާޅުވީ ފުލުހުންނަކީ ފަހުރުވެރި މާޒީއެއް އޮވެ ކޮންމެ ރައްޔިތަކު ވެސް ފަހުރުވެރިވާ ހިދުމަތްތަކެއް ދެމުން އަންނަ މުއައްސަސާއެއް ކަމަށެވެ.
އެގޮތުން، ކޮންމެ ދުވަހަކީ ފުލުހުން ނުރައްކާތެރި މާހައުލުތަކުގައި މަސައްކަތް ކުރަން ޖެހޭނެ ދުވަހެއް ކަމަށާއި އެ ކަމަށްޓަކައި އަލަށް ތަމްރީނުވި ފުލުހުން ތިބީ ތައްޔާރަށް ކަމަށް އިހުސާން ވަނީ ވިދާޅުވެފައެވެ.
