ހުޅުމާލެ 3 ވަނަ ފިޔަވަހި ބިން ހިއްކުމުގެ މަޝްރޫއުގެ 50 އިންސައްތަ މަސައްކަތް ނިމިފައިވާކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފި އެވެ.
މި މަޝްރޫއުގެ ދަށުން ޖުމްލަ 63 ހެކްޓަރުގެ ބިން ހިއްކަން ސަރުކާރުން ވަނީ ނިންމައިފަ އެވެ.
ހުޅުމާލޭގެ ތިންވަނަ ފިޔަވަހީގެ ބިން ހިއްކުމުގެ މަސައްކަތް ކުރިއަށް ގެންދަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާއި ހަވާލު ކޮށްގެނެވެ.
މި މަސައްކަތް ސެޕްޓެމްބަރު 2023 ގައި ފަށައި މިހާތަނަށް، މަޝްރޫއުގެ 50 އިންސައްތަ މަސައްކަތް ނިމިފައިވާކަމަށް އެމްއޭސީއެލް އިން ބުނިއެވެ. އެއީ، ހިއްކަން ހަމަޖެހި އޮތް ޖުމްލަ 63 ހެކްޓަރުން 31.5 ހެކްޓަރެވެ.
އެމްއޭސީއެލްއިން ބުނިގޮތުގައި، ހުޅުމާލެ ފޭސް 3 ގެ ބިން ހިއްކާ ސަރަހައްދުގެ ފުން ބޮޑު ސަރަހައްދެއް ހިއްކާ ނިމިފައިވާ ކަމަށާއި، މިވަގުތު މަސައްކަތްކުރަމުންދަނީ، ތިލަ ސަރަހައްދުތައް ހިއްކުމުގެ މަސައްކަތް ކަމަށެވެ.
ހުޅުމާލެ ބިން ހިއްކުމުގެ މަސައްކަތުގެ ދުވެލިއަށް ބަލާއިރު، މަސައްކަތް ނިންމުމަށް ހަމަޖެހިފައިވާ ތާވަލަށް ނިމިގެންދާނެ ކަމަށް އެމްއޭސީއެލްއިން ބުނިއެވެ.
ހުޅުމާލެ ފޭސް 3 ހިއްކުމުގެ ސްޕީޑް އަވަސް ކުރުމަށް އެއްފަހަރާ 2 ޑްރެޖަރެއް ބޭނުންކޮށްގެން ބިން ހިއްކުމުގެ މަސައްކަތް ފަށާފައިވަނީ ނޮވެމްބަރު މަހުގެ 28 ގައެވެ. ހުޅުމާލޭގެ ފޭސް 3 ގެ މަސައްކަތް ސަރުކާރުން އަލުން ފަށާފައި ވަނީ، ނޮވެމްބަރު މަހުގެ 10 ވަނަ ދުވަހުއެވެ
