ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމާއި ޕީޕަލްސް ނެޝަނަލް ފްރަންޓް (ޕީއެންއެފް)ގެ އިސް ބޭފުޅުން މިއަދު ހަވީރު އައްޑޫ ސިޓީއަށް ވަޑައިގެންފިއެވެ.
އެމަނިކުފާނު އައްޑޫ ސިޓީއަށް ވަޑައިގަތުމާ ގުޅިގެން މަރުހަބާ ދެންނެވުމަށްޓަކައި ހަވީރު 3:30 ގައި ގަން އިންޓަނޭޝަނަލް އެއާޕޯޓަށް ގިނަ އަދަދެއްގެ ސަޕޯޓަރުން ވަނީ ޖަމާވެފައެވެ.
މި މަހުގެ 9 ވަނަ ދުވަހުގެ ނިޔަލަށް ކުރައްވާ އެ ދަތުރުފުޅުގައި ރައީސް ޔާމީން އައްޑޫ ސިޓީގެ އެކި އަވަށްތަކުގެ އިތުރުން ވަކިން އޮންނަ ހުޅުދޫ އަދި މީދޫއަށް ވެސް ޒިޔާރަތްކުރެއްވުމަށް ވަނީ ހަމަޖެހިފައެވެ.
މި ދަތުރުފުޅުގެ ތެރެއިން މި މަހުގެ ހަތަރު ވަނަ ދުވަހުގެ ރޭ އައްޑޫ ފޭދޫގައި އަދި އަށް ވަނަ ދުވަހުގެ ރޭ ހިތަދޫގައި ޓައުންހޯލް ޖަލްސާ ބޭއްވުމަށް ހަމަޖެހިފައިވެއެވެ.
މި ދަތުރުފުޅުގެ މައިގަނޑު ބޭނުމަކީ ޕީއެންއެފް އަށް މެންބަރުން އިތުރުކުރުމެވެ. މި ދަތުރުގެ ތެރެއިން ޕީއެންއެފްގެ ހާއްސަ ޖަލްސާއެއް ބޭއްވުމުގެ އިތުރުން، އެ ޕާޓީގެ ބައެއް އޮފީސްތައް ރަސްމީކޮށް ހުޅުވުމަށް ވެސް ވަނީ ތާވަލުކޮށްފައެވެ.
