އިސްލާމީ ކަންތައްތަކާއި އައުގާފާ ބެހޭ ވުޒާރާއިން ކޮންމެ އަހަރަކު ބާއްވަމުން ގެންދާ ”މައުރިފާ“ ފޮތް މައުރަޒު މާދަމާ ފެށުމަށް ހަމަޖެހިއްޖެއެވެ.
”މައުރިފާ“ ފޮތް މައުރަޒު އޮކްޓޯބަރު 1 އިން 3 އަށް (ބުރާސްފަތި, ހުކުރު އަދި ހޮނިހިރު) އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުމަށް ހަމަޖެހިފައިވާކަމަށް އިސްލާމީ ކަންތައްތަކާއި އައުގާފާ ބެހޭ ވުޒާރާއިން މައުލޫމާތުދެއެވެ.
އެ ފޮތް މައުރަޒު ކުރިއަށް ދާނީ ކޮންމެ ދުވަހެއްގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ.
އެ ފޮތް މައުރަޒުގައި ޖުމްލަ 22 ފަރާތަކުން ބައިވެރިވުމަށް ވަނީ ހަމަޖެހިފައެވެ. އޭގެ ތެރޭގައި ރާއްޖޭގެ ބޮޑެތި ބުކްޝޮޕްތަކުގެ އިތުރުން ޖަމްއިއްޔާ ޖަމާއަތްތަކާއި، މުއައްސަސާތަކާއި އަދި އަމިއްލަ ފޮތް ލިޔުންތެރިން ހިމެނެއެވެ.
އެ މައުރަޒުން ކުޑަކުދިންނަށް ހާއްސަ ވާހަކަ ފޮތްތަކާއި، ދިރާސާކުރާ ފަރާތްތަކަށް ބޭނުންވާ ފޮތްތަކާއި، ދިވެހިބަހަށް ހާއްސަ އިލްމީ ފޮތްތަކުގެ އިތުރުން ވެސް ގިނަ ކެޓަގަރީތަކެއްގެ ފޮތްތައް ގަންނަން ލިބޭނެއެވެ.
މިއަހަރު މުޅިން އަލަށް ކުރިއަށް ގެންދާ ހާއްސަ ކަމެއްގެ ގޮތުން، ލިޔުންތެރިންގެ ތަޖުރިބާ ހިއްސާކުރުމަށް ހާއްސަ ”ކޯނާއެއް“ ބެހެއްޓުމަށް ވަނީ ހަމަޖެހިފައެވެ. އެ ކޯނާ ގާއިމުކުރުމުގެ މަގްސަދަކީ ލިޔުންތެރިން، އެބޭފުޅުންގެ ފޮތްތަކާ ބެހޭގޮތުން ތަޖުރިބާ ހިއްސާކުރުމާއެކު، ޒުވާން ޖީލު ލިޔުންތެރިކަމާއި ފޮތް ކިޔުމަށް ލޯބި ޖެއްސުމެވެ. އަދި ޑރ. އާމާލް އަލީގެ ފޮތް ހުށަހެޅުއްވުން ވެސް އެ ކޯނާގައި ކުރިއަށްދާނެއެވެ.
މީގެ އިތުރުން، މި އަހަރު މައުރަޒަށް ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ ނަސީބުވެރި ފަރާތަކަށް ކޮންމެ ދުވަހަކު 1,000 (އެއްހާސް) ރުފިޔާގެ ފައިސާގެ އިނާމެއް ލިބޭގޮތަށް ވަނީ ހަމަޖެހިފައެވެ. ގުރުއަތުލުން އޮންނާނީ ކޮންމެ ރެއެއްގެ 22:00 ގައެވެ.
