ދިވެހި ވިޔަފާރިވެރިންނާއި ރައީސުލްޖުމްހޫރިއްޔާ ބައްދަލު ކުރެއްވުމަށް ބާއްވާ ފުރަތަމަ ޖަލްސާ ހާއްސަ ކުރެވިފައި ވަނީ ކުދި އަދި މެދު ފަންތީގެ ވިޔަފާރިތަކަށްކަމަށް ރައީސުލްޖުމްހޫރިއްޔާގެ އޮފީހުން ބުނެފި އެވެ.
ވިޔަފާރިވެރިންނާއި ބައްދަލު ކުރެއްވުމަށް، ރައީސް ބާއްވަވާ ބައްދަލުވުން ކުރިޔަށް ގެންދިއުމަށް ހަމަޖެހިފައި ވަނީ މާދަމާ ރޭ ސޯޝަލް ސެންޓަރުގަ އެވެ.
މި ބައްދަލުވުމާއި ގުޅޭގޮތުން ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ވިދާޅުވީ، މިއީ ވިޔަފާރިވެރިންނަށް ހާއްސަކޮށް ބާއްވާ ސިލްސިލާ ބައްދަލުވުންތަކުން ފުރަތަމަ ބައްދަލުވުން ކަމަށެވެ. އެހެންކަމުން މި ބައްދަލުވުމުގައި ކުދި އަދި މެދުފަންތީގެ ވިޔަފާރިތަކުން ބައިވެރިވެ އެ ފަރާތްތަކުގެ ހުރި ކަންބޮޑުވުންތަކާއި، ހުށަހަޅަން ބޭނުންވާ ކަންކަން ހުށަހެޅުމަށް އެދިވަޑަައިގަތެވެ.
ވިޔަފާރިވެރިންނަށް ދިމާވާ ގޮންޖެހުންތަކާއި، އިގްތިސާދީ ދާއިރާ ތަރައްގީ ކުރުމަށްޓަކައި ކުރެވިދާނެކަންކަމާ ގުޅޭގޮތުން މަޝްވަރާކުރުމުގެ ފުރުސަތު މި ބައްދަލުކުރެއްވުމުގެ ތެރެއިން ލިބިގެންދާނެއެވެ.
ބުދަ ދުވަހުގެ ރޭގެ މި ބައްދަލުވުމުގައި ބައިވެރިވުމަށް ރައީސް އޮފީހުން ވަނީ ހުރިހާ ވިޔަފާރިވެރިންނަށް ވެސް ދައުވަތު އަރުވާފައެވެ.
