މާލޭގެ އުތުރު ފަރާތުގެ ނެރު ބައްތިތަކުގެ ކުލަ ފަނޑުވެ، އެ ބައްތިތަކުގައި ކުރަހާފައިވާ ގްރެފިޓީތައް ފިލުވައި އަލުން ކުލަލައި އާކުރުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
އެ މަސައްކަތަކީ މާލެ ސިޓީ ކައުންސިލްގެ ހާބަރ އެންޑް މާކެޓް މެނޭޖްމަންޓް ސެކްޝަނުން ދޭތެރެ ދޭތެރެއިން ކުރިއަށްގެންދާ މަސައްކަތެކެވެ. އެގޮތުން މިހާރު ކުރިއަށްދާ މަސައްކަތުގެ ދަށުން ޖުމްލަ 9 ނެރު ބައްތިއެއް ކުލަ ލައި އާކުރުމުގެ މަސައްކަތް ދަނީ ކުރަމުންނެވެ.
މިކަމާ ގުޅޭގޮތުން މާލެ ސިޓީގެ މޭޔަރ އާދަމް އާޒިމް ވިދާޅުވީ، މާލެ އަދި ވިލިމާލޭގެ މަލަމަތި ރީތިކޮށް ބެހެއްޓުމަށް ކުރެވެމުންދާ އެ މަސައްކަތަކީ ކައުންސިލުން ވަރަށް ބޮޑު އިސްކަމެއް ދީގެން ކުރަމުން އަންނަ މުހިންމު ކަމެއް ކަމަށެވެ.
ވެރިރަށް މާލެއަށް ޒިޔާރަތްކުރާ ފަތުރުވެރިންނާއި އެކި ފަރާތްތަކަށް މާލެއަކީ ހިތްގައިމު އަދި ރީތި ތަނެއްގެ ގޮތުގައި ފެންނާނެހެން ހެދުމަށް ސިޓީ ކައުންސިލުން ގިނަ މަސައްކަތްތަކެއް ކުރަމުންދާ ކަމަށްވެސް މޭޔަރު ފާހަގަކުރެއްވިއެވެ. މީގެ ތެރޭގައި މާލޭގެ ފަޅުތެރެ ސާފުކުރުމާއި، މާލެ ވަށައިގެންވާ ބޭރު ތޮށިގަނޑު ސާފުކޮށް ބެލެހެއްޓުމުގެ މަސައްކަތްތައް ވެސް ހިމެނެއެވެ.
މާލޭގެ ނެރު ބައްތިތަކަކީ ބަނދަރުތަކަށް ވަދެނިކުމެ ހަދާ އުޅަނދުފަހަރަށް ދަތުރުފަތުރުގެ ސަލާމަތްތެރިކަން ކަށަވަރުކޮށްދިނުމަށާއި، ހާއްސަކޮށް ރޭގަނޑުގެ ވަގުތުތަކުގައާއި މޫސުން ގޯސްވެ ވިއްސާރަވުމުގެ ސަބަބުން ލޮލަށް ފެންނަ މިންވަރު ދަށްވާ ހާލަތްތަކުގައި ނެރުތައް ސާފުކޮށް ވަކިކުރަން އެނގޭނެހެން ހަރުކޮށްފައިވާ މުހިންމު ނިޝާންތަކެކެވެ.
