ކުރީގެ އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދު 25 އަހަރުގެ މުއްދަތަކަށް ޖަލަށް ލާން ކްރިމިނަލް ކޯޓުން ކުރި ހުކުމް އޭނާގެ ފަރާތުން ހައިކޯޓުގައި އިސްތިއުނާފުކުރަން ހައިކޯޓަށް ހުށަހަޅައިފިއެވެ.
ދައުލަތުން ޝައްމާންގެ މައްޗަށް އުފުލި ފޭރުމުގައި ބައިވެރިވުމާއި، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ އިތުރުން މަނީ ލޯންޑްރިންގެ ކުށުގެ ދައުވާ ސާބިތުވެ، އޭނާ 25 އަހަރަށް ޖަލަށް ލާން ހުކުމްކުރީ މިދިޔަ ޖޫން 9 ވަނަ ދުވަހުއެވެ.
ޝައްމާންގެ ފަރާތުން އެ ހުކުމް ހައިކޯޓުގައި އިސްތިއުނާފުކުރަން މިހާރު ވަނީ ހުށަހަޅައިފައެވެ. އެހެންނަމަވެސް، ހައިކޯޓުން އެ މައްސަލަ ބަލައިގަތް ކަމެއް އެނގިފައި ނުވެއެވެ.
އޭނާގެ މައްޗަށް އެ މައްސަލަތަކުގައި ކްރިމިނަލް ކޯޓުން ކަނޑައަޅާފައިވަނީ އެ ދައުވާތަކަށް ދެވެން އޮތް އެންމެ ބޮޑު އަދަބުތަކެވެ. އެގޮތުން ފޭރުމުގައި ބައިވެރިވުމުގެ ކުށަށް 8 އަހަރު، ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށަށް ދެ އަހަރު އަދި މަނީ ލޯންޑަރިންގެ ކުށަށް 15 އަހަރުގެ ޖަލު ހުކުމަކާއެކު ފަސް ލައްކަ ރުފިޔާގެ ޖޫރިމަނާއެއް ކަނޑައަޅާފައިވެއެވެ.
މި މައްސަލައިގައި ޝައްމާންއާއެކު ހައްޔަރުކުރި އިމިގްރޭޝަންގެ މުވައްޒަފުންގެ ތެރެއިން ހަތަރު މީހަކު ވަނީ ދައުލަތާއެކު އިއުތިރާފު އެއްބަސްވުން ހަދައި ލުއި އަދަބެއް ހޯދައިފައެވެ. ޝައްމާންގެ މައްޗަށް ކުށް ސާބިތުވީ އެ މީހުން ކުށަށް އިއުތިރާރުވެ، ޝަައްމާނާ ދެކޮޅަށް ކްރިމިނަލް ކޯޓުގައި ދިން ހެކިބަހާއެކުއެވެ.
