ވ. އާރަށުގެ ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ހިންގާ ޝަރީއަތުގައި އެމަނިކުފާނުގެ ފަރާތުން ހުށަހެޅި ދިފާއީ ހެކިތައް ބަލައިނުގަތުމަށް ދައުލަތުން އެދިއްޖެއެވެ.
ރައީސް ޔާމީންގެ މައްޗަށް ރިޝްވަތު ނެގުމާއި މަނީ ލޯންޑާކުރުމުގެ ދައުވާ އުފުލާފައިވަނީ، ވ. އާރަށް ދޫކުރުމުގެ މުއާމަލާތުގެ ތެރެއިން އެއް މިލިއަން ޑޮލަރު ނަންގަވައި އެ ފައިސާ ލޯންޑާކުރެއްވިކަމުގެ ތުހުމަތުގައެވެ.
އަހަރެއްހާ ދުވަސް ފަހުން މިއަދު ކްރިމިނަލް ކޯޓުގައި އެ މައްސަލައިގެ އަޑުއެހުންތައް އަލުން ފަށާފައިވާއިރު، މިއަދުގެ އަޑުއެހުމުގައި އޮތީ ޝަރީއަތުގެ ކުރީގެ ހުށަހެޅުންތައް ހުށަހެޅުމާއި އެކަމާ ގުޅޭގޮތުން ބަހުސްކުރުމެވެ. އެގޮތުން ދައުލަތުން ޝަރީއަތުގެ ކުރިން ހުށަހަޅާފައިވާ ކަންކަމުގެ ތެރޭގައި ޔާމީންގެ ފަރާތުން ހުށަހެޅި ދިފާއީ ހެކިތައް ބަލައިނުގަންނަން އެދުން ހިމެނެއެވެ.
އެ މައްސަލައިގައި ޔާމީންގެ ފަރާތުން ދިފާއީ ހެކީގެ ގޮތުގައި ހުށަހަޅާފައިވާ މީހުންގެ ތެރޭގައި މާލޭގެ ކުރީގެ ޑެޕިއުޓީ މޭޔަރު އަދި ޔޫތު މިނިސްޓްރީގެ މިހާރުގެ ޑެޕިއުޓީ މިނިސްޓަރު އަހުމަދު ނަރީޝް އާއި ހުޅުދޫ ދާއިރާގެ މެމްބަރު މުހައްމަދު ޝާހިދު (ޝާޑު) އާއި ވިލިމާލޭ ދާއިރާގެ މެމްބަރު މުހައްމަދު އިސްމާއިލާއި، އަބްދުﷲ ރަޝީދު ހިމެނެއެވެ. އޭގެ އިތުރުން، އެމަނިކުފާނުގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ހޯދި ފައިސާކަމަށް ސާބިތުކުރަން ހުށަހަޅާފައިވާ ލިޔުމެއް ވެސް ހިމެނެއެވެ.
އެ ހެކިތައް ބަލައިނުގަނެވޭނެ ސަބަބެއް ކަމަށް ދައުލަތުން ބުނެފައިވަނީ، ތަހުގީގުގެ މަރުހަލާގައި ޔާމީން ހަނުހުރުމަށް ނިންމާފައިވުމެވެ. ދައުލަތުން ބުނާ ގޮތުގައި ތަހުގީގު މަރުހަލާގައި ހާމަނުނުކުރާ ކަމެއް ޝަރީއަތުގެ މަރުހަލާގައި ދިފާއީ ހެއްކެއްގެ ގޮތުގައި ހުށަނޭޅޭނެއެވެ.
އެކަމާ ގުޅިގެން ޝަރީއަތުގައި ވާހަކަ ދައްކަވަމުން ޔާމީން ވިދާޅުވީ، އެކަމާ ގުޅޭގޮތުން ތަހުގީގުގައި އޭރު ފުލުހުން ދެއްކީ ސައްހަ ލިޔުމެއް ކަމަށް ގަބޫލުނުކުރެވުމުން އެކަމާ ގުޅޭގޮތުން ޝަރީއަތުގައި ވާހަކަ ދައްކަވަން ނިންމެވީ ކަމަށެވެ.
މިއަދުގެ އަޑުއެހުމުގައި ޔާމީންގެ ފަރާތުން ހުށަހެޅި ހުށަހެޅުންތަކުގެ ތެރޭގައި އެމަނިކުފާނާ ދެކޮޅަށް ދައުލަތުން ހުށަހަޅާފައިވާ ހެކީންގެ ތެރޭގައި ހިމެނޭ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތު ބަލައިނުގަންނަން އެދުން ހިމެނެވެ.
މި މައްސަލައިގައި ދެން އަޑުއެހުމެއް އޮންނާނީ އޮކްޓޯބަރު 12 ވަނަ ދުވަހުއެވެ. އެ އަޑުއެހުމުގައި ދެ ފަރާތުން ޝަރީއަތުގެ ކުރިން ހުށަހެޅި ހުށަހެޅުންތަކާމެދު ގޮތް ނިންމާނެއެވެ.
ދައުވާތަކުގެ ދިފާއުގައި ރައީސް ޔާމީން ސާބިތުކުރަން މަސައްކަތްކުރައްވަނީ އެމަނިކުފާނުގެ އެކައުންޓަށް ޖަމާވި އެއް މިލިއަން ޑޮލަރަކީ ސައްހަ ޑޮލަރު މާރުކުރުމުގެ މުއާމަލާތަކުން ލިބުނު ފައިސާ ކަމެވެ. އެ ފައިސާގެ މުގާބިލުގައި އެއަށް ވާ ވަރަށް ދިވެހި ރުފިޔާ، އެ މައްސަލައިގައި ދެން ދައުވާ އުފުލާފައިވާ ޔޫސުފް ނައީމަށް ހަވާލުކުރީ ނަގުދު ފައިސާއިން ކަމަށާއި އެ ފައިސާ ގުނުމަށްފަހު ގެންދިޔައީ ނަރީޝް ކަމަށް މީގެ ކުރިން ވެސް ޔާމީންގެ ފަރާތުން ބުނެފައިވެއެވެ.
ވ. އާރަށް ދޫކުރުމުގެ މުއާމަލާތުގެ ތެރެއިން ރިޝްވަތުގެ ގޮތުގައި އެއް މިލިއަން ޑޮލަރު ނެންގެވިކަން ސާބިތުވެ، ރައީސް ޔާމީން 11 އަހަރަށް ޖަލަށްލާން ކްރިމިނަލް ކޯޓުން ކުރި ހުކުމް ބާތިލުކޮށް މައްސަލަ އަލުން ބަލަން އެންގީ ހައިކޯޓުންނެވެ. ދައުލަތުން އެ މައްސަލައިގައި ދަށު ކޯޓުގައި ހުށަހެޅި އާ ހެކިތައް ބަލައިގަތީ ގޯސްކޮށް ކަމަށް ހައިކޯޓުން ނިންމިއިރު، އެ ހެކިތައް ބަލައިގަތުމާ ގުޅޭ ބައި ދައުލަތުން ސުޕްރީމް ކޯޓުގައި އިސްތިއުނާފުކުރުމުން އެ ކޯޓުން ވެސް ނިންމާފައިވަނީ ހައިކޯޓުގެ ނިންމުން ރަނގަޅު ކަމަށެވެ.
