އިކުއެޑޯގައި މިހާރު ކުރިއަށްދާ ”އިންޓަނޭޝަނަލް މޭޔާސް ފޯރަމް“ގެ ހަވާސާގައި، މާލެ ސިޓީގެ މޭޔަރު އާދަމް އާޒިމް، އެ ގައުމުގެ މުއިސްނޭ ސިޓީގެ މޭޔަރު ޔޫރީ ކޮލޮރާޑޯ މާކޭޒްއާ ބައްދަލުކުރައްވައިފިއެވެ.
އިކުއެޑޯގެ ވެރިރަށް ކީޓޯގައި ބޭއްވުނު އެ ބައްދަލުކުރެއްވުމުގައި، ލޯކަލް ގަވަރނަންސް ނުވަތަ ދާއިރާގެ އިދާރީ ހިންގުމާއި، މުނިސިޕަލް ހިދުމަތްތައް ހަރުދަނާކުރުމުގެ އިތުރުން، ދެމެހެއްޓެނިވި ގޮތެއްގައި ސިޓީތައް ތަރައްގީކުރުމާ ގުޅޭގޮތުން ދެ ބޭފުޅުން ވަނީ ފުޅާ ދާއިރާއެއްގައި މަޝްވަރާކުރައްވައި، ދެ ސިޓީގެ ތަޖުރިބާތައް ހިއްސާކުރައްވާފައެވެ. މީގެ އިތުރުން، ދެ ސިޓީގެ ދެމެދުގައި އޮތް ގުޅުން އިތުރަށް ބަދަހިކޮށް، އެކި ދާއިރާތަކުން ގުޅިގެން މަސައްކަތްކުރެވޭނެ ފުރުސަތުތަކާ ގުޅޭގޮތުން ވެސް އެ ބައްދަލުވުމުގައި ހިޔާލު ބަދަލުކުރެއްވިއެވެ.
މިދިޔަ ސެޕްޓެމްބަރު މަހުގެ 29 އިން ފެށިގެން އޮކްޓޫބަރ 01ގެ ނިޔަލަށް ކުރިއަށްދާ އިންޓަނޭޝަނަލް މޭޔާސް ފޯރަމަކީ ދުނިޔޭގެ އެކި ކަންކޮޅުތަކުގެ މޭޔަރުންނާއި ލޯކަލް ގަވަރމަންޓްތަކުގެ އިސްވެރިން އެއްތަނަކަށް އެއްވެ، ސިޓީތަކުގެ ތަރައްގީއާ ގުޅޭ މުހިންމު ކަންކަމަށް މަޝްވަރާކުރުމަށް ބާއްވާ ބައިނަލްއަގްވާމީ ބައްދަލުވުމެކެވެ.
އެ ފޯރަމްގެ މައިގަނޑު ބޭނުމަކީ ދެމެހެއްޓެނިވި ގޮތެއްގައި ސިޓީތައް ތަރައްގީކުރުމާއި، ކާރިސާތަކަށް ތައްޔާރުވެފައިވާ ރައްކާތެރި ސިޓީތަކެއް ބިނާކުރުމަށް ބޭނުންވާ މާލީ އެހީތެރިކަން ހޯދުމުގެ މަގުތައް ފަހިކުރުމެވެ. މީގެ އިތުރުން، އދ. ގެ ދެމެހެއްޓެނިވި ތަރައްގީގެ ލަނޑުދަނޑިތައް (އެސްޑީޖީސް) ލޯކަލް ފެންވަރުގައި އެންމެ އެދެވޭ ގޮތެއްގައި ތަންފީޒުކުރުމާ ގުޅޭގޮތުން ވެސް އެ ފޯރަމްގައި މުހިންމު މަޝްވަރާތަކެއް ކުރިއަށްދެއެވެ.
އެ ދަތުރުފުޅުގެ ސަބަބުން މާލެ ސިޓީގެ ތަރައްގީއަށާއި، ސިޓީއަށް ދިމާވާ އެކިއެކި ގޮންޖެހުންތަކުން އަރައިގަތުމަށް ބައިނަލްއަގްވާމީ ފެންވަރުގައި އެހެން ސިޓީތަކާއެކު ގުޅުން ބަދަހިވެ، ބޭނުންތެރި ގިނަ ތަޖުރިބާތަކެއް ލިބިގެންދާނެ ކަމަށް މާލެ ސިޓީ ކައުންސިލުން ފާހަގަކުރެއެވެ.
ފޯރަމްގައި ބައިވެރިވެވަޑައިގަންނަވާ މާލެ ސިޓީ ކައުންސިލްގެ ވަފުދުގައި މޭޔަރ އާދަމް އާޒިމްގެ އިތުރުން، ވިލިމާލެ ދާއިރާގެ ކައުންސިލަރު މުގައްމަދު ސަމާގް އަދި ސިޓީ ކައުންސިލްގެ ސެކްރެޓަރީ ޖެނެރަލް އަބްދުލް މުހައިމިން ނަސީރު ވެސް ހިމެނެއެވެ.
