މަދަނީ ޖަމިއްޔާތަކަށް ދިމާވާ ޖާގައިގެ ދަތިކަމަށް ހައްލެއް ހޯއްދަވައި ދެއްވުމުގެ ގޮތުން، ޔޫތް ހަބްގެ ވަކި ޖާގަތަކެއް އެއްވެސް ފީއެއް ނެގުމަކާ ނުލާ، ހިލޭ ދޫކުރާނެކަމަށާއި އެތަނުގެ ބޭނުން ޖަމިއްޔާތަކުން ހިފުމަށް އެދޭކަމަށް ޔޫތް މިނިސްޓަރ އިބްރާހިމް ވަހީދު ވިދާޅުވެއްޖެ އެވެ.
މިނިސްޓަރ އަސްވާޑު ފާހަގަކުރެއްވި ގޮތުގައި، މަދަނީ ޖަމިއްޔާތަކުން މިނިސްޓްރީއަށް އެންމެ ގިނައިން ހުށަހަޅާ ޝަކުވާއަކީ، ޖާގައިގެ ދަތިކަމާއި ގުޅޭ ކަންބޮޑުވުމެވެ. އަދި އެ ދަތިތަކަށް ހައްލު ހޯދައިދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފަރާތުން ވަރަށް ބޮޑު އެއްބާރުލުމެއް ލިބިގެން ދިޔަކަމަށް އަސްވާޑު ވިދާޅުވި އެވެ.
ޔޫތް ހަބްގައި، މަދަނީ ޖަމިއްޔާތަކަށް ހާއްސަ ކުރެވިފައިވާ ދެކޮޓަރިއެއް ހުންނާނެކަމާއި، މީގެ އިތުރުން ތަމްރީނު ކްލާސްތައް ހިންގުމަށްޓަކައި ޔޫތް ހަބްގެ ފުރަތަމަ ފްލޯގައި ތަމްރީނު ހޯލެއްވެސް ހާއްސަ ކުރެވިފައިވާކަމަށް މިނިސްޓަރ ވިދާޅުވި އެވެ.
މި ޖާގަ ކަނޑައަޅާފައި ވަނީ ޔޫތު ހަބް އިމާރާތުގެ ފުރަތަމަ ފަންގިފިލާގައިކަން ފާހަގަކުރައްވައި މިނިސްޓަރ ވިދާޅުވީ މިތަނަށް ދީފައިވާ ނަމަކީވެސް ”އެންޖީއޯ ވޯކިންގ ސްޕޭސް“ ކަމަށެވެ. މަދަނީ ޖަމިއްޔާތަކަށް ބައްދަލުވުންތަކާއި، މަސައްކަތްކުރުމަށް ޖާގައެއް ނެތުމުން ދަތިތައް ދިމާވާއިރު، އެކަމާއި ގުޅޭގޮތުން މިނިސްޓަރ ވިދާޅުވީ، މި ޖާގަ މެދުވެރިކޮށް މިކަމަށް ޙައްލެއް ލިބިގެންދާނެ ކަމަށެވެ. އަދި މަދަނީ ޖަމިއްޔާތަކުން މި ޖާގަ ބޭނުން ނުކުރާ ވަގުތުތަކުގައި، އެހެން ފަރާތްތަކުން ބޭނުންކުރާނަމަ އަގެއް ނެގި ނަމަވެސް، މަދަނީ ޖަމިއްޔާތަކުން ބޭނުންކުރުމުގައި އެއްވެސް އަގެއް ނުނަގާނެކަމަށް ވިދާޅުވިއެވެ.
މީގެ ކުރިން މަދަނީ ޖަމިއްޔާތަކާއެކު މިނިސްޓްރީން ބޭއްވި މަހާސިންތާތަކަށް އިޝާރާތް ކުރައްވަމުން މިނިސްޓަރ ވިދާޅުވީ، 48 ގަޑިއިރުގެ އެ މަހާސިންތާ އެއީ ވަރަށް ކާމިޔާބު ހަރަކާތެއް ކަމަށެވެ. އަދި އެފަދަ އިތުރު ބައްދަލުވުންތައް ވީހާވެސް ދިގުކޮށް ކުރިޔަށް ގެންދިއުމަށް ޖަމިއްޔާތަކުން އެދުނު ނަމަވެސް އޭރު މިނިސްޓްރީން ވެސް ބައްދަލުވުންތައް ކުރިޔަށް ގެންދަން ޖެހެނީ އަގު ދައްކައިގެން ތަންތަން ނަގައިގެން ކަމަށް މިނިސްޓަރ ވިދާޅުވި އެވެ. ނަމަވެސް އެ ދުވަހު ވެސް ޖަމިއްޔާތަކަށް ދިން ޔަގީންކަމަކީ އަސްވާޑު ވިދާޅުވި ގޮތުގައި މިނިސްޓްރީއަށް ދާއިމީ ޖާގައެއް ހަމަޖެހުމާއި އެކު ބައްދަލުވުންތައް ވީހާވެސް ގިނައިން ކުރިޔަށް ގެންދިއުމެވެ.
އަސްވާޑު ވަނީ މި ފުރުސަތުގެ ބޭނުން ހިފައި، މިނިސްޓްރީއާއި އެންޖީއޯ ޑިޕާޓްމަންޓަށް ގިނަގިނައިން ހުށަހަޅައި، ޕްރޮގްރާމްތަކާއި ހަރަކާތްތައް ހިންގުމަށް ހުށަހެޅުމަށް އެދިވަޑައިގެންފަ އެވެ.
މީގެ އިތުރުން، ރަށު ފެންވަރާއި، އަތޮޅު ފެންވަރާއި، ގައުމީ ފެންވަރުގައި ހިންގާ ހަރަކާތްތަކަށް މިނިސްޓްރީން މާލީ އެހީތެރިކަން ވެސް ފޯރުކޮށްދެމުންދާކަމަށް އަސްވާޑު ވިދާޅުވިއެވެ.
