މާލެ ސަރަޙައްދުގައި ހިނގާ ނުރައްކާތެރި މަގުމަތީ ހާދިސާތައް އިތުރުވުމުގެ ސަބަބުން އަދުލު އިންސާފު ގާއިމުކުރުމަށް އެޅެމުންދާ ހުރަސްތަކަށް ހައްލެއް ހޯދުމަށް ކަމާބެހޭ މުއައްސަސާތައް ހާޒިރުކޮށް ރައްޔިތުންގެ ސަލާމަތާއި ކަށަވަރުކަން ގާއިމުކޮށްދިނުމަށް އެދި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް (ކުޑޫ) އެދިވަޑައިގެންފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲއަށް އެޑްރެސްކޮށް ކުޑޫ ފޮނުވި ސިޓީގައި ވަނީ، މާލެ ސަރަޙައްދުގައި ހިނގާ ނުރައްކާތެރި ހާދިސާތައް އިންތިހާއަށް އިތުރުވެ އެކަމުގެ ސަބަބުން އެތަކެއް ރައްޔިތުންނެއްގެ ފުރާނަ ގެއްލި އަދި އުމުރު ދުވަހުގެ ނުކުޅެދުންތެރިކަމާއި ކުރިމަތިލާންޖެހުމަކީ ރައްޔިތުން ކަންބޮޑުވާކަމެއްކަމަށާއި އެއީ އާންމު ސަލާމަތާއި ރައްކާތެރިކަމާއި ގުޅިފައިވާ ވަރަށް ނާޒުކު މައްސަލައެއްކަން ފާހަގަކުރައްވާފައެވެ.
އަދި 4 އޮގަސްޓް 2024 ގައި މިކަމަށް އަވަސް ހައްލެއް ހޯދުމަށްއެދި މަޖިލީހުގެ 241 ކޮމިޓީއާއި ޖުޑީޝަރީ ކޮމިޓީ ގުޅިގެން ހާއްސަ އަޑުއެހުމެއް ބާއްވާދެއްވުމަށް އެދި ހުށަހަޅާފައިވީނަމަވެސް މިހާތަނަށް އެއްވެސް ހައްލެއް ލިބިފައި ނުވާކަން ކުޑޫގެ ސިޓީގައި ފާހަގަކުރެއްވިއެވެ.
ކުޑޫގެ ސިޓީގައި އޭނާ ވަނީ މާލެ ސަރަހައްދުގައި ހިނގާ ނުރައްކާތެރި މަގުމަތީގެ ހާދިސާތަކާއި ގުޅޭގޮތުން އިޖްތިމާއީ ކޮމިޓީގެ އާންމު އަޑުއެހުމެއް ބޭއްވުމަށް އެދިފައެވެ. އަދި ކަމާބެހޭ މުއައްސަސާތައް ހާޒިރުކޮށް ރައްޔިތުންގެ ސަލާމަތާއި ކަށަވަރުކަން ގާއިމުކޮށްދިނުމަށާއި މައްސަލަތަކާއި ގުޅޭ މައުލޫމާތު ހިއްސާކޮށްދިނުމަށް އެދިފައިވެއެވެ.
ނުރައްކާތެރިކޮށް އެއްގަމު އުޅަނދު ދުއްވާ ފަރާތްތަކަށް މިހާރަށްވުރެ ޖޫރިމަނާއާއި އަދަބުތައް ބޮޑުކުރުމަށާއި އެ ފަރާތްތަކުގެ ލައިސަންސް ބާތިލުކުރުމަށް ވެސް އޭނާ ވަނީ ގޮވާލާފައެވެ.
މީގެ އިތުރުން، އެކްސިޑެންޓުތަކުގައި އަނިޔާވާ ފަރާތްތަކުގެ ބޭސްފަރުވާއަށާއި ލިބޭ ނުކުޅެދުންތެރިކަމަށް ބަދަލެއް ލިބޭނެފަދަ އިންޝުއަރެންސް ނިޒާމެއް ގާއިމުކުރުމާއި ބޮޑެތި އެކްސިޑެންޓުތަކުގައި ޝަރީއަތް ނިންމުމަށް އެހާ ދިގު މުއްދަތެއް ނަގާ ސަބަބު ހާމަކޮށްދޭން ގޮވާލާފައިވެއެވެ. ހަމަ މިއާއިއެކު ބާރު ސްޕީޑުގައި ދުއްވާ ފަރާތްތަކާއި ރޭސްކުރާ ފަރާތްތައް ދެނެގަތުމަށް ގްރޭޓަރ މާލެ ސަރަހައްދުގައި ސްޕީޑް މޮނިޓަރިން އަދި ކެމެރާ އެންފޯސްމަންޓު ގާއިމުކޮށް މަގުމަތީގެ ސަލާމަތްތެރިކަމާއި ލައިސަންސްއާ ގުޅޭ ފިޔަވަޅުތައް މިހާރަށްވުރެ ހަރުދަނާކުރުމަށް ކަމާބެހޭ އެންމެހާ ފަރާތްތަކަށް އެންގުމަށް އޭނާ ވަނީ އެދިވަޑައިގެންފައެވެ.
ކުޑޫ ވަނީ މައްސަލައިގެ ނާޒުކުކަމަށް ބަލައި ފުލުހުންނާއި ޕޮރޮސިކިއުޓާ ޖެނެރަލްގެ އޮފީހާއި، ޓްރާންޕޯޓް މިނިސްޓްރީ އަދި ކަމާއި ގުޅުންހުރި ހުރިހާ މުއައްސަސާތައް ހާޒިރުކޮށް ރައްޔިތުންގެ ސަލާމަތާއި ކަށަވަރުކަން ގާއިމުކޮށްދިނުމަށް އެދި ދަންނަވާފައެވެ.
