ރައީސް ޑރ. މުޢިއްޒުގެ ސަރުކާރުން ލާމަރުކަޒީ ނިޒާމަށް ގެންނަ ކަމަށް ބުނާ ބަދަލުތަކަކީ ”ލާމަރުކަޒީ ނިޒާމް ބަލިކޮށް ޗެމްޕިއަންކަން ހޯދުން“ ކަމަށް، ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒް ވިދާޅުވެއްޖެއެވެ.
ސަންގުޓީވީގެ ޚަބަރަށްފަހު ޕްރޮގްރާމްގައި ލާމަރުކަޒީ ނިޒާމަށް އެންމެ ފަހުން ގެނައި ބަދަލުތައް ނިޔާޒް ސިފަ ކުރެއްވީ، ކައުންސިލްތަކުގެ ބާރު ކަނޑުވާލުމަށް ކުރާ މަސައްކަތެއްގެ ގޮތުގަ އެވެ. ނިޔާޒް ވިދާޅުވީ އަތޮޅު ކައުންސިލްތައް އުވާލުމާއި، ކައުންސިލް މެމްބަރުންގެ އަދަދަށް ގެނައި ބަދަލު އަދި ކައުންސިލްތަކުގެ ފަހު ދައުރުގެ މަސައްކަތްތަކަށް ފިނޭންސް މިނިސްޓްރީގެ ހުއްދަ ނަގަން ޖެހޭ ގޮތަށް އިސްލާހު ގެނެސްފައި ވަނީ އެއްވެސް ދިރާސާ ކުރުމެއް ނެތި ކަމަށެވެ.
މިއީ އެތައް ބައެއްގެ ވިސްނުން ހުރި ގޮތްކަމަށް ފާހަގަކޮށް ނިޔާޒް ވިދާޅުވީ، ދާއިރާގެ ތަޖުރިބާކާރުންގެ ބަހަކީ ވެސް އެއީ ކަމަށެވެ. ނިޔާޒް ވިދާޅުވީ، ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވިއިރު ލާމަރުކަޒީ ނިޒާމް ފައްކާކޮށް، އެ ނިޒާމްގެ ޗެމްޕިއަންކަން ހޯދުމަށް މަސައްކަތް ކުރައްވާނެކަމަށް ވިދާޅުވި ނަމަވެސް، މިއަދު ފެންނަނީ އެ ނިޒާމް ބަލިކޮށް ޗެމްޕިއަންކަން ހޯއްދަވާ މަންޒަރު ކަމަށެވެ.
އެގޮތަށް ހޯދާ ޗެމްޕިއަންކަން ނިޔާޒް ސިފަ ކުރެއްވީ، ފުޓުބޯޅަ މެޗެއްގައި ހޯދާ މޮޅެވެ.
ދެން ޑރ. މުއިއްޒު ވެރިކަމަށް ވަޑައިގެންނެވުމުން ވިދާޅުވީ ލާމަރުކަޒީ ނިޒާމް ފައްކާކުރުމަށް، އަދި އެ ނިޒާމްގެ ޗެމްޕިއަން ކަމުގައި މަސައްކަތް ކުރައްވާނެކަމަށް… އެހެން ނަމަވެސް އަޅުގަނޑު ވަރަށް ހިތާމަޔާ އެކު މި ދަންނަވަނީ އެ ނިޒާމް ބަލި ކުރައްވައިގެން ޗެމްޕިއަން ކަން އެ ހޯއްދެވީ. ތަޅާ ތަޅައިގެން އިނގޭތޯ، މެޗެއްގައި ނަމަ، މީ މޮޅުވުމަށް އަނެއް ފަރާތް ބަލިކޮށްގެން މޮޅުވުމަށް ވެސް މޮޅުވުން ކިޔާ. އެކަހަލަ މޮޅުވުމެއްކަމަށް އަޅުގަނޑަށް މީ ސިފަ ކުރެވެނީ ރައީސް މުޢިއްޒު މިފަހަރު ލާމަރުކަޒީ ނިޒާމަށް ދެއްކޮޅަށް މި ފިޔަވަޅު އެޅުއްވީ.
ލާމަރުކަޒީ ނިޒާމަށް ގެނެވުނު ބަދަލުތަކާ ގުޅޭގޮތުން ނިޔާޒް ވަނީ، އެމްޑީޕީގެ ވެރިކަމުގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވުނު އަށްވަނަ އިސްލާހުގެ މައްޗަށް އަލިއަޅުވާލައްވާފައެވެ. އެގޮތުން ނިޔާޒް ވިދާޅުވީ، އެ އިސްލާހަކީ 19 ވަނަ މަޖިލީހުގެ ވަރަށް ފުރިހަމަ މަސައްކަތެއް ކަމަށެވެ.
އޭރު މުޅިން އަލަށް އުފެއްދި ލާމަރުކަޒީ ކޮމިޓީގެ މުގައްރިރުކަން ވެސް ކުރައްވާފައިވާ ނިޔާޒް ވިދަޅުވީ، މުގައްރިރެއްގެ ހައިސިއްޔަތުން އެންމެ ގިނަ ވަގުތު ދެވި، އެތައް ބައެއްގެ މަޝްވަރާއާއި ހިޔާލު ހޯދައި އެތައް ދިރާސާއެއް ކުރި ހަމައެކަނި އިސްލާހަށް ވެސް އެ ބިލު ވާނެކަމަށެވެ. ނިޔާޒް ވިދާޅުވީ ކޮމިޓިން ލާމަރުކަޒީ ގާނޫނަށް އިސްލާހު ގެނެސްފައި ވަނީ، އާންމު ފަރާތްތަކާއި، ސިޔާސީ ޕާޓީތައް އަދި ޖަމިއްޔާ ޖަމާއަތްތަކާއި ކުރީގެ ކައުންސިލަރުންނާއި ވެސް ބައްދަލުކޮށް އެ ބޭފުޅުން ދެކޭ ގޮތް ބެލުމަށްފަހު ކަމަށެވެ.
ނިޔާޒް އިތުރަށް ވިދާޅުވީ، އޭރުގެ ސަރުކާރުން ބޭރުގެ އަމިއްލަ ފަރާތްތަކާއި އަދި އދ. ފަދަ އެކި ކަމާބެހޭ ފަރާތްތަކާއި ވެސް މަޝްވަރާކޮށް، އެބޭފުޅުންގެ ލަފައާއި އެއްގޮތަށް ސަތޭކައެއްހާ ވުރެ ގިނަ އިސްލާހާއި އެކު ގާނޫނު ފާސްކުރެވުނު ކަމަށެވެ.
މި އިސްލާހުގެ ސަބަބުން ކައުންސިލްތަކަށް މާލީ ބާރުވެރިކަމާއި މިނިވަންކަން ލިބި، ސަރުކާރުގެ ބަޖެޓަށް ބަރޯސާ ނުވެ ހިނގައިގަނެވޭނެ ގޮތަށް ލާމަރުކަޒީ ގާނޫނު ފައްކާކުރެވުނުކަމަށް ނިޔާޒް ވިދާޅުވިއެވެ. ނިޔާޒް ވިދާޅުވީ މި ސަރުކާރުން ދައުލަތުގެ ބަޖެޓުން ވަކި އިންސައްތައެއް ކައުންސިލްތަކަށް ހާއްސަކޮށްދޭ ބްލޮކް ގްރާންޓާއި ވެސް ދެކޮޅު ކަމަށެވެ.
