ކަސްޓަމްސްގެ ބެލުމުގެ ދަށުގައި އޮތް ދެ ބޯޓު ބްރިޖަށް އުރުނު މައްސަލަ އެންއައިސީން ތަހުގީގުކުރަނީ

އެ ހާދިސާއާ ގުޅިގެން އެންއައިސީން ބުނެފައިވަނީ، އެ ކޮމިޝަނުން އިސްނަގައިގެން އެ މައްސަލަ ތަހުގީގުކުރުމަށް ނިންމާފައިވާ ކަމަށެވެ. އަދި ތަހުގީގުގައި ބަލާނީ، ކަސްޓަމްސްގެ ބެލުމުގެ ދަށުގައި އޮއްވާ އެ ދެ ބޯޓު އޮޔާ ގޮސް ބްރިޖަށް އުރުނު މައްސަލާގައި ކަސްޓަމްސްއިން ގާނޫނާއި ގަވާއިދާ އަމަލުކުރަން ޖެހޭ އުސޫލުތަކާ ހިލާފުވެފައިވޭތޯ ކަމަށް އެންއައިސީން ބުނެފައިވެއެވެ.

ނަގިލި ކަނޑައިގެން ގޮސް ކޮންޓްރޯލެއް ނެތި އޮޔާދިޔަ އެ ދެ ބޯޓު އެންމެ ފުރަތަމަ އުރުނީ ކާނިވާ ސަރަހައްދުގެ ބޭރު ފަރަށެވެ. އެ ސަރަހައްދުގެ ފަރަށް ބޮޑެތި ގެއްލުންތަކެއް ލިބުނު ފަހުން، ދެ ބޯޓު ވަނީ ސިނަމާލެ ބްރިޖުގެ ދަށުން އޮޔާ ގޮސްފައެވެ. އެ ވަގުތު ބޯޓުގެ ދަގަނޑު އެންޓެނާއަކާއި ނެވިގޭޝަން ލައިޓް ބްރިޖުގެ ސުޕަރ ސްޓްރަކްޗާގައި ޖެހި، ބްރިޖުގައި ކޫރުން އެޅިފައިވެއެވެ. ބްރިޖު ދަށުން ދަތުރުކޮށް އެ އުޅަނދުތައް މާލޭގެ ދެކުނު ފަރާތު ކަނޑަށް ނުކުމެ ވަކި ހިސާބަކުން އަޑިއަށް ދިޔައީއެވެ.

މިދިޔަ ޖުލައި މަހުގެ 4 ވަނަ ދުވަހު ”ނެޝަނަލް ޔުނިއަން އޮފް ސީފެއަރާސް އޮފް އިންޑިއާ“ އިން ވަނީ އެ އުޅަނދުތަކުގެ ފަޅުވެރިންގެ ހާލަތާ ގުޅޭގޮތުން ކަންބޮޑުވުން ފާޅުކޮށް ވީޑިއޯއެއް އާންމުކޮށްފައެވެ. އެ ވީޑިއޯގައި ބުނެފައިވާ ގޮތުގައި ”ކޭޖީ 1“ ގެ 9 ފަޅުވެރިންނާއި ”އޭއެލް 1“ ގެ 11 ފަޅުވެރިންނާއެކު ޖުމްލަ 20 މީހުން ހާލުގައި ޖެހިފައިވާއިރު، އެ މީހުންގެ ކާބޯތަކެއްޗާއި ބޯފެން އަދި ތެލުގެ އިތުރުން ޒަރޫރީ ސާމާނު ވަނީ ހުސްވެފައެވެ.

ވީޑިއޯގައި ބުނާ ގޮތުގައި، ކަސްޓަމްސްގައި އެހީއަށް އެދުމުން މާބޮޑު އެހީތެރިކަމެއް ލިބިފައި ނުވެއެވެ.

އެ ދެ ބޯޓަކީ އޮމާނުން ފުރައިގެން އިންޑިއާއަށް ދަތުރުކުރަނިކޮށް، އެއްވެސް އިދާރާއެއްގެ ހުއްދައެއް ނެތި މިދިޔަ އެޕްރީލް މަހުގެ 26 ވަނަ ދުވަހު ރާއްޖޭގެ ކަނޑުގެ ސަރަހައްދަށް ވަދެފައިވާ ދެ އުޅަނދެވެ. އެ އުޅަނދުތައް ރާއްޖޭގެ ސަރަހައްދުގައި އޮތްކަން ކަމާބެހޭ އިދާރާތަކަށް އެނގުނީ މެއި މަހުގެ 3 ވަނަ ދުވަހުއެވެ.