ކޮރޯނާ ވައިރަސް އެންމެ ގަދައަށް ފެތުރެމުންދާ، ޗައިނާގެ ފަސް ސިޓީއެއްގައި ތިބި ދިވެހީންނަށް، ހިލޭ ރާއްޖެ އާދެވޭނެގޮތް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހަމަޖައްސަވައިދެއްވައިފިއެވެ.
ރައީސް އެކަން އެގޮތަށް ކުރެއްވުމަށް ނިންމަވާފައިވާކަންއިއުލާންކުރެއްވީ ފޮރިން މިނިސްޓަރ އަބްދުﷲ ޝާހިދެވެ.
އެގޮތުން، މިނިސްޓަރ ޝާހިދު ކުރައްވާފައިވާ ޓްވީޓެއްގައި ވިދާޅުވެފައިވަނީ، އެ ފަސް ސިޓީ އަކީ، ދިވެހިރާއްޖޭގެ ގައުމީ އެއާލައިން ”މޯލްޑިވިއަން“ ދަތުރުކުރާ ފަސް ސިޓީ ކަމަށެވެ. އެ ފަސް ސިޓީގައި މިވަގުތު ތިބި ދިވެހީން ރާއްޖެއަށް އައުމުގެ ފުރުސަތު އެފަރާތްތަކަށް ރައީސް ވަނީ ހުޅުވާލައްވާފައި ކަމަށް ޝާހިދު ވިދާޅުވިއެވެ.
އެ ފަސް ސިޓީއަކީ ޗޮންގކިންގ، ޗެންގްޑޫ، ހަންގްޒޫ، ނަންގްޖިންގް އަދި ޒިއާން އެވެ.
މިނިސްޓަރ ޝާހިދު ވިދާޅުވެފައިވަނީ، އެ ސިޓީތަކުގައި ތިބި ދިވެހީން ރާއްޖެއަށް އަންނަން ބޭނުން ކަމަށް ވާނަމަ ޗައިންނާގައި ހުންނަ ދިވެހި އެމްބަސީއަށް ހުށަހެޅުމުން ހަމަޖެހޭނެ ކަމަށެވެ.
