ދޮގު ހެދުމާއި މަކަރު ހެދުމާއި އޮޅުވާލުމަކީ މި ސަރުކާރުގެ ހަމަ އެކަނި އަމާޒުކަމަށް އެމްޑީޕީގެ ޗެއާޕާސަން ރައީސް މުހައްމަދު ނަޝީދު ވިދާޅުވެއްޖެއެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ 5 ވަނަ ކޮންގްރެސް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ނަޝީދު ވަނީ މި ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
ރައީސް ނަޝީދު ވަނީ ރައްޔިތުންނަށް ހިދުމަތްކޮށްދިނުމުގެ ކުޑަވެސް ހިޔާލެއް މި ސަރުކާރުގައި ނެތްކަމަށް ވިދާޅުވެފައެވެ. އެގޮތުން، މިއަދު ދިވެހި ރައްޔިތުންނަށް މާލީ ގޮތުން ވަރަށް ބޮޑަށް ދަތިވެފައިވާކަމަށާއި ބާޒާރުގައި ތަކެތީގެ އަގު އިންތިހާއަށް އުފުލިފައިވާކަމަށް އެމަނިކުފާނު ވިދާޅުވިއެވެ.
”ދޮގު ހެދުމާއި، އޮޅުވާލުމާއި، މަކަރު ހެދުމަކީ މި ސަރުކާރުގެ ހަމައެކަނި އަމާޒު. ރާއްޖޭގެ ރައްޔިތުންނަށް ކަމެއް ކޮށްދިނުމުގެ ކުޑަ ހިޔާލެއްވެސް އެ ބޭފުޅުންގެއެއް ނެތް،“ ރައީސް ނަޝީދު
މީގެ އިތުރުން، ދިވެހިރާއްޖެއަށް ކުރިމަތިވެފައިވާ ޑޮލަރުގެ ތާށިކަމަށް އަލިއަޅުއްވާލައްވާ ރައީސް ނަޝީދު ވިދާޅުވީ، ޑޮލަރުގެ ތާށިކަން ދިމާވީ ސަރުކާރުން ލޯނު ދެއްކުމުގެ ނިޔަތުގައި އިތުރު ލޯނުތަކެއް ނެގުމުގެ ސަބަބުން ކަމަށެވެ. އެގޮތުން މި ސަރުކާރުގެ ދަރަނި އަދާކުރުމުގެ އެއްވެސް ސިޔާސަތެއް ނެތް ކަމަށް އެމަނިކުފާނު ވިދާޅުވިއެވެ.
ހަމައެއާއެކު، މުޅި ދުނިޔެ ފުރޮޅެމުން މިދަނީ ހަނގުރާމައިގެ ނުރައްކަލަށް ކަމަށާއި މެދު އިރުމަތީގެ ހަނގުރާމައިގެ ނުރައްކާ ނުވަތަ ގެއްލުން ރާއްޖޭގެ ގޮނޑުދޮށަށް މިސްރާބު ޖަހާފައިވާކަމަށް އެމަނިކުފާނު ވިދާޅުވިއެވެ.
ސަރުކާރުގެ ޒިންމާއަކީ ދިވެހިންގެ ރައްކާތެރިކަމާއި ސަލާމަތްތެރިކަމަށް ފާރަވެރިވުންކަމަށް ވީހިނދު މި ސަރުކާރަށް އެކަން ކުރަން ނޭނގޭ ކަމަށް އެމަނިކުފާނު ވިދާޅުވިއެވެ. އެގޮތުން ބައިނަލްއަގްވާމީ ގުޅުން ބާއްވަންވީ ގޮތެއް ސަރުކާރަކަށް ނޭނގެކަމަށް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ، ސަރުކާރުން ކުރާ ކަންކަން ބަލަން އެމްޑީޕީން ނުތިބޭނެކަމަށާއި އަނެއްކާވެސް ދިވެހިރާއްޖެ ބަދަލުކޮށްލާނީ އެ ޕާޓީން ކަމަށެވެ. އަދި ރާއްޖޭގެ ރައްޔިތުންނަށް އެމްޑީޕީން ހެޔޮވެރިކަމެއް ކޮށްދޭނެ ކަމަށް އެމަނިކުފާނު ވިދާޅުވިއެވެ.
މި ސަރުކާރުން ރާއްޖެ ގެންދަމުންދަނީ އަނދަވަޅަކަށް ކަމަށާއި އެގޮތަށް އެކަން ވިޔަ ނުދެއްވާނެކަމަށް ރައީސް ނަޝީދު ވިދާޅުވިއެވެ. އަދި ރާއްޖެ އިގްތިސާދީ އަނދަވަޅުން ސަލާމަތްކުރާނީ އެމްޑީޕީން ކަމަށް ވިދާޅުވިއެވެ.
