މި މަހުގެ ތެރޭގައި ދައުލަތުން ބޮޑެތި އަދަދުތަކުން ދަރަނި ދައްކަން ޖެހިފައިވާއިރު، ރާއްޖޭގެ މާލީ ހަމަޖެހުމަށް ބުރޫއަރައި، އިގްތިސާދީ ގޮތުން ނުރައްކާތެރި ނަތީޖާތަކެއް ކުރިމަތިވެދާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ”އެކްސް“ ގައި ކުރެއްވި ޕޯސްޓެއްގައި ފާހަގަކުރެއްވި ގޮތުގައި، މި އޭޕްރިލް މަހުގެ ތެރޭގައި އިންޑިއާއަށް ދައްކަންޖެހޭ 400 މިލިއަން ޑޮލަރުގެ ދަރަނި އެބައޮތެވެ. އަދި މި ފައިސާ ދެއްކުން މިހާތަނަށް ދެ ފަހަރެއްގެ މަތިން ފަސްކޮށްފައިވާކަން ފާހަގަކުރައްވައި، ތިންވަނަ ފަހަރަށް އެކަން ފަސްކުރުމަކީ ރާއްޖޭގެ މާލީ އިތުބާރު ގެއްލިދާނެ ކަމެއް ކަމަށް އެމަނިކުފާނު އިންޒާރު ދެއްވިއެވެ. މީގެ އިތުރުން، އެ ފައިސާ ދެއްކުން އަނެއްކާވެސް ލަސްކުރުމަކީ އިންޑިއާގެ މާލީ ގަވާއިދުތަކާ ހިލާފު ކަމެއްގެ ގޮތުގައި އެ ގައުމުގެ މީޑިއާތަކުން ސިފަކުރަމުންދާ ކަމަށްވެސް އެމަނިކުފާނު ވިދާޅުވިއެވެ.
ހަމައެއާއެކު، އެޕްރީލް މަހުގެ ތެރޭގައި ސުކޫކް ބޮންޑަށް ދައްކަންޖެހޭ 550 މިލިއަން ޑޮލަރުވެސް ދައުލަތުން ދައްކާފައިވާކަން ފާހަގަ ކުރައްވާ ނަޝީދު ފާހަގަކުރެއްވީ، މި ދަރަނިތައް އަދާކުރުމަށް ބޭނުންވާ މިންވަރަށް ދައުލަތުގެ ޑޮލަރު ރިޒާވްގައި ފައިސާ ނެތުމަކީ ބޮޑު ކަންބޮޑުވުމެއް ކަމެއް ކަމަށެވެ.
ދަރަނި ނުދެއްކި ”ޑިފޯލްޓް“ ވުމަކީ މުޅި ރާއްޖޭގެ މާލީ ނިޒާމަށާއި، ސަރުކާރުގެ ހިންގުމުގެ އިތުރުން އަމިއްލަ ވިޔަފާރިތަކަށްވެސް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމެއް ކަމަށް ނަޝީދު އިންޒާރު ކުރެއްވިއެވެ.
އިދިކޮޅު އެމްޑީޕީން ހުށަހަޅާފައިވާ ”ބޮޑު ބަދަލު“ އިސްލާހީ އެޖެންޑާއަށް އިޝާރާތް ކުރައްވައި، އޭގެ އެންމެ މުހިންމު އެއް އަމާޒަކީ ގައުމީ ދަރަނި މެނޭޖްކުރުމާ ގުޅޭގޮތުން މަޝްވަރާތައް ފެށުން ކަމަށް ނަޝީދު ވިދާޅުވިއެވެ. އަދި އިންޑިއާ ސަރުކާރާއެކު ދަރަނީގެ މައްސަލައިގައި ކުރެވޭ މަޝްވަރާތައް އިތުރަށް ހަރުދަނާވެ ކާމިޔާބުވާނީ، ހުރިހާ ސިޔާސީ ޕާޓީތަކެއްގެ މެދުގައި އެކަމަށް އެއްބަސްވުމަކަށް އާދެވިގެން ކަމަށްވެސް އެމަނިކުފާނު ފާހަގަކުރެއްވިއެވެ.
މީގެ އިތުރުން، ރާއްޖެއަށް ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށްޓަކައި، ސަރުކާރުން މަޝްވަރާގެ މޭޒަށް ވަޑައިގަތުމަށް ގޮވާލައްވައި، ކަމާބެހޭ ފަރާތްތަކާއެކު ދިމާވެފައިވާ މައްސަލަތަކަށް ހައްލު ހޯއްދެވުމަށް ރައީސް ނަޝީދު ބާރުއެޅުއްވިއެވެ.
