ފާއިތުވެދިޔަ އަހަރުތަކުގައި، ރާއްޖެއާއި ޗައިނާގެ ގުޅުން ވަނީ އައު އުސްމިންތަކަކަށް ގޮސްފައިވާކަމަށް ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފް ވިދާޅުވެއްޖެއެވެ.
ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 އަހަރު ފުރުމުގެ މުނާސަބަތުގައި، ސޯޝަލް މީޑީއާގައި ކުރެއްވި ޕޯސްޓެއްގައި އެމަނިކުފާނު ވަނީ ޗައިނާގެ ރައީސަށާއި އެ ގައުމުގެ ރައްޔިތުންނަށް ދުވަހުގެ ތަހުނިޔާ ފޮނުއްވާފައެވެ.
ކުރިއަށް އޮތް އަހަރުތަކުގައިވެސް ދެ ގއުމުގެ ދެމެދުގައި އޮތް ގާތް އެކުވެރިކަމާއި، އެކަކު އަނެކަކަށް އޮންނަ އިތުބާރާއި ވަރުގަދަ ގުޅުން އިތުރަށް ބަދަހިވަމުންދާނެކަމުގެ ފުރިހަމަ ޔަގީންކަން އޮތްކަމަށް ނައިބު ރައީސް ވިދާޅުވިއެވެ.
އޮކްޓޯބަރު މަހުގެ 1ވަނަ ދުވަހު ޗައިނާގެ ގައުމީ ދުވަސް ފާހަގަކުރާއިރު، އެ ދުވަސް ފާހަގަކުރަނީ 1949 ވަނަ އަހަރު ޕީޕަލްސް ރިޕަބްލިކް އޮފް ޗައިނާ އުފެދުނު ދުވަހާ ގުޅިގެންނެވެ. އެއީ 23 އަހަރަށް ދެމިގެންދިޔަ ޗައިނާގެ ދާހިލީ ހަނގުރާމައިގައި، އެ ގައުމުގައި ކުރިން ވެރިކަން ކުރަމުން އައި ޗައިނީސް ނެޝަނަލިސްޓް ޕާޓީގެ މައްޗަށް ޗައިނީސް ކޮމިއުނިސްޓް ޕާޓީން ކާމިޔާބު ހޯދި ދުވަހުގެ ގޮތުގައެވެ.
ރާއްޖެއާއި ޗައިނާއާ ދެގައުމުގެ ދެމެދު ސިޔާސީ ގުޅުން ގާއިމްކުރީ 1972 ވަނަ އަހަރުގެ އޮކްޓޫބަރު މަހުގެ 14 ވަނަ ދުވަހުއެވެ. މިއީ ދެ ގައުމުގެ ދެމެދުގައި ސިޔާސީ ގުޅުން ގާއިމްކުރިތާ 54 އަހަރު ފުރޭ އަހަރެވެ.
