މާލޭގެ މަގުތަކަކީ އަމާން، ރައްކާތެރި އަދި ހިނގާބިނގާވެ އުޅުމަށް ފަސޭހަ ތަންތަނަށް ހެދުމަށް މާލެ ސިޓީ ކައުންސިލުން ބުރަ މަސައްކަތްތަކެއް ކުރާ ކަމަށާއި، މި އަހަރުގެ މިހާތަނަށް މާލޭގެ 180 މަގެއް މަރާމާތުކޮށް ނިންމާފައިވާ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
މާލެ ސިޓީ ކައުންސިލްގެ ރޯޑް މެނޭޖްމަންޓް ސެކްޝަންގެ ތަފާސްހިސާބުތަކުން ދައްކާ ގޮތުގައި، މި އަހަރުގެ ޖެނުއަރީ މަހުގެ ތެރޭގައި 12 މަގެއް މަރާމާތުކޮށްފައިވާއިރު، ފެބްރުއަރީ މަހު 23 މަގެއް ވަނީ މަރާމާތުކޮށްފައެވެ. އަދި މާރިޗު މަހު 28 މަގު، އޭޕްރީލް މަހު 15 މަގު، މެއި މަހު 20 މަގު، ޖޫން މަހު 19 މަގު އަދި ޖުލައި މަހު 18 މަގެއް ވަނީ މަރާމާތުކޮށްފައެވެ.
މި އަހަރުގެ މިހާތަނަށް އެންމެ ގިނަ މަގު މަރާމާތުކޮށްފައިވަނީ ނިމިދިޔަ އޮގަސްޓް މަހުގައެވެ. އެ މަހުގެ ތެރޭގައި އެކަނިވެސް 45 މަގެއް ވަނީ މަރާމާތުކޮށް ނިންމާފައެވެ. މީގެ އިތުރުން، މިހާރުވެސް މާލޭގެ ތިން މަގެއް މަރާމާތުކުރުމުގެ މަސައްކަތް ކުރަމުންދާއިރު އެއީ މާފަތްތަކުރުފާނު މަގާއި، ފާށަނާކިލަގެފާނު މަގުގެ އިތުރުން ސަތަރު ގޯޅިއެވެ.
މޭޔަރު އާދަމް އާޒިމް ވިދާޅުވީ، މަގުތަކާއި މަގުތަކުގެ ޕޭވްމަންޓްތައް މަރާމާތުކުރުމުގެ މަސައްކަތަކީ އާންމު ރައްޔިތުންނަށް ދިމާވާ ދަތިތައް ހައްލުކުރުމަށް އިސްކަންދީގެން ކުރިއަށް ގެންދާ ވަރަށް މުހިންމު މަސައްކަތެއް ކަމަށެވެ. އަދި މާލޭގެ މަގުތަކުގެ ފެންވަރު ރަނގަޅުކޮށް، ރައްޔިތުންނަށް ހިތްފަސޭހަ މާހައުލެއް ގާއިމުކޮށްދިނުމަކީ ކައުންސިލްގެ މުހިންމު އަމާޒެއްކަން މޭޔަރު ފާހަގަކުރެއްވިއެވެ.
ވެރިރަށް މާލޭގެ މަގުތަކުގެ ހާލަތު ރަނގަޅުކޮށް، އަމާން ވެއްޓެއް ގާއިމުކުރުމުގެ ގޮތުން މާލެ ސިޓީ ކައުންސިލުން މެދުނުކެނޑި މި މަސައްކަތް ކުރަމުން އަންނައިރު، ކުރިއަށް އޮތް ތަނުގައިވެސް އެ މަސައްކަތްތައް ކުރިއަށްވުރެ ބާރު ދުވެއްޔެއްގައި ކުރިއަށް ގެންދަވާނެ ކަމުގެ ޔަގީންކަން މޭޔަރު އާޒިމް ވަނީ ދެއްވާފައެވެ.
