ފަހި ދިރިއުޅުން ކޯޕަރޭޝަން (އެފް.ޑީ.ސީ) އިން އިމާރާތްކޮށްފައިވާ 4000 ފްލެޓްގެ ޑައުންޕޭމަންޓާ ގުޅިގެން ރައްޔިތުންގެ ކަންބޮޑުވުންތަކަށް ގެނެސްދެއްވެން އޮތް އެންމެ ރަނގަޅު ޙައްލެއް ހޯއްދަވައިދެއްވާނެކަމުގެ ޔަޤީންކަން ރައީސް ޑރ މުހައްމަދު މުއިއްޒު ދެއްވައިފިއެވެ.
މި ޔަޤީންކަން އެމަނިކުފާނު ދެއްވީ، މާލޭ ސިޓީގެ ގަލޮޅު ދާއިރާގެ ރައްޔިތުންނާއެކު ރޭ، ޢިމާދުއްދީން ސްކޫލުގައި ކުރިއަށްގެންދެވި މަޝްވަރާބައްދަލުކުރެއްވުމެއްގައެވ
މި ބައްދަލުވުމުގައި ގިނަ ރައްޔިތުން ޙިއްޞާކުރެއްވީ ބޯހިޔާވަހިކަމާ ގުޅުންހުރި ކަންބޮޑުވުންތަކެވެ. ރައީސުލްޖުމްހޫރިއްޔާ ވަނީ ކޮންމެ ރައްޔިތެއްގެ ޚިޔާލާއި، ފާޅުކުރެއްވި ޝުޢޫރަކީ މުހިންމު ކަމެއްކަން ފާހަގަކުރައްވައި، މިއިން ކޮންމެ ކަމަކީވެސް، ސީރިއަސްކަމާއެކު ބައްލަވާނެ ކަންކަން ކަމުގައި ވިދާޅުވެފައެވެ.
ޚާއްޞަކޮށް، 4000 ހައުސިންގ ޔުނިޓްގެ ޑައުންޕޭމަންޓާއި، އެއަށްފަހު މަހުން މަހަށް ދައްކަން ޖެހޭ ކުއްޔާ ގުޅިގެން ބައެއް ރައްޔިތުން ފާޅުކުރެއްވި ކަންބޮޑުވުންތަކަށް ހައްލެއް ހޯއްދަވައިދެއްވުމަށް، ކަމާބެހޭ ފަރާތްތަކާއެކު މަޝްވަރާކުރައްވާނެކަމަށް އެމަނިކުފާނު ވިދާޅުވިއެވެ.
ބޯހިޔާވަހިކަމާ ގުޅޭގޮތުން ރައްޔިތުން ހުށަހެޅުއްވި އަނެއް މައްސަލައަކީ ގުޅިފަޅުން ގޯތި ލިބޭ ފަރާތްތަކަށް ރަޖިސްޓްރީ ހަވާލުކުރެވިފައި އޮތް ނަމަވެސް، އެ ގޯތިތައް ކަނޑައިނުދެވި ލަސްވަމުންދާ މައްސަލައެވެ. ރައީސުލްޖުމްހޫރިއްޔާ ވަނީ ގުޅިފަޅުން ގޯތިކަނޑައިދިނުމުގެ ދުވެލި ހަލުވި ކުރައްވައި، މާ ގިނަ ދުވަސްތަކެއް ނުވެ، އެ ގޯތިތައް ޙައްޤުވެރިންނާ ޙަވާލުކުރެއްވޭނެކަމުގެ ޔަޤީންކަން މިރޭގެ މަޝްވަރާ ބައްދަލުވުމުގައި ދެއްވާފައެވެ.
ބޯހިޔާވަހިކަމުގެ މައްސަލައަކީ މުޅި ރާއްޖެއަށް، އަދި ވަކީން ޚާއްޞަކޮށް މާލެ ސަރަޙައްދުގެ ރައްޔިތުންނަށް ދިމާވެފައިވާ އެންމެ ބޮޑު މައްސަލަކަމުގައި ފާހަގަކުރައްވަމުން، ރައީސުލްޖުމްހޫރިއްޔާ ވަނީ އެމަނިކުފާނުގެ ރިޔާސީ ވަޢުދުފުޅާ އެއްގޮތަށް، މީގެ ކުރިން ހަވާސާ ކުރެވިފައިވާ ގިންތިއަށްވެސް ބޯހިޔާވަހިކަން ހަމަޖެހިގެންދާނެކަމުގައި ވިދާޅުވެފައެވެ.
އެގޮތުން، މީގެ ކުރިން ހިންގާފައިވާ ބޯހިޔާވަހިކަމުގެ މަޝްރޫޢުތަކުގައި މައިމުޅަވެފައިވާ ފަރާތްތަކަށް ޚާއްޞަ ކެޓަގަރީއެއް ނެތްއިރު، އެމަނިކުފާނުގެ ސަރުކާރުން ހިންގަވާ ފުރަތަމަ މަޝްރޫޢުންވެސް، މިފަދަ ފަރާތްތަކަށް ޚާއްޞަ ކުރެވިފައިވާ ކެޓަގަރީއިން ޙައްޤު ފަރާތްތަކަށް، ބޯހިޔާވަހިކަން ކަށަވަރުވެގެންދާނެކަމުގެ ޔަޤީންކަން އެމަނިކުފާނު ތަކުރާރުކުރެއްވިއެވެ.
ގަލޮޅަކީ ބޯހިޔާވަހިކަމުގެ އެކި ސްކީމްތަކުގެ ދަށުން ދޫކުރެވިފައިވާ ފްލެޓްތައް އެންމެ ގިނަ ސަރަޙައްދަށް ވާއިރު، ފްލެޓްތަކުގައި ދިރިއުޅުއްވާ ބައެއް ރައްޔިތުން ވަނީ އެ ބޭފުޅުން ތަހައްމަލުކުރައްވާ ތަކުލީފުތައް ރައީސުލްޖުމްހޫރިއްޔާއާ ހިއްސާކުރައްވާފައެވެ.
މިކަންބޮޑުވުންތަކަށް އިޝާރާތްކުރައްވަމުން ރައީސުލްޖުމްހޫރިއްޔާ ވަނީ، ކޮންމެ އެހީއެއް ފޯރުކޮށްދެއްވުމަށްވެސް އެމަނިކުފާނުގެ ސަރުކާރު އޮތީ ތައްޔާރަށް ކަމުގައި ވިދާޅުވެ، އެކަމުގެ ޔަޤީންކަން ދެއްވާފައެވެ. އަދި މީގެ ކުރިން މަޢާފުކޮށްދެއްވާފައިވާ ކުލީގެ ފައިސާ ހިމެނޭހެން ބިލުކުރެވެމުންދާކަމުގެ ޝަކުވާ ރައްޔިތުން އުފުއްލެވިއިރު، އެކަން ބަލައި، ހައްލުކޮށްދެއްވާނެކަމުގެ ޔަޤީންކަންވެސް އެމަނިކުފާނު ދެއްވިއެވެ.
